ທ່ານ ຈັນສະໝອນ ຈິດຕະກອນ ຫົວໜ້າຫ້ອງການສາທາລະນະສຸກເມືອງຈັນທະບູລີ ໃຫ້ຮູ້ວ່າ: ໃນປີ 2024 ເມືອງຈັນທະບູລີ ມີຜູ້ເຈັບເປັນຍ້ອນພະຍາດໄຂ້ຍຸງລາຍທັງໝົດ 666 ກໍລະນີ ຍິງ 375 ກໍລະນີ, ບໍ່ມີຜູ້ເສຍຊີວິດ ຊຶ່ງໄດ້ຮັບຜົນກະທົບຈາກພະຍາດດັ່ງກ່າວທັງໝົດ 30 ບ້ານ ເທົ່າກັບ 100% ຂອງບ້ານທັງໝົດພາຍໃນເມືອງ. ດັ່ງນັ້ນ, ເມືອງຈັນທະບູລີ ຈຶ່ງໄດ້ເປີດຂະບວນການປຸກລະດົມປະຊາຊົນເປັນເຈົ້າການ ເຮັດອະນາໄມທຳລາຍແຫຼ່ງເພາະພັນໜອນນ້ຳຍຸງລາຍ ເພື່ອປ້ອງກັນ ແລະ ຄວບຄຸມການລະບາດຂອງພະຍາດໄຂ້ຍຸງລາຍ.
ໂຄງການຫຼຸດຜ່ອນການສົ່ງເຊື້ອພະຍາດໄຂ້ຍຸງລາຍ ໂດຍການນໍາໃຊ້ຍຸງໂວບັກເຄຍຢູ່ ສປປ ລາວ ເພື່ອປົກປ້ອງຊຸມຊົນຈາກພະຍາດທີ່ມີຍຸງລາຍເປັນພາຫະນໍາເຊື້ອເຊັ່ນ: ໄຂ້ຍຸງລາຍ, ໄຂ້ຊິກ້າ, ໄຂ້ເຈັບຂໍ່ ແລະ ໄຂ້ເຫຼືອງ, ພະຍາດໄຂ້ຍຸງລາຍມີການລະບາດຢູ່ໃນລາວ ໂດຍມີຈໍານວນກໍລະນີເພີ່ມຂຶ້ນໃນເດືອນທີ່ມີອາກາດຮ້ອນຂຶ້ນ ແລະ ມີຝົນຕົກ.
ປົກກະຕິແລ້ວການລະບາດຂອງພະຍາດໄຂ້ຍຸງລາຍ ຈະມີຈຳນວນກໍລະນີສູງສຸດໃນໄລຍະເດືອນພຶດສະ ພາ ຫາ ເດືອນຕຸລາ. ເມືອງຈັນທະບູລີ ແລະ ເມືອງໄຊເສດຖາ ນະຄອນຫຼວງວຽງຈັນ ໄດ້ຖືກກຳນົດເປັນເຂດບຸລິ ມະສິດ ເນື່ອງຈາກກໍລະນີຂອງພະຍາດໄຂ້ຍຸງລາຍມີຈໍານວນສູງ ໂດຍຜ່ານການສະໜັບສະໜູນຈາກລັດຖະບານ ອົສຕຣາລີ, ອົງການຊ່ວຍເຫຼືອເດັກສາກົນ ຮ່ວມກັບໂຄງການປະຊາກອນຍຸງໂລກ ແລະ ກະຊວງສາທາລະນະສຸກຂອງ ສປປ ລາວ ໄດ້ສົມທົບກັນ ເພື່ອແກ້ໄຂໄພອັນຕະລາຍຂອງພະຍາດໄຂ້ຍຸງລາຍ ແລະ ພະຍາດທີ່ມີຍຸງລາຍເປັນພາຫະນໍາເຊື້ອອື່ນໆ.
ຂ່າວ-ພາບ: ກະແຕ
ຄໍາເຫັນ