ຂ່າວຕ່າງປະເທດລາຍງານ ໃນວັນທີ 26 ຕຸລາ ຜ່ານມາ, ກະຊວງການຄ້າຂອງກຳປູເຈຍໄດ້ເປີດເຜີຍບົດລາຍງານມູນຄ່າການສົ່ງອອກສິນຄ້າຂອງກຳປູເຈຍສູ່ກຸ່ມປະເທດສະມາຊິກຂໍ້ຕົກລົງຫຸ້ນສ່ວນທາງດ້ານເສດຖະກິດລະດັບພາກພື້ນ (RCEP) ໃນໄລຍະເດືອນມັງກອນ-ກັນຍາ ຂອງປີນີ້ ຢູ່ທີ່ 5,81 ພັນລ້ານໂດລາ ເພີ່ມຂຶ້ນ 23,6% ຈາກໄລຍະເວລາດຽວກັນຂອງປີຜ່ານມາ.
ບົດລາຍງານລະບຸວ່າ: ຈຸດໝາຍການສົ່ງອອກ 3 ອັນດັບທຳອິດຂອງກຳປູເຈຍພາຍໃຕ້ຂໍ້ຕົກລົງ RCEP ໃນໄລຍະ 9 ເດືອນທຳອິດຂອງປີ 2023 ໄດ້ແກ່ ຫວຽດນາມ 2,03 ພັນລ້ານໂດລາ ເພີ່ມຂຶ້ນ 30,6%, ຈີນ 1,06 ພັນລ້ານໂດລາ ເພີ່ມຂຶ້ນ 18,2% ແລະ ຍີ່ປຸ່ນ 885,7 ລ້ານໂດລາ ຫຼຸດລົງ 1,3%. ຂໍ້ຕົກລົງ RCEP ປະກອບດ້ວຍ 15 ປະເທດອາຊີປາຊີຟິກ ຊຶ່ຶງແບ່ງອອກເປັນ 10 ປະເທດອາຊຽນໄດ້ແກ່ ບຣູໄນ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ມຽນມາ, ຟີລິບປິນ, ສິງກະໂປ, ໄທ ແລະ ຫວຽດນາມ ຮ່ວມກັບຄູ່ຄ້າ 5 ແຫ່ງໄດ້ແກ່ ຈີນ, ຍີ່ີປຸ່ນ, ສ ເກົາຫຼີ, ອົສຕຣາລີ ແລະ ນູແວນເຊລັງ. ທ່ານ ເພັນ ໂສວິຊິດ ຮອງລັດຖະມົນຕີ ແລະ ໂຄສົກກະຊວງການຄ້າຂອງກຳປູເຈຍ ກ່າວວ່າ: RCEP ຊຶ່ງມີຜົນບັງຄັບໃຊ້ໃນປີ 2022 ໄດ້ເປັນແຮງກະຕຸ້ນການເຕີບໂຕທາງດ້ານການສົ່ງອອກຂອງກຳປູເຈຍ ແລະ ກາຍເປັນແມ່ເຫຼັກດຶງດູດການລົງທຶນໂດຍກົງຈາກຕ່າງປະເທດສູ່ກຳປູເຈຍເພີ່ມຂຶ້ນ ໂດຍການສົ່ງອອກທີ່ຂະຫຍາຍຕົວຊີ້ໃຫ້ເຫັນວ່າ: ກຸ່ມປະເທດຕາມຂໍ້ຕົກລົງ RCEP ເປັນຕະຫຼາດທີ່ມີສັກກະຍະພາບຂອງສິນຄ້າທີ່ຜະລິດໃນກຳປູເຈຍ. ທ່ານ ໂສວິຊິດ ກ່າວຕື່ມວ່າ: ການສົ່ງອອກຂອງກຳປູເຈຍສູ່ສະມາຊິກ RCEP ຈະຍັງຄົງຂະຫຍາຍຕົວຕະຫຼອດທັງໝົດປີນີ້ ແລະ ປີຕໍ່ໆໄປ ພາຍໃຕ້ມາດຕະການສິດທິປະໂຫຍດທາງດ້ານພາສີອາກອນພາຍໃຕ້ຂໍ້ຕົກລົງ RCEP.
ທ່ານ ໂສວິຊິດ ລະບຸວ່າ: ຂໍ້ຕົກລົງ RCEP ບວກກັບການຄ້າເສລີທະວິພາຄີອື່ນໆຈະຊ່ວຍກຳປູເຈຍຫຼຸດພົ້ນຈາກສະຖານະປະເທດພັດທະນານ້ອຍທີ່ສຸດພາຍໃນປີ 2027 ແລະ ບັນລຸເປົ້າໝາຍການເປັນປະເທດລາຍໄດ້ປານກາງລະດັບສູງພາຍໃນປີ 2030 ແລະ ປະເທດລາຍໄດ້ສູງພາຍໃນປີ 2050.
ຄໍາເຫັນ