 |
ທ່ານ ພູວົງ ວົງຄຳຊາວ ໄດ້ກ່າວສະແດງຄວາມຊົມເຊີຍມາຍັງອົງການຈັດຕັ້ງສາກົນ ເປັນຕົ້ນອົງການອະນາໄມໂລກ ແລະ ອົງການກາວີ ທີ່ໃຫ້ການສະໜັບສະໜູນໃນພິທີເປີດຂະບວນການຄັ້ງນີ້. ຊຶ່ງປີນີ້ເປັນປີແຫ່ງການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີ, ເປັນວັນທີ່ມີຄວາມໝາຍ-ຄວາມສໍາຄັນຂອງຊາດລາວ ຕິດພັນກັບການເຕີບໃຫຍ່ຂະຫຍາຍຕົວທາງດ້ານວຽກງານສາທາລະນະສຸກ ກໍຄືວຽກງານກັນພະຍາດ ໃນການຫຼຸດຜ່ອນອັດຕາການເຈັບເປັນ ແລະ ການເສຍຊີວິດຂອງແມ່ ແລະ ເດັກ ຈາກພະຍາດທີ່ສາມາດກັນດ້ວຍວັກຊິນ. ດັ່ງທີ່ພວກເຮົາຮູ້ນໍາກັນແລ້ວວ່າ: ໃນສປປລາວ ມີແມ່ຍິງລາວປະມານ 320 ຄົນ ເປັນມະເຮັງປາກມົດລູກ ໃນແຕ່ລະປີທີ່ເກີດຈາກເຊື້ອໄວຣັສເອີ້ນວ່າ: human papillomavirus (HPV) ຊຶ່ງເປັນອັບດັບ 2 ຮອງຈາກມະເຮັງເຕົ້ານົມ. ພັກ ແລະ ລັດຖະບານລາວ ໄດ້ມີຄວາມພະຍາຍາມເອົາໃຈໃສ່ສົ່ງເສີມ ແລະ ຮັກສາສຸກຂະພາບໃຫ້ແກ່ແມ່ຍິງ ເພື່ອໃຫ້ແມ່ຍິງໄດ້ເຂົ້າເຖິງການດູແລສຸຂະພາບທີ່ຖືກຕ້ອງ, ໃຫ້ເດັກຍິງອາຍຸ 10 ປີໃນທົ່ວປະເທດເລີ່ມແຕ່ປີ 2020 ເປັນຕົ້ນມາຮອດປັດຈຸບັນ. ທັງນີ້, ເພື່ອຫຼຸດຜ່ອນອັດຕາການເຈັບເປັນ ແລະ ການຕາຍຂອງແມ່ຍິງໃນແຕ່ລະປີ.
 |
ທ່ານ ໄຊຍະວົງ ດວງມະນີ ກ່າວວ່າ: ວັກຊິນ HPV ມີປະສິດທິພາບ ແລະ ຄວາມປອດໄພສູງ ຊຶ່ງພາຍຫຼັງເປີດຂະບວນການແລ້ວ, ທີມງານແພດໝໍຈະໄດ້ລົງສັກຢາໃຫ້ເດັກຍິງເປົ້າໝາຍທີ່ມີອາຍຸ 10 ປີຕາມສະຖານທີ່ໂຮງຮຽນປະຖົມທົ່ວ ນວ ຄື: ເມືອງຈັນທະບູລີ 38 ແຫ່ງ, ເມືອງສີໂຄດຕະບອງ 72 ແຫ່ງ, ເມືອງໄຊເສດຖາ 62 ແຫ່ງ, ເມືອງສີສັດຕະນາກ 43 ແຫ່ງ, ເມືອງນາຊາຍທອງ 53 ແຫ່ງ, ເມືອງໄຊທານີ 120 ແຫ່ງ, ເມືອງຫາດຊາຍຟອງ 52 ແຫ່ງ, ເມືອງສັງທອງ 33 ແຫ່ງ ແລະ ເມືອງປາກງື່ມ 49 ແຫ່ງ ລວມທັງໝົດ 473 ແຫ່ງ ຈຳນວນເປົ້າໝາຍຕົວຈິງ 8,023 ຄົນ.
 |
(ຂ່າວ-ພາບ: ວຽງຈັນໃໝ່)
ຄໍາເຫັນ