ໜ່ວຍກູ້ໄພ 1623 ສາຂາແຂວງຫຼວງນໍ້າທາຈັດຊຸດຝຶກອົບຮົມວຽກງານປະຖົມພະຍານບານຂັ້ນຕົ້ນ

ໃນວັນທີ 1 ພະຈິກນີ້ທີ່ຫ້ອງການຊາວໜຸ່ມປະຊາຊົນປະຕິວັດລາວໄດ້ຈັດຊຸດຝຶກອົບຮົມວຽກງານປະຖົມພະຍານບານເບື້ອງຕົ້ນຂອງໜ່ວຍກູ້ໄພ 1623 ສາຂາແຂວງຫຼວງນໍ້າທາ, ໂດຍການເປັນປະທານຂອງທ່ານ ນາງ ປານີ ຈິດດາລາ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ແຂວງຫຼວງນໍ້າທາ,ທ່ານ ນາງ ຈັນດາວຽງ ອຳມະສອນ ຫົວໜ້າທີມງານອາສາສະໝັກມູນນິທິແຫ່ງ ສປປ ລາວ,ມີຄູຝຶກຈາກມູນນິທິແຫ່ງ ສປປ ລາວ,ສຳມະນາກອນມາຈາກໂຮງໝໍແຂວງ,ໂຮງໝໍທະຫານ,ໂຮງໝໍ ປກສ,ຕໍາຫຼວດຈະລາຈອນ ແລະ ຊາວໜຸ່ມແຂວງເຂົ້າຮ່ວມ.
    ຊຸດຝຶກອົບຮົມຄັ້ງນີ້ສຳມະນາກອນຈະໄດ້ຮຽນຮູ້ ພາກທິດສະດີ ແລະ ພາກປະຕິບັດຕົວຈິງເປັນຕົ້ນແມ່ນການປະຖົມພະຍາບານຂັ້ນຕົ້ນ,ເຜີຍແຜ່ກົດລະບຽບ,ຮຽນຮູ້ເຄື່ອງປະ
ຖົມພະຍາບານ ແລະ ລົດ,ວິທີເກັບກຳຂໍ້ມູນ - ຖ່າຍຮູບ,ຮຽນຮູ້ຄວາມປອດໄພ ແລະ ໜ້າທີ່.ໂອກາດນີ້ທ່ານ ນາງ ປານີ ຈິດດາລາ ໃຫ້ຮູ້ວ່າ: ມູນນິທິຊ່ວຍເຫຼືອຄົນທຸກຍາກ ແລະ ໜ່ວຍກູ້ໄພ 1623 ສາຂາ ແຂວງຫຼວງນໍ້າທາ, ໄດ້ສ້າງຕັ້ງຂຶ້ນຕາມຂໍ້ຕົກລົງສະບັບເລກທີ 05/ມຊທລ, ລົງວັນທີ 13 ທັນວາ 2021ແລະ ໄດ້ເຊັນບົດບັນທຶກຊ່ວຍຈໍາວ່າດ້ວຍສັນຍາສ້າງຕັ້ງໜ່ວຍກູ້ໄພ 1623 ລະຫວ່າງ ຄະນະຊາວໜຸ່ມ ປປລາວ ແຂວງ ຫຼວງນໍ້າທາ ຮ່ວມກັບມູນນິທິຊ່ວຍເຫຼືອຄົນທຸກຍາກສາຂາ ແຂວງຫຼວງນ້ຳທາ ຄັ້ງວັນທີ 1 ສິງຫາ 2022.
ປັດຈຸບັນຢູ່ແຂວງຫຼວງນໍ້າທາເຫັນວ່າສະພາບໄພພິບັດ, ອັກຄີໄພ ແລະ ອຸບັດເຫດຕ່າງໆທີ່ເກີດຂຶ້ນຢູ່ແຂວງຫຼວງນໍ້າທາມີຈຳນວນເພີ່ມຂຶ້ນ,ຈຳເປັນຕ້ອງໄດ້ສ້າງໜ່ວຍກູ້ໄພ 1623 ມູນນິທິຊ່ວຍເຫຼືອຄົນທຸກຍາກ ສາຂາແຂວງຫຼວງນໍ້າທາຂຶ້ນ, ເພື່ອລົງຊ່ວຍເຫຼືອຜູ້ທີ່ຖືກຜົນກະທົບ ແລະ ເກີດອຸບັດເຫດໃຫ້ທ່ວງທັນ, ເພື່ອນຳສົ່ງຄົນມາຮັກສາປິ່ນປົວຢູ່ໂຮງໝໍ ແລະ ຜ່ານການລະດົມທຶນມາຮອດປັດຈຸບັນສາມາດລະດົມໄດ້ ສະກຸນເງິນກີບລວມຍອດລາຍຮັບ 165.170.997 ກີບ,ສະກຸນເງິນບາດ 84.000 ບາດ ແລະ ໄດ້ຮັບເຄື່ອງຊ່ວຍເຫຼືອຈາກທີມງານຄົນຮັກລົດຊຽງຮາຍ ຈັ່ງຫວັດຊຽງຮາຍ ປະເທດໄທ ຈຳນວນ 19 ລາຍການມູນຄ່າ 91.000.000 ກີບ.ປັດຈຸບັນຖ້າເກີດອຸບັດເຫດສາມາດຕິດຕໍ່ໄດ້ເບີໂທ 1623 ຫຼື 0801623. 
ຂ່າວ-ພາບ:ກິ່ນນາລົມ ແອ່ນຖ່າຍ