ອົງການກາແດງລາວ ສະຫຼຸບການຊ່ວຍເຫຼືອຜູ້ປະສົບໄພນ້ຳຖ້ວມ

ອົງການກາແດງແຫ່ງຊາດລາວໄດ້ຈັດກອງປະຊຸມສະຫຼຸບຜົນການຈັດຕັ້ງປະຕິບັດ ການຊ່ວຍເຫຼືອບັນເທົາທຸກຜູ້ປະສົບໄພນໍ້າຖ້ວມດ້ວຍການຊ່ວຍເຫຼືອເປັນເງິນ ຢູ່ແຂວງບໍລິຄຳໄຊ ແລະ ແຂວງຄຳວ່ວນ ປີ 2023 ພາຍໃຕ້ໂຄງການກອງທຶນຕອບໂຕ້ໄພພິບັດສຸກເສີນ (DREF) ຂຶ້ນໃນລະຫວ່າງວັນທີ 6-7 ທັນວາ ນີ້ ທີ່ນະຄອນຫຼວງວຽງຈັນ ໂດຍການເປັນປະທານ ຂອງ ທ່ານ ພູທອນ ເມືອງປາກ ປະທານອົງການກາແດງ ແຫ່ງຊາດລາວ, ມີຜູ້ຕາງໜ້າອົງການຈັດຕັ້ງສາກົນທີ່ກ່ຽວຂ້ອງ ແລະ ຜູ້ຕາງໜ້າກາແດງແຂວງເຂົ້າຮ່ວມ.
ກອງປະຊຸມຄັ້ງນີ້ ໄດ້ສະຫຼຸບສັງລວມຜົນໄດ້ຮັບການຈັດຕັ້ງປະຕິບັດໃນການຊ່ວຍເຫຼືອບັນເທົາທຸກໃຫ້ຜູ້ໄດ້ຮັບຜົນກະທົບຈາກນໍ້າຖ້ວມດ້ວຍຮູບແບບແຈກຢາຍເງິນ, ໃນນັ້ນ ຍັງໄດ້ພ້ອມກັນ ຖອດຖອນບົດຮຽນເຫັນໄດ້ຈຸດດີ, ຈຸດອ່ອນ ແລະ ວິທີແກ້ໄຂວຽກງານໃນຕໍ່ໜ້າ. 
ໃນການຈັດຕັ້ງປະຕິບັດ ການຊ່ວຍເຫຼືອບັນເທົາທຸກຜູ້ປະສົບໄພນໍ້າຖ້ວມດ້ວຍການຊ່ວຍເຫຼືອເປັນເງິນທີ່ແຂວງບໍລິຄຳໄຊ ແລະ ແຂວງ ຄຳມ່ວນ ປີ 2023 ຜ່ານມາ, ສຳລັບແຂວງບໍລິຄໍາໄຊ ເມືອງຄໍາເກີດມີ 24 ບ້ານ, 858 ຄອບຄົວ, 4.942 ຄົນ ຍິງ 2.423 ຄົນ, ງົບປະມານ 1 ຕື້ກວ່າກີບ, ແຂວງຄໍາມ່ວນ, ເມືອງຄູນຄໍາມີ 14 ບ້ານ, 3.049 ຄອບຄົວມີ 14.849 ຄົນ ຍິງ 7.549, ງົບປະມານ 4 ຕື້ກວ່າກີບ,ເມືອງນາກາຍມີ 6 ບ້ານ, 218 ຄອບຄົວ, 1.139 ຄົນ ຍິງ 589 ຄົນ, ງົບປະມານ 360 ລ້ານກີບ, ລວມງົບປະມານ 3 ເມືອງແມ່ນ 6 ຕື້ກວ່າກີບ.
ກອງປະຊຸມຜູ້ເຂົ້າຮ່ວມຍັງໄດ້ຮັບຟັງການນຳສະເໜີພາບລວມຂອງ LRC, DREF ແລະ ຍຸດທະສາດການປະຕິບັດງານ, ວິທີການຈັດຕັ້ງປະຕິບັດ DREF ສຳລັບການປະເມີນເບື້ອງຕົ້ນ, ວິທີການອອກແບບ ແລະ ວາງແຜນຍຸດທະສາດການປະຕິບັດງານທີ່ໄດ້ຈັດຕັ້ງປະຕິບັດສຳເລັດ, ການຈັດຕັ້ງປະຕິບັດຊ່ວຍເຫຼືອດ້ວຍເງິນ DREF 2022 ແລະ 2023, ກິດຈະກຳສົ່ງເສີມສຸຂາອະນາໄມຂອງ DREF 2022 ແລະ 2023, ວຽກບົດບາດ ຍິງ-ຊາຍ ຂອງ DREF 2022 ແລະ 2023, ການສ້າງ roadmap ເພື່ອຈະປັບປຸງແຕ່ລະຂະບວນການ, ສິ່ງທີ່ມີຄວາມຈຳເປັນ ແລະ ມອບຄວາມຮັບຜິດຊອບໃຫ້ພະນັກງານເພື່ອຈະຕິດຕາມ, ກຳນົດສິ່ງທີ່ມີປະໂຫຍດທີ່ສຸດ ແລະ ອຸປະສັກກີດຂວາງ ແລະ ອື່ນໆ.
(ຂ່າວ-ພາບ: ສຳນານ)