ໃນວັນທີ 7 ມິຖຸນາ ຜ່ານມາ, ກຸ່ມ OPEC+ ໄດ້ຕົກລົງທີ່ຈະເພີ່ມເປົ້າໝາຍການຜະລິດນ້ຳມັນດິບເປັນຄັ້ງທີ 4ໃນຮອບ 4 ເດືອນ, ເຖິງວ່າຈະມີການຂັດແຍ້ງຢ່າງຕໍ່ເນື່ອງລະຫວ່າງ ສະຫະລັດ ອາເມຣິກາ ແລະ ອີຣານ ຊຶ່ງເຮັດໃຫ້ສະມາຊິກຫຼາຍຄົນໃນກຸ່ມບໍ່ສາມາດເພີ່ມການຜະລິດໄດ້.
ສົງຄາມດັ່ງກ່າວໄດ້ສົ່ງຜົນໃຫ້ການຂົນສົ່ງນ້ຳມັນຜ່ານຊ່ອງແຄບຮໍມຸສ ຕ້ອງຢຸດສະງັກ ຊຶ່ງນຳໄປສູ່ວິກິດການສະ ໜອງນ້ຳມັນຄັ້ງໃຫຍ່ທີ່ສຸດໃນປະຫວັດສາດໂລກ, ຍ້ອນວ່າສະມາຊິກ OPEC+ ທີ່ສຳຄັນ, ລວມທັງ ຊາອຸດິດ ອາຣັບບີ ບໍ່ສາມາດສະໜອງນໍ້າມັນໃຫ້ຄູ່ຄ້າໄດ້ຢ່າງເຕັມຈຳນວນ ນັບຕັ້ງແຕ່ທ້າຍເດືອນກຸມພາ ຜ່ານມາ.
ຍິ່ງໄປກວ່ານັ້ນ, ວິກິດການຂອງກຸ່ມ OPEC+ ໄດ້ຮຸນແຮງຂຶ້ນເມື່ອ ສະຫະລັດ ອາຣັບ ເອມິເຣດ (UAE) ຕັດສິນໃຈຖອນຕົວອອກຈາກອົງການປະເທດຜູ້ສົ່ງອອກນ້ຳມັນ (OPEC) ຫຼັງຈາກເປັນສະມາຊິກເກືອບ 60 ປີ, ເພື່ອໃຫ້ມີອິດສະຫຼະໃນການຕັດສິນໃຈເລື່ອງກຳລັງການຜະລິດຂອງຕົນເອງ.
ສະມາຊິກຫຼັກທັງ 7 ຂອງ OPEC+ ຊຶ່ງເປັນການຮວມຕົວກັນລະຫວ່າງ OPEC ແລະ ບັນດາປະເທດພັນທະມິດຜະລິດນ້ຳມັນ, ລວມທັງຣັດເຊຍ, ເພີ່ມໂຄຕ້າການຜະລິດເກືອບ 600,000 ບາເຣວຕໍ່ມື້ ນັບແຕ່ເດືອນເມສາ ຫາ ເດືອນມິຖຸນາ.
ເຖິງຢ່າງໃດກໍຕາມ, ໃນຄວາມເປັນຈິງແລ້ວ, ໂຕເລກການຜະລິດຂອງກຸ່ມໄດ້ຫຼຸດລົງຢ່າງຫຼວງຫຼາຍຍ້ອນການສົ່ງອອກທີ່ຫຼຸດລົງຈາກບັນດາປະເທດສະມາຊິກໃນອ່າວອາຣັບ. ໂດຍຂໍ້ມູນຈາກ OPEC ສະແດງໃຫ້ເຫັນວ່າການຜະລິດສະເລ່ຍໃນເດືອນເມສາຜ່ານມາແມ່ນ 33.19 ລ້ານບາເຣວຕໍ່ມື້, ຫຼຸດລົງຈາກ 42.77 ລ້ານບາເຣວຕໍ່ມື້ໃນເດືອນກຸມພາ.
OPEC ໄດ້ປະກາດໃນຖະແຫຼງການເມື່ອວັນທີ 7 ມິຖຸນາ ຜ່ານມາວ່າ: ສະມາຊິກທັງ 7 ໄດ້ຕົກລົງທີ່ຈະເພີ່ມເປົ້າໝາຍການຜະລິດຂຶ້ນອີກ 188,000 ບາເຣວຕໍ່ມື້, ໂດຍມີຜົນບັງຄັບໃຊ້ນັບຕັ້ງແຕ່ເດືອນກໍລະກົດເປັນຕົ້ນໄປ ຊຶ່ງໂຕເລກນີ້ແມ່ນເທົ່າກັບການເພີ່ມຂຶ້ນໃນເດືອນມິຖຸນາ, ແຕ່ຕໍ່າກວ່າແຜນການເດີມທີ່ຈະເພີ່ມການຜະລິດຂຶ້ນ 206,000 ບາເຣວຕໍ່ມື້ ເພື່ອໃຫ້ສອດຄ່ອງກັບການຖອນຕົວຂອງ UAE.
ເຖິງຢ່າງໃດກໍຕາມ, ທ່ານ ຮໍເກ ເລອອນ ນັກວິເຄາະຈາກ Rystad ແລະ ອະດີດເຈົ້າໜ້າທີ່ OPEC ກ່າວວ່າ: “ການເພີ່ມກຳລັງການຜະລິດຂອງ OPEC+ ແມ່ນບໍ່ມີຄວາມໝາຍຕາບໃດທີ່ຊ່ອງແຄບຮໍມຸສຍັງຄົງປິດຢູ່.”
ແຕ່ເມື່ອໃດກໍຕາມທີ່ຊ່ອງແຄບຮໍມຸຍ ເປີດຄືນໃໝ່, ຕະຫຼາດກໍອາດຈະປ່ຽນຈາກຄວາມກັງວົນກ່ຽວກັບການຂາດແຄນພະລັງງານໄປສູ່ຄວາມຢ້ານກົວກ່ຽວກັບການສະໜອງລົ້ນຕະຫຼາດແທນ.
ຄໍາເຫັນ