ປະກາດຮັບຮອງແຂວງວຽງຈັນ ເປັນແຂວງສຸຂານາໄມ ແລະ ຢຸດຕິການຖ່າຍຊະຊາຍ

ພິທີປະກາດຮັບຮອງແຂວງວຽງຈັນ ເປັນແຂວງສຸຂານາໄມ ແລະ ຢຸດຕິການຖ່າຍຊະຊາຍແຫ່ງທີ 3 ຂອງປະເທດຈັດຂຶ້ນໃນວັນທີ 20 ຕຸລາ ນີ້ ທີ່ຫ້ອງວ່າການແຂວງ ໂດຍການເຂົ້າຮ່ວມຂອງ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນາສຸກ, ທ່ານນາງ ເພຍ ເຣເບລ ບຣິສໂຕ ຕາງໜ້າອົງການອຸຍນີເຊັບ (UNICEF) ປະຈຳລາວ, ມີເຈົ້າແຂວງ, ຮອງເຈົ້າແຂວງ 17 ແຂວງ ແລະ 1 ນະຄອນຫຼວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ອິນປອນ ມະນີແສງ ຫົວໜ້າພະແນກສາທາລະນາສຸກແຂວງ ກ່າວວ່າ: ແຂວງວຽງຈັນສ້າງຕັ້ງຂຶ້ນໃນປີ 1982 ປັດຈຸບັນມີ 11 ເມືອງ, 428 ບ້ານ, ມີປະຊາກອນທັງໝົດ 481.550 ຄົນ ຍິງ 239.862 ຄົນ, ມີ 95.079 ຄອບຄົວ. ຜ່ານການຈັດຕັ້ງປະຕິບັດວຽກງານຕົວຈິງເຫັນວ່າແຂວງວຽງຈັນມີ 95.075 ຄອບຄົວ, ຄອບຄົວທີ່ມີວິດຖ່າຍເປັນຂອງຕົນເອງ 94.879 ຄອບຄົວ ເທົ່າກັບ 99,8% ແລະ ຄອບຄົວທີ່ຍັງໃຊ້ວິດຖ່າຍຮ່ວມນຳພີ່ນ້ອງ 200 ຄອບຄົວ ເທົ່າກັບ 0,2% ແລະ 11 ຕົວເມືອງຂອງແຂວງແມ່ນສາມາດປະກາດເປັນເມືອງສຸຂານາໄມ ແລະ ຢຸດຕິການຖ່າຍຊະຊາຍ ຊຶ່ງເລີ່ມປະຕິບັດມາແຕ່ປີ 2019 ແລະ ສຳເລັດໃນປີ 2023. ຜ່ານການປະເມີນຈຶ່ງໄດ້ຈັດພິທີຮັບຮອງເອົາແຂວງວຽງຈັນເປັນແຂວງສຸຂານາໄມ ແລະ ຢຸດຕິການຖ່າຍຊະຊາຍແຫ່ງທີ 3 ຂອງປະເທດ.
(ຂ່າວ-ພາບ: ແກ້ວອຸດົມ)