ປະຊາຊົນບ້ານແກ້ງຕາງານ ໃຫ້ຄວາມສຳຄັນນໍາພາລູກ-ຫຼານມາຢອດຢາວັກຊິນໂປລີໂອ

ໂດຍການໂຄສະນາປາກຕໍ່ປາກ, ໂຄສະນາຜ່ານໂທລະໂຄ່ງຂອງບ້ານ, ໄປບອກປະຊາ ຊົນຢູ່ເຮືອນຢູ່ຊານກໍມີຊ່ວຍໃຫ້ປະຊາຊົນມີຄວາມເຂົ້າໃຈເຫັນຄວາມໝາຍ-ຄວາມສຳຄັນຂອງການຢອດຢາວັກຊິນຕໍ່ສຸຂະພາບຂອງເດັກ. ປັດຈຸບັນປະຊາຊົນມີຄວາມເຂົ້າໃຈກ່ຽວກັບວັກຊິນ ແລະ ໃຫ້ການຮ່ວມມືຫຼາຍຂຶ້ນ. ບ້ານແກ້ງຕາງານມີຈຳນວນພົນ 156 ຄອບຄົວ, 178 ຫຼັງຄາເຮືອນ, ມີຈຳນວນເດັກນ້ອຍລຸ່ມເປົ້າໝາຍ 5 ປີລົງມາທັງໝົດ 40 ກວ່າຄົນ ແລະ ເດັກນ້ອຍຈຳນວນໜຶ່ງໄດ້ມີການເຄື່ອນຍ້າຍໄປເຮັດວຽກຢູ່ບ້ານອື່ນນໍາພໍ່ແມ່.

ທ່ານນາງ ແປງ ສາຍສຸວັນ ພະນັກງານອາສາສະໝັກສາທາລະນະສຸກບ້ານແກ້ງຕາງານ (ອສບ) ໄດ້ກ່າວສະແດງຄວາມຮູ້ສຶກດີໃຈຫຼາຍທີ່ໄດ້ເປັນກະບອກສຽງໂຄສະນາປະຊາສຳພັນໃຫ້ປະຊາຊົນພາຍໃນບ້ານນໍາພາ-ລູກຫຼານມາຮັບການຢອດຢາວັກຊິນໂປລີໂອ ເພື່ອເຮັດໃຫ້ສຸຂະພາບເດັກແຂງແຮງ ແລະ ສ້າງພູມຄຸ້ມກັນໃນການປ້ອງກັນພະຍາດໂປລີໂອໃຫ້ເດັກ. ຂໍເຊີນຊວນປະຊາຊົນພາຍໃນບ້ານແກ້ງຕາງານໃຫ້ພ້ອມໃຈກັນນໍາພາລູກ-ຫຼານມາຮັບວັກຊິນປ້ອງກັນພະຍາດໂປລີໂອ ເພື່ອໃຫ້ມີສຸຂະພາບແຂງແຮງ ບໍ່ໃຫ້ເດັກເປັນພະຍາດເປ້ຍລ່ອຍ.

ທ່ານນາງ ແຮ ໃຈໃຫຍ່ ປະຊາຊົນບ້ານແກ້ງຕາງານ ໄດ້ໃຫ້ສຳພາດຕໍ່ສື່ມວນຊົນວ່າ: ຕົນເອງໄດ້ນໍາພາລູກ-ຫຼານມາຮັບວັກຊິນໂປລີໂອໃນມື້ນີ້ເພື່ອເຮັດໃຫ້ມີສຸຂະພາບທີ່ແຂງແຮງ ຊຶ່ງວັກຊິນໂປລີໂອມີຄວາມສຳຄັນຫຼາຍຕໍ່ສຸຂະພາບຂອງເດັກ ຊ່ວຍປ້ອງກັນພະຍາດເປ້ຍລ່ອຍ, ຕົນເອງມີຄວາມດີໃຈຫຼາຍພາຍຫຼັງທີ່ພັກ-ລັດ ກໍຄືນາຍບ້ານໄດ້ປະກາດທາງໂທລະໂຄ່ງຂອງບ້ານ ຈຶ່ງໄດ້ນໍາພາລູກ-ຫຼານມາຮັບການຢອດຢາວັກຊິນໂປລີໂອເພື່ອສ້າງພູມຄຸ້ມກັນທີ່ດີ ເຮັດໃຫ້ເດັກມີສຸຂະພາບທີ່ແຂງແຮງບໍ່ເຈັບປ່ວຍໄດ້ງ່າຍ ບໍ່ໃຫ້ເປັນພະຍາດເປ້ຍລ່ອຍ.

ຂ່າວ: ພູວັນ