ເປີດໂຄງການຮັກສາພະຍາດຫົວໃຈແຕ່ກຳເນີດຂອງເດັກນ້ອຍ

      ການເປີດຕົວຄັ້ງນີ້, ເປັນຄັ້ງທໍາອິດທີ່ສປປ ລາວ ໄດ້ຂັບເຄື່ອນການພັດທະນາຂີດຄວາມສາມາດລະດັບຊາດໃນການຄັດກອງ, ການບົ່ງມະຕິພະຍາດ ແລະ ການຮັກສາພະຍາດຫົວໃຈແຕ່ກໍາເນີດ (CHD) ຢ່າງມີລະບົບ.ໂຄງການນີ້ໄດ້ຮັບທຶນສະໜັບສະໜູນຈາກລັດຖະບານ ສປຈີນ ຜ່ານກອງທຶນເພື່ອການພັດທະນາໂລກ ແລະ ຮ່ວມມືລະຫວ່າງປະເທດທີ່ກຳລັງພັດທະນາ (Global Development and South–South Cooperation Fund) ເຊິ່ງແມ່ນການປະຕິບັດທີ່ເປັນຮູບປະທໍາພາຍໃຕ້ຂໍ້ລິເລີ່ມການພັດທະນາສາກົນ (GDI). ແນໃສ່ການປິ່ນປົວພະຍາດ ຫົວໃຈແຕ່ກໍາເນີດຂອງເດັກ ເຊິ່ງແມ່ນສາເຫດສໍາຄັນຂອງການເສຍຊີວິດຂອງເດັກນ້ອຍທັງໃນສປປ ລາວ ແລະ ກໍາປູເຈຍ, ໂຄງການນີ້ມີເປົ້າໝາຍໃນການສ້າງລະບົບການຄັດກອງລະດັບຊາດ, ນໍາເອົາເຕັກໂນໂລຊີການບົ່ງມະຕິການຮັກສາທີ່ທັນສະໄໝ ແລະ ພັດທະນາຂີດຄວາມສາມາດຂອງບຸກຄະລາກອນທາງການແພດໃນສອງປະເທດ.    ໃນໄລຍະ 2 ປີຂ້າງໜ້າ, ໂຄງການຈະສ້າງຜົນໄດ້ຮັບທີ່ສໍາຄັນໃນສປປ ລາວ: ຄັດກອງເດັກນ້ອຍຢ່າງນ້ອຍ 10,000 ຄົນທົ່ວປະເທດ ໃຫ້ການຮັກສາຄົບວົງຈອນແກ່ເດັກນ້ອຍຢ່າງໜ້ອຍ 30 ຄົນ ແລະ ຝຶກອົບຮົມບຸກຄະລາກອນທາງການແພດຫຼາຍກວ່າ 110 ຄົນ. ແພດຊ່ຽວຊານຈາກສປປ ລາວຍັງຈະໄດ້ຮັບທຶນຝຶກອົບຮົມຂັ້ນສູງທີ່ໂຮງໝໍ Fuwai ເພື່ອເສີມສ້າງຄວາມສາມາດໃນການບໍລິການປິ່ນປົວ ພ້ອມດຽວກັນນັ້ນ, ໂຄງການຈະມອບເຄື່ອງອັນຕ້າຊາວ ແລະ ອຸປະກອນການແພດທີ່ຈໍາເປັນ.

      ທ່ານ ຄໍາປະສົງ ເທບປັນຍາ ໄດ້ກ່າວສະແດງຄວາມຂອບໃຈຕໍ່ການຊ່ວຍເຫຼືອອັນຍາວນານ ແລະ ເປັນມິດຈາກສປ ຈີນ “ໂຄງການນີ້ບໍ່ພຽງແຕ່ສະໜອງການປິ່ນປົວທີ່ທັນເວລາໃຫ້ແກ່ເດັກນ້ອຍທີ່ປ່ວຍເປັນພະຍາດ ຫົວໃຈແຕ່ກໍາເນີດ ໂດຍສະເພາະໃນພື້ນທີ່ຫ່າງໄກສອກຫຼີກ ຍັງເປັນການສ້າງຂີດຄວາມສາມາດຂອງວຽກງານສາທາລະນະສຸກ ຜ່ານການຍົກລະດັບທັກສະຂອງທ່ານໝໍ, ພະຍາບານ ແລະ ການສ້າງຖານຂໍ້ມູນທີ່ຈໍາເປັນໃນການພັດທະນານະໂຍບາຍທີ່ອີງໃສ່ຫຼັກຖານ. ພວກເຮົາຂໍຂອບໃຈຢ່າງສູງຕໍ່ການສະໜັບສະໜູນຂອງລັດຖະບານ ສປຈີນ”

      ທ່ານ ສຸຣິຍັນ ວິຈິດເລກການ ໄດ້ກ່າວວ່າ: “ນີ້ແມ່ນໂຄງການທໍາອິດທີ່ MI ໄດ້ດໍາເນີນງານ ພ້ອມການສະໜັບສະໜູນຈາກລັດຖະບານ ສປຈີນ ຜ່ານກອງທຶນນີ້ ແລະ ເປັນຫຼັກໝັ້ນສໍາຄັນໃນການມີສ່ວນຮ່ວມດ້ານສາທາ ລະນະສຸກພາກພື້ນ. ການເສີມສ້າງທັກສະທາງວິຊາການໃຫ້ສປປ ລາວ ແລະ ກຳປູເຈຍ, ສ້າງຜົນປະໂຫຍດຕໍ່ຊຸມຊົນ ແລະ ຊ່ວຍສ້າງລະບົບສາທາລະນະສຸກທີ່ມີຄວາມສະເໝີພາບ ແລະ ມີປະສິດທິພາບຫຼາຍຂຶ້ນໃນພາກພື້ນແມ່ນ້ໍາຂອງ. ໂຄງການນີ້ແມ່ນຄວາມຮ່ວມມືພາກພື້ນ ແລະ ຄວາມຫວັງຮ່ວມກັນ ສະທ້ອນເຖິງຄວາມມຸ່ງໝັ້ນຂອງສປຈີນ ໃນການຜັກດັນເປົ້າໝາຍ SDGs 2030 ຜ່ານຂໍ້ລິເລີ່ມ GDI.”

      ທ່ານ ດົວ ລິນ ໄດ້ກ່າວວ່າ: ພວກເຮົາຮູ້ສຶກເປັນກຽດຢ່າງສູງ ທີ່ໄດ້ຮ່ວມດຳເນີນໂຄງການນີ້ເພື່ອເສີມສ້າງການປະສານງານຢ່າງໃກ້ຊິດກັບສະຖາບັນແມ່ຂອງ ເພື່ອການພັດທະນາເສດຖະກິດ ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງອື່ນໆ. ໂດຍການສະໜອງອຸປະກອນທາງການແພດເຊັ່ນ: ເຄື່ອງອັນຕ້າຊາວ ແລະ ອຸປະກອນໃນການຮັກສາ ພ້ອມທັງຈັດກິດຈະກໍາການຕິດຕາມຢ່າງໃກ້ຊິດ, ພວກເຮົາມຸ່ງໝັ້ນທີ່ຈະຊ່ວຍເຫຼືອເດັກລາວທີ່ປ່ວຍເປັນພະຍາດຫົວໃຈແຕ່ກຳເນີດ ໃຫ້ສາມາດກວດພົບໄດ້ໄວ ແລະ ໄດ້ຮັບການຮັກສາທັນເວລາ ເພື່ອມີສ່ວນຮ່ວມໃນການປັບປຸງສຸຂະພາບຂອງເດັກນ້ອຍ.

      ການດໍາເນີນງານນີ້ຍັງສອດຄ່ອງກັບຂໍ້ລິເລີ່ມການພັດທະນາສາກົນ ແລະ ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ (BRI) ພ້ອມທັງສອດຄ່ອງກັບເປົ້າໝາຍຂອງແຜນພັດທະນາຢ່າງຍືນຍົງສະຫະປະຊາຊາດ 2030, ໂດຍສະເພາະເປົ້າໝາຍໃນການຫຼຸດອັດຕາການເສຍຊີວິດຂອງເດັກອາຍຸຕໍ່າກວ່າ 5 ປີ ແລະ ເດັກໄວໜຸ່ມ.” ໂຄງການໄດ້ເນັ້ນໜັກການສ້າງຂີດຄວາມສາມາດທີ່ຍືນຍົງ ຜ່ານການຝຶກອົບຮົມ ແລະ ການຖ່າຍທອດເຕັກໂນໂລຊີ ລວມທັງການນໍາເອົາເຕັກນິກ PAN (Percutaneous and Non-fluoroscopic) ທີ່ທັນສະໄໝຂອງໂຮງໝໍ Fuwai ເຂົ້າມາ. ບຸກຄະລາກອນການແພດໄດ້ໃຫ້ການສະໜັບສະໜູນ ໂດຍກ້າວເຖິງບັນດາອຸປະກອນໃໝ່, ການຝຶກອົບ ຮົມ ແລະ ການແນະນໍາຈາກຜູ້ຊ່ຽວຊານຈະຊ່ວຍພັດທະນາການກວດພົບພະຍາດໄດ້ໄວ ແລະ ສ້າງການປ່ຽນແປງໄລຍະຍາວໃຫ້ແກ່ເດັກນ້ອຍ.

      ການເປີດໂຕໂຄງການນີ້ເປັນຈຸດເລີ່ມຕົ້ນຂອງຄວາມພະຍາຍາມຮ່ວມມືຫຼາຍປີລະຫວ່າງສປ ຈີນ, ສະຖາບັນແມ່ຂອງສປປ ລາວ ແລະ ພາກພື້ນອື່ນໆ ເພື່ອຫຼຸດອັດຕາການເສຍຊີວິດໃນເດັກນ້ອຍທີ່ສາມາດປ້ອງກັນໄດ້ຈາກພະຍາດຫົວໃຈເດັກແຕ່ກໍາເນີດ. ພາກສ່ວນໂຄງການຈະຮ່ວມມືຢ່າງໃກ້ຊິດກັບພະແນກສາທາລະນະສຸກແຂວງ, ໂຮງໝໍ ແລະ ໂຮງຮຽນ ເພື່ອຂະຫຍາຍການຄັດກອງໄປສູ່ຊຸມຊົນຫ່າງໄກ ເຮັດໃຫ້ເກີດການຮັກສາທີ່ທັນເວລາ ແລະ ເສີມສ້າງຄວາມຮັບຮູ້ໃນຊຸມຊົນ, ລະບົບ ແລະ ປະສົບການທີ່ພັດທະນາ. ຜ່ານໂຄງການນີ້ຈະສະໜອງພື້ນຖານສໍາຄັນໃນການພັດທະນານະໂຍບາຍໄລຍະຍາວຂອງ ສປປ ລາວ ດ້ານການດູແລພະຍາດຫົວໃຈເດັກ ເພື່ອໃຫ້ຜົນປະໂຫຍດຂອງໂຄງການດໍາລົງຢູ່ຫຼັງໂຄງການສິ້ນສຸດ. ຂ່າວ: ວຽງຈັນໃໝ່