ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 31 ຕຸລາ ຜ່ານມາ ຢູ່ນະຄອນຫຼວງ ເຊອູນ ປະເທດ ສ ເກົາຫຼີ, ໄດ້ຈັດພິທີເປີດກອງປະຊຸມຄັ້ງທີ 60, ສະມັດຊາໃຫຍ່ສະມາຄົມກະຈາຍສຽງ ໂທລະພາບອາຊີ - ປາຊີຟິກ (ABU) ໂດຍມີສະມາຊິກຫຼາຍກວ່າ 250 ຄົນ ທີ່ຕາງໜ້າໃຫ້ 67 ປະເທດສະມາຊິກ.
ກອງປະຊຸມສະມັດຊາໃຫຍ່ ABU ຄັ້ງທີ 60 ດ້ວຍຫົວຂໍ້: “ສິ່ງໃດຈະເກີດຂຶ້ນຕໍ່ໄປ?”, ໂດຍຈຸດປະສົງຄົ້ນຫາຄຳຖາມທີ່ສຳຄັນກ່ຽວກັບລັກສະນະຍືນຍົງໃນຂະແໜງກະຈາຍສຽງ ໂທລະພາບ ແລະ ກຳນົດທິດອະນາຄົດຂອງຂະແໜງຢູ່ພາກພື້ນ ອາຊີ - ປາຊີຟິກ. ໃນກອງປະຊຸມ, ບັນດາຜູ້ແທນໄດ້ປຶກສາຫາລື, ແບ່ງປັນຄວາມຮູ້ ແລະ ຄວາມພະຍາຍາມຮ່ວມມືເພື່ອສ້າງທິດທາງຍືນຍົງໃຫ້ແກ່ຂະແໜງກະຈາຍສຽງ ໂທລະພາບ; ຄົ້ນຫາບັນດາຍຸດທະສາດປ່ຽນແປງໃໝ່, ພິຈາລະນາບັນດາທິດທາງທີ່ດີທີ່ສຸດ, ຊຸກຍູ້ການພົວພັນຄູ່ຮ່ວມມື ແລະ ຊຸກຍູ້ຄວາມສາມາດຟື້ນຟູ, ລັກສະນະຫຼາຍຮູບຫຼາຍແບບ ແລະ ໜ້າທີ່ຄວາມຮັບຜິດຊອບໃນການເຄື່ອນໄຫວດ້ານວິຊາການ.
ໃນຕອນຄ່ຳວັນດຽວກັນ, ໄດ້ຈັດພິທີມອບລາງວັນ ABU Prize ຊຶ່ງແມ່ນລາງວັນວິຊາສະເພາະຂະແໜງກະຈາຍສຽງ - ໂທລະພາບສາກົນທີ່ມີອິດທິພົນ ແລະ ຊື່ສຽງ ຊຶ່ງຈັດຂຶ້ນທຸກປີ ໂດຍ ABU.
ຄໍາເຫັນ