ວັນທີ 7 ພະຈິກນີ້, ທີ່ພະແນກການເງິນ ແຂວງສາລະວັນ ໄດ້ມີກອງປະຊຸມເຜີຍແຜ່ວຽກງານຄຸ້ມຄອງລາຍຮັບຈາກພາສີທີ່ດິນ, ນິຕິກໍາທີ່ກ່ຽວຂ້ອງ ແລະວຽກງານຄຸ້ມຄອງເກັບລາຍຮັບຄ່າທໍານຽມທາງ, ໂດຍການເປັນປະທານຂອງ ທ່ານ ພອນປະເສິດ ລາຊາໂພ ວ່າການຫົວໜ້າພະແນກການເງິນ ແຂວງສາລະວັນ, ທ່ານ ເພັດຊົມພູ ດວງບຸດດາ ຫົວໜ້າສ່ວຍສາອາກອນປະຈໍາແຂວງ, ມີຕາງໜ້າຈາກກົມສ່ວຍສາອາກອນ, ຫົວໜ້າຫ້ອງການການເງິນເມືອງ, ສ່ວຍສາອາກອນຈາກ 8 ຕົວເມືອງຂ້ອງເຂົ້າຮ່ວມ.
ທ່ານ ພອນປະເສິດ ລາຊາໂພ ວ່າການຫົວໜ້າພະແນກການເງິນແຂວງສາລະວັນ ກໍໄດ້ໃຫ້ຮູ້ເຖິງຈຸດປະສົງໃນການຈັດກອງປະຊຸມໃນຄັ້ງນີ້ ເພື່ອເປັນການເຜີຍແຜ່ວຽກງານຄຸ້ມຄອງລາຍຮັບຈາກພາສີທີ່ດິນ ແລະ ນິຕິກຳ ທີ່ກ່ຽວຂ້ອງຈຳນວນໜຶ່ງ ເປັນຕົ້ນແມ່ນການເສຍຄ່າທຳນຽມທາງ ປີ2023, ເພື່ອສ້າງຄວາມສະດວກສະບາຍໃຫ້ແກ່ບຸກຄົນ, ນິຕິບຸກຄົນ, ອົງການຈັດຕັ້ງຕ່າງໆ ເຂົ້າໃນການປະຕິບັດພັນທະຂອງຕົນ ໃຫ້ມີຄວາມຖືກຕ້ອງ ຊັດເຈນ ແລະ ກວດສອບໄດ້ຊຶ່ງການເກັບຄ່າທໍານຽມທາງ ແລະ ພາສີທີ່ດິນ ເປັນວຽກໜຶ່ງທີ່ພັກ-ລັດ ໃຫ້ຄວາມສໍາຄັນ ແລະ ເປັນວຽກບຸລິມະສິດທີ່ໄດ້ກຳນົດໄວ້ໃນແຜນວຽກຫັນເປັນທັນສະໄໝຂອງລັດຖະບານ ກໍຄືກະຊວງການເງິນ ເພື່ອໃຫ້ແທດເໝາະກັບສະພາບຕົວຈິງຂອງປະເທດໃນປັດຈຸບັນ ຊຶ່ງສະແດງອອກໄດ້ສ້າງກົດໝາຍວ່າດ້ວຍອາກອນທີ່ດິນ ເລກທີ 35 /ສພຊ ລົງວັນທີ 17 ກໍລະກົດ 2023 ເພື່ອປັບວິທີເກັບອາກອນທີ່ດິນ ໄປຕາມແຕ່ລະເຂດ ທີ່ໄດ້ຮັບຮອງຈາກສະພາປະຊາຊົນຂັ້ນແຂວງ.
ຈາກນັ້ນ, ຜູ້ເຂົ້າຮ່ວມກໍໄດ້ຮັບຟັງການເຜີຍແຜ່ ລັດຖະດຳລັດຂອງລັດຖະບານເລກທີ 091/ປປທ ກ່ຽວກັບການປະກາດໃຊ້ກົດໝາຍວ່າດ້ວຍອາກອນທີ່ດິນ ແລະມະຕິຂອງສະພາແຫ່ງຊາດ ເລກທີ 85 /ສພຊ ກ່ຽວກັບການຮັບຮອງເອົາກົດໝາຍວ່າດ້ວຍອາກອນທີ່ດິນຊຶ່ງກົດໝາຍວ່າດ້ວຍອາກອນທີ່ດິນ ປະກອບມີ 9 ພາກ 47 ມາດຕາ ໄດ້ກຳນົດຫຼັກການ, ລະບຽບການ, ວິທີການ, ມາດຕະການກ່ຽວກັບການຄຸ້ມຄອງ ແລະ ຕິດຕາມ, ກວດກາວຽກງານອາກອນທີ່ດິນ ເພື່ອເຮັດໃຫ້ວຽກງານດັ່ງກ່າວມີປະສິດທິພາບ ແລະ ປະສິດທິຜົນ ແນໃສ່ຮັບປະກັນເກັບລາຍຮັບເຂົ້າງົບປະມານແຫ່ງລັດ, ໃຫ້ຖືກຕ້ອງ, ຄົບຖ້ວນ, ຍຸຕິທໍາ ແລະ ໂປ່ງໃສ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ.
ໃນໂອກາດນີ້ຜູ້ເຂົ້າຮ່ວມກໍໄດ້ຮັບຟັງ ການເຜີຍແຜ່ແຈ້ງການຂອງຫ້ອງການກະຊວງການເງິນ ເລກທີ 1844 ວ່າດ້ວຍການເສຍພາສີທີ່ດິນປະຈໍາປີ 2023, ຄໍາແນະນຳຂອງກົມສ່ວຍສາອາກອນ ສະບັບເລກທີ 4191/ກສອ ວ່າດ້ວຍການເສຍພາສີທີ່ດິນປະຈຳປີ 2023, ການບັນທຶກຂໍ້ມູນຕອນດິນເຂົ້າປຶ້ມສໍາມະໂນທີ່ດິນ, ຂໍ້ມູນຮ່າງເອັກເຊວ, ບັນທຶກເຂົ້າລະບົບແທັກລິສ ( TaxRIS ), ໃບເກັບເງິນຄ່າພາສີທີ່ດິນ ແລະເຜີຍແຜ່ວຽກງານການເສຍຄ່າທໍານຽມທາງປີ 2023.
ຂ່າວ-ພາບ: ລັດຕະນາ ແສງສຸວັນ
ທາບທາມຮ່າງດໍາລັດ ວ່າດ້ວຍການເຄື່ອນໄຫວວຽກງານສື່ ຢູ່ ລາວ, ສໍານັກງານຜູ້ຕາງໜ້າ ແລະ ອົງການຈັດຕັ້ງຕ່າງປະເທດ
ໃນວັນທີ 2-3 ເມສານີ້ ທີ່ ນະຄອນ-ຫຼວງພະບາງ ແຂວງຫຼວງພະບາງ, ກະຊວງການຕ່າງປະເທດ ໄດ້ຈັດກອງປະຊຸມທາບທາມຄໍາເຫັນຕໍ່ ຮ່າງດໍາລັດ ວ່າດ້ວຍການເຄື່ອນໄຫວວຽກງານສື່ມວນຊົນ ຢູ່ ສປປ ລາວ ຂອງສື່ມວນຊົນ, ສໍານັກງານຜູ້ຕາງໜ້າ ແລະ ອົງການຈັດຕັ້ງຕ່າງປະເທດ ສໍາລັບ 8 ແຂວງພາກເໜືອ ຂຶ້ນໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ໄມທອງ ທໍາມະວົງສາ ຮອງລັດຖະມົນຕີກະຊວງການຕ່າງປະເທດ ແລະ ທ່ານ ສຳນານ ສົນທະນີ ຄະນະປະຈໍາພັກແຂວງ, ໂດຍມີບັນດາຜູ້ຕາງໜ້າຈາກກະຊວງ, ອົງການອ້ອມຂ້າງສູນກາງ ແລະ 8 ແຂວງພາກເໜືອ ພ້ອມດ້ວຍພະນັກງານທີ່ກ່ຽວຂ້ອງ ເຂົ້າຮ່ວມ.
ຄໍາເຫັນ