 |
ການຈັດງານຄັ້ງນີ້: ຄາດວ່າຈະໄດ້ຮັບບໍລິຈາກເລືອດຫຼາຍກວ່າ 400 ຖົງ, ໃນນັ້ນ ຍັງໄດ້ມອບໃບຍ້ອງຍໍໃຫ້ແກ່ຜູ້ບໍລິຈາກເລືອດຫຼາຍຄັ້ງ, ໃຫ້ກົມກອງ-ການຈັດຕັ້ງທີ່ດີເດັ່ນໃນການປຸກລະດົມບໍລິຈາກເລືອດ, ໃຫ້ອົງການຈັດຕັ້ງສາກົນເປັນຕົ້ນສຳນັກງານຜູ້ຕາງໜ້າສະຫະພາບເອີຣົບ ປະຈຳລາວ, ບໍລິສັດ, ຫົວຫນ່ວຍທຸລະກິດທີ່ໄດ້ປະກອບສ່ວນສະໜັບສະໜູນຕື່ມນໍາອີກ.
 |
ທ່ານ ຄໍາລາວັນ ຈັນທະລາວັນ ໄດ້ກ່າວວ່າ: ວັນທີ 14 ມິຖຸນາ ຂອງທຸກໆປີ ແມ່ນວັນຜູ້ບໍລິຈາກເລືອດໂລກ (World Blood Donor Day) ຊຶ່ງຢູ່ປະເທດຕ່າງໆໃນທົ່ວໂລກໄດ້ພ້ອມກັນຈັດຕັ້ງສະເຫຼີມສະຫຼອງ ເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດທີ່ເຂົາເຈົ້າໄດ້ມອບຂອງຂວັນທີ່ມີຄ່າທີ່ສຸດຕໍ່ຊີວິດນັ້ນຄືການບໍລິຈາກເລືອດ ດ້ວຍຄວາມສະໝັກໃຈເພື່ອຊ່ວຍຄົນເຈັບ ແລະ ສ້າງຄວາມສໍານຶກໃນເລື່ອງຄວາມຈໍາເປັນຂອງການບໍລິຈາກເລືອດທີ່ປະຈໍາ ແລະ ສະໝໍ່າສະເໝີ, ເລືອດ ແລະ ຜະລິດຕະພັນເລືອດທີ່ໄດ້ຮັບບໍລິຈາກໃນແຕ່ລະປີ ຢູ່ທົ່ວໂລກສາມາດຊ່ວຍຊີວິດຄົນເຈັບໄດ້ນັບລ້ານ, ຈຳນວນຄົນເຈັບທີ່ຕ້ອງການນໍາໃຊ້ເລືອດ ມາຈາກ ແມ່ຍິງ ທີ່ໄດ້ຮັບຜົນກະທົບຈາກການເກີດລູກ, ເດັກນ້ອຍທີ່ເປັນພະຍາດເລືອດຈາງຂັ້ນຮ້າຍແຮງ, ເລືອດໄຫຼລະບົບລະລາຍ, ການຟອກໄຂ່ຫຼັງ, ມະເຮັງເມັດເລືອດຂາວໃນເດັກ, ມະເຮັງຕ່າງໆໃນຜູ້ໃຫຍ່, ໄຂ້ເລືອດອອກ, ຄົນເຈັບກະທົບຈາກອຸບັດເຫດສຸກເສີນ, ການຜ່າຕັດຊະນິດຕ່າງໆ. ທົ່ວໂລກມີຄວາມຕ້ອງການເລືອດປອດໄພ ແລະ ມີຄຸນນະພາບເຂົ້າໃນການປິ່ນປົວ ແລະ ມີຫຼາຍປະເທດກໍສາມາດຈັດຕັ້ງປະຕິບັດໄດ້ໃນລະດັບດີ, ແຕ່ຍັງມີອີກຫຼາຍປະເທດຍັງຄົງປະສົບກັບບັນຫາ ແລະ ສິ່ງທ້າທາຍໃນດ້ານການຈັດຫາເລືອດ ແລະ ຜະລິດຕະພັນເລືອດທີ່ມີຄຸນນະພາບ ແລະ ປອດໄພ.
 |
ທ່ານກ່າວຕື່ມວ່າ: ວັນຜູ້ບໍລິຈາກເລືອດປີນີ້ ແມ່ນມຸ່ງເນັ້ນເຖິງຜູ້ຄົນໃນທົ່ວໂລກໄດ້ເລີ່ມຕົ້ນເປັນຜູ້ບໍລິຈາກເລືອດ ແລະ ເປັນຜູ້ບໍລິຈາກເລືອດຢ່າງປະຈໍາ. ເພື່ອສະເຫຼີມສະຫຼອງວັນທີ 14 ມິຖຸນາ ວັນຜູ້ບໍລິຈາກເລືອດໂລກໃຫ້ກວ້າງຂວາງ ຢູ່ສູນກາງ ແລະ ບັນດາແຂວງອື່ນໆ ໃນທົ່ວປະເທດ ກໍຈະມີກິດຈະກໍາແບບນີ້ຕາມເວລາທີ່ເໝາະສົມເຊັ່ນກັນ, ສະຖາບັນເລືອດແຫ່ງຊາດ ແລະ ສູນເລືອດແຂວງໃນທົ່ວປະເທດຂໍເຊີນຊວນ ພະນັກງານ-ລັດຖະກອນ,ທະຫານ, ຕຳຫຼວດ, ນັກຮຽນນັກສຶກສາ, ພໍ່ຄ້າ-ຊາວຂາຍ ຕະຫຼອດເຖິງພໍ່ແມ່ປະຊາຊົນທົ່ວນະຄອນຫຼວງວຽງຈັນ ຫຼືບັນດາແຂວງ ທົ່ວປະເທດ ເຂົ້າຮ່ວມກິດຈະກຳການບໍລິຈາກເລືອດ, ຫາກທ່ານມີເງື່ອນໄຂ ອາຍຸ 17-60 ປີ, ນໍ້າໜັກ 45 ກິໂລຂຶ້ນໄປ, ຢູ່ໃນໄລຍະທີ່ມີສຸຂະພາບແຂງແຮງດີ, ຂໍເຊີນຊວນບັນດາທ່ານໄປຮ່ວມບໍລິຈາກເລືອດນຳພວກເຮົາທີ່ສະຖາບັນເລືອດແຫ່ງຊາດ ແລະ ສູນເລືອດແຂວງໃນທົ່ວປະເທດ, ທ່ານສາມາດມາບໍລິຈາກເລືອດໄດ້ທີ່ສະຖາບັນເລືອດແຫ່ງຊາດ ແລະ ສູນເລືອດແຂວງໃນທົ່ວປະເທດ ທຸກວັນ, ບໍ່ເວັ້ນວັນພັກທາງລັດຖະການ.
(ຂ່າວ-ພາບ: ສຳນານ)
ຄໍາເຫັນ