 |
ທ່ານບຸນແຝງ ພູມມະໄລສິດ ໃຫ້ຮູ້ວ່າ: ໃນການປະຕິບັດຕາມແຜນພັດທະນາສາທາລະນະສຸກ 5 ປີ ຄັ້ງທີ IX(2021-2025) ແລະ ຍຸດທະສາດປະຕິຮູບສາທາລະນະສຸກໄລຍະ III ຊຶ່ງໄດ້ຜັນຂະຫຍາຍມະຕິກອງປະຊຸມໃຫ່ຍຂອງອົງຄະນະພັກກະຊວງມາເປັນແຜນງານ, ໂຄງການລະອຽດໃນຂະແໜງສາທາລະນະສຸກ ໂດຍສຸມໃສ່ປັບປຸງຄຸນນະພາບການບໍລິການສາທາລະນະສຸກ ແລະ ການບັນລຸຄາດໝາຍຕົວຊີ້ບອກຕ່າງໆຂອງບັນດາ 7 ແຜນງານ ລວມທັງ 11 ຕົວຊີ້ບອກທີ່ສະພາແຫ່ງຊາດໄດ້ຮັບຮອງ ຊຶ່ງມີຜົນສໍາເລັດຫຼາຍດ້ານ ເປັນຕົ້ນວຽກງານອະນາໄມ ແລະ ສົ່ງເສີມສຸຂະພາບ:ໄດ້ສຸມໃສ່ການຫັນປ່ຽນວິຖີດຳລົງຊີວິດ ແບບໃໝ່ຂອງປະຊາຊົນ ໃນການກິນສະອາດ, ດື່ມສະອາດ ແລະ ຢູ່ສະອາດ ດ້ວຍການປຸກລະດົມແຂ່ງຂັນກັນຂອງແຕ່ລະແຂວງສະໜອງນໍ້າ ແລະ ການຊົມໃຊ້ນໍ້າສະອາດ, ສ້າງວິດຖ່າຍຄອບຄົວ ແລະ ສະຖານທີ່ສາທາລະນະ. ໃນປີ 2025 ໄດ້ປະກາດແຂວງຊຸມຊົນເປັນເຈົ້າຕົນເອງດ້ານສຸຂານາໄມ ຫຼື ແຂວງຢຸດຕິການຖ່າຍຊະຊາຍ 17 ແຂວງ ແລະ ນະຄອນຫຼວງວຽງຈັນ,148 ເມືອງ,ທຸກບ້ານຕິດພັນກັບການສ້າງບ້ານພັດທະນາ;ຂະແໜງສາທາລະນະສຸກໄດ້ກຳນົດເອົາການສ້າງບ້ານສາທາລະນະສຸກແບບຢ່າງຊຶ່ງໄດ້ປະກາດຮັບຮອງແລ້ວໄດ້ 92% ຂອງບ້ານທັງໝົດ ແລະ ວຽກຈຸດສຸມການບໍລິການສຸຂະພາບຈະເລີນພັນ,ແມ່, ເດັກເກີດໃໝ່,ເດັກນ້ອຍ ແລະ ໄວໜຸ່ມ ເປັນຕົ້ນການໃຫ້ວັກຊິນກັນພະຍາດ, ການລົງຊຸກຍູ້ໃຫ້ແມ່ຍິງຖືພາໄດ້ມາກວດ-ຝາກທ້ອງ ແລະ ເກີດລູກຢູ່ສະຖານບໍລິການດ້ານສາທາລະນະສຸກ, ການແນະນໍາການມີໂພຊະນາການທີ່ດີທັງໃຫ້ວຽກງານໂຄສະນາສຸຂະສຶກສາ ໃຫ້ຄວາມຮູ້ແກ່ປະຊາຊົນ ບັນດາເຜົ່າໃນຂອບເຂດທົ່ວປະເທດຢ່າງແຂງແຮງ ໄດ້ເຮັດໃຫ້ 4 ຕົວຊີ້ບອກສາມາດບັນລຸໄດ້ແລ້ວ, ມີ 3 ຕົວຊີ້ບອກທີ່ອາດຈະສາມາດບັນລຸໄດ້ໃນທ້າຍປີ 2025, ມີ 2 ຕົວຊີ້ບອກທີ່ມີຄວາມທ້າທາຍສູງ ແຕ່ມີເງື່ອນໄຂຈະບັນລຸໄດ້ (ອັດຕາການເກີດລູກມີແພດຊ່ວຍ, ອັດຕາການໃຫ້ວັກຊິນກັນພະຍາດ) ແລະ ມີ 2 ຕົວຊີ້ບອກ ເຫັນວ່າເປັນສິ່ງທ້າທາຍ ແລະ ຍາກຫຼາຍ ອາດຈະບໍ່ສາມາດບັນລຸໄດ້ (ອັດຕາເດັກລຸ່ມ 5 ປີ ທີ່ມີນໍ້າໜັກຕໍ່າກວ່າມາດຕະຖານ ແລະ ມີລ່ວງສູງຕໍ່າ ກວ່າມາດຕະຖານ) ຊຶ່ງຫຼາຍແຂວງສາມາດບັນລຸໄດ້ໝົດ 11ຕົວຊີ້ບອກ. ການຄວບຄຸມຢາສູບ ໂດຍສະເພາະຢາສູບໄຟຟ້າ ແລະ ເຄື່ອງດື່ມທີ່ມີທາດເຫຼົ້າ ຕ້ອງໄດ້ເອົາໃຈໃສ່ປັບປຸງກົນໄກປະສານງານ ແລະ ການຄຸ້ມຄອງ ຂອງຄະນະກຳມະການ.ຄຽງຄູ່ກັນນັ້ນ, ວຽກງານກັນພະຍາດ ແລະ ຄວບຄຸມພະຍາດຕິດຕໍ່ໄລຍະຜ່ານມາສາມາດຄວບຄຸມການລະບາດຂອງພະຍາດໂຄວິດ-19,ແຕ່ພະຍາດດັ່ງກ່າວກໍຍັງບໍ່ທັນໝົດໄປຈາກໂລກນີ້ເທື່ອ. ດັ່ງນັ້ນ, ຈາກບົດຮຽນ ແລະປະສົບການການລະບາດໃຫຍ່ຄັ້ງນີ້, ຂະແໜງສາທາລະນະສຸກ ໄດ້ເອົາໃຈໃສ່ສ້າງຄວາມເຂັ້ມແຂງລະບົບເຝົ້າລະວັງພະຍາດ ທີ່ມີເຄືອຂ່າຍໃນຂອບເຂດທົ່ວປະເທດ,ໄດ້ສ້າງແຜນກຽມຄວາມພ້ອມເພື່ອຮັບມືທຸກເຫດການສຸກເສີນດ້ານສາທາລະນະສຸກ ແລະ ສະພາບການລະບາດຂອງພະຍາດທີ່ອາດເກີດຂຶ້ນ ໂດຍມີຫ້ອງປະຕິບັດການສຸກເສີນ ດ້ານສາທາລະນະສຸກ ທີ່ມີເຄືອຂ່າຍທົ່ວປະເທດ ແຕ່ສູນກາງຮອດຂັ້ນເມືອງ. ພ້ອມກັນນັ້ນ, ກໍໄດ້ຍົກລະດັບຄຸນນະພາບຫ້ອງວິເຄາະໃຫ້ສູງຂຶ້ນໃນຂັ້ນສູນກາງ ແລະ ແຂວງ ເພື່ອກວດວິເຄາະບົ່ງມະຕິພະຍາດ ທີ່ເກີດຂຶ້ນໃໝ່ ແລະ ພະຍາດລະບາດຕ່າງໆ. ສ້າງນັກລະບາດພາກສະໜາມໄດ້ 110ຄົນປະຈຳການຢູ່ທົ່ວປະເທດ ເພື່ອຊ່ວຍໃນການເຝົ້າລະວັງ ແລະ ໂຕ້ຕອບການລະບາດທີ່ເກີດຂຶ້ນໃນທ້ອງຖິ່ນ ໄດ້ຢ່າງວ່ອງໄວ, ມີປະສິດທິພາບ ແລະ ປະສິດທິຜົນ.ໃນ ປີ 2023, ອົງການອະນາໄມໂລກໄດ້ຮັບຮອງການປະກາດລຶບລ້າງພະຍາດຂາຊ້າງໃນ ສປປ ລາວ.
ທ່ານບຸນແຝງ ພູມມະໄລສິດ ໃຫ້ຮູ້ຕື່ມວ່າ: ປັດຈຸບັນພວມສຸມໃສ່ຈັດຕັ້ງປະຕິບັດແຜນການຫຼຸດຜ່ອນການເຈັບເປັນ ຍ້ອນພະຍາດມາລາເຣຍຊຶ່ງການເຈັບເປັນໄດ້ຫຼຸດລົງ 72% ຢູ່ຂັ້ນແຂວງ ແລະ 92% ຢູ່ຂັ້ນເມືອງ. ເມື່ອກ່ອນມີເຖິງ ລ້ານກວ່າກໍລະນີ ຫຼຸດລົງມາຍັງ 300 ກວ່າກໍລະນີ ໃນປີ 2024, ຄາດຄະເນຈະປະກາດລຶບລ້າງພະຍາດມາລາເຣຍ (ໄຂ້ປ່າ) ຊະນິດ Plasmodium Falciparum ໃຫ້ໄດ້ໃນປີ 2025 ແລະ ທຸກຊະນິດໃນປີ 2030. ນອກຈາກນັ້ນ, ໃນປີ 2030 ຍັງຈະສືບຕໍ່ສຸມໃສ່ ການຈັດຕັ້ງປະຕິບັດແຜນການລຶບລ້າງພະຍາດ ວັນນະໂຣກ, ພະຍາດເອດ, ພະຍາດໃບໄມ້ໃນເລືອດ ແລະ ພະຍາດວໍ້.ປັດຈຸບັນກໍາລັງສຸມໃສ່ການຄວບຄຸມໄຂ້ຍຸງລາຍ ທີ່ຍັງບັນຫາດ້ານສາທາລະນະສຸກ ຊຶ່ງຍັງມີການລະບາດທຸກໆປີ;ພາຍຫຼັງມີການລະບາດໃຫຍ່ ຊຶ່ງມີຄົນເຈັບ ແລະ ເສຍຊີວິດຈຳນວນຫຼາຍໃນຕົ້ນປີ 2013. ກະຊວງສາທາລະນະສຸກ ໄດ້ສືບຕໍ່ການຕອບໂຕ້ຕໍ່ການລະບາດ,ວາງຍຸດທະສາດ ແລະ ການປະຕິບັດ 5 ປ. ມາເຖິງ ປີ 2024, ຂະແໜງສາທາລະນະສຸກ ໄດ້ເພີ່ມມາດຕະການປ້ອງກັນຄວບຄຸມ ແລະ ແກ້ໄຂແຕ່ຫົວທີ;ທ່ານນາຍົກລັດຖະມົນຕີໄດ້ອອກຄຳສັ່ງຂອງ ເລກທີ 03/ນຍ ວ່າດ້ວຍການເພີ່ມທະວີການກັນ ແລະ ຄວບຄຸມໄຂ້ຍຸງລາຍແຕ່ຕົ້ນປີໂດຍເນັ້ນໃສ່ການມີສ່ວນຮ່ວມຂອງອົງການປົກຄອງທຸກຂັ້ນ ເຮັດໃຫ້ການຄວບຄຸມພະຍາດໄຂ້ຍຸງລາຍ ປະຕິບັດໄດ້ດີກວ່າປີຜ່ານມາໃນລະດັບດີສົມຄວນ. ໃນປີນີ້, ຍັງບໍ່ມີລາຍງານກໍລະນີເສຍຊີວິດ. ພ້ອມນັ້ນ, ວຽກງານວຽກງານປິ່ນປົວ ແລະ ຟື້ນຟູໜ້າທີ່ການ; ວຽກງານອາຫານ ແລະ ຢາ; ວຽກງານຄຸ້ມຄອງ, ພັດທະນາພະນັກງານ ແລະ ຄົ້ນຄວ້າວິທະຍາສາດ; ວຽກງານການເງິນສາທາລະນະສຸກ ແລະ ປະກັນສຸຂະພາບ; ວຽກບໍລິຫານຄຸ້ມຄອງ ແລະ ກວດກາ ກໍມີຜົນສໍາເລັດເປັນຢ່າງດີ.
ຄໍາເຫັນ