ອາການສາຍຕາສັ້ນ ກຳລັງກາຍເປັນບັນຫາສຸຂະພາບລະດັບໂລກ. ໂດຍຜົນການຄົ້ນຄວ້າພົບວ່າ: ເດັກນ້ອຍຫຼາຍລ້ານຄົນມີທ່າອ່ຽງທີ່ຈະກາຍເປັນຄົນສາຍຕາສັ້ນພາຍໃນປີ 2050, ໂດຍປັດຈຸບັນມີເດັກນ້ອຍປະມານ 1 ໃນ 3 ຄົນ ມີບັນຫາການເບິ່ງເຫັນ.
ນັກຄົ້ນຄວ້າຍັງກ່າວວ່າ: ການລັອກດາວຈາກການລະບາດຂອງພະຍາດໂຄວິດ-19 ທົ່ວໂລກ ເປັນໜຶ່ງໃນປັດໄຈສຳຄັນທີ່ເຮັດໃຫ້ສາຍຕາຂອງເດັກນ້ອຍເສື່ອມໂຊມລົງ. ເນື່ອງຈາກການລັອກດາວເປັນເວລາດົນ ເຮັດໃຫ້ເດັກນ້ອຍຫຼາຍລ້ານຄົນໃຊ້ເວລກັບໜ້າຈໍຫຼາຍຂຶ້ນ ແລະໃຊ້ເວລາອອກໄປເຮັດກິດຈະກຳກາງແຈ້ງໜ້ອຍລົງ.
ສຳລັບພາກພື້ນທີ່ມີອັດຕາເດັກນ້ອຍສາຍຕາສັ້ນຫຼາຍທີ່ສຸດຄື: ອາຊີ ໂດຍເດັກນ້ອຍໃນຍີ່ປຸ່ນສາຍຕາສັ້ນ 85%, ເດັກນ້ອຍໃນ ສ ເກົາຫຼີ ສາຍສັ້ນ 73%, ເດັກນ້ອຍໃນຈີນ ແລະ ຣັດເຊຍ ມີຫຼາຍກວ່າ 40% ທີ່ສາຍຕາສັ້ນ.
ຜົນການຄົ້ນຄວ້າຍັງພົບວ່າ: ກຸ່ມຂອງເດັກນ້ອຍຜູ້ຍິງ ແລະໄວໜຸ່ມເພດຍິງ ຈະມີອັດຕາສາຍຕາສັ້ນສູງກວ່າເດັກນ້ອຍຜູ້ຊາຍ ເພາະພວກເຂົາມີທ່າອ່ຽງຈະໃຊ້ເວລາເຮັດກິດຈະກຳກາງແຈ້ງໜ້ອຍກວ່າ ທັງຢູ່ໂຮງຮຽນ ແລະ ຢູ່ເຮືອນ.ການທີ່ຜູ້ຍິງເຂົ້າສູ່ໄວຈະເລີນພັນໄວ ກໍຍິ່ງເຮັດໃຫ້ພວກເຂົາມີທ່າອ່ຽງທີ່ຈະສາຍຕາສັ້ນຕັ້ງແຕ່ອາຍຸຍັງນ້ອຍດ້ວຍເຊັ່ນກັນ.
ຄໍາແນະນໍາຂອງນັກຄົ້ນຄວ້າໃນປະເທດອັງກິດ ລະບຸວ່າ: ເພື່ອຊ່ວຍໃຫ້ເດັກນ້ອຍບໍ່ຕ້ອງສາຍຕາສັ້ນຕັ້ງແຕ່ອາຍຸຍັງນ້ອຍ ກໍຄືການໃຫ້ເດັກນ້ອຍອອກໄປໃຊ້ເວລາເຮັດກິດຈະກຳນອກເຮືອນຢ່າງໜ້ອຍ 2 ຊົ່ວໂມງ ໂດຍສະເພາະເດັກນ້ອຍໃນອາຍຸລະຫວ່າງ 7-9 ປີ ເພື່ອຊ່ວຍຫຼຸດໂອກາດທີ່ເດັກນ້ອຍຈະສາຍຕາສັ້ນ. ນອກຈາກນັ້ນ, ພໍ່ແມ່ຄວນພາລູກໆໄປກວດວັດແທກສາຍຕາຕັ້ງແຕ່ອາຍຸປະມານ 7-10 ປີ, ໂດຍສະເພາະຖ້າຄົນໃນຄອບຄົວມີປະຫວັດເປັນຄົນສາຍຕາສັ້ນ ນັ້ນໝາຍຄວາມວ່າລູກຂອງພວກເຂົາອາດຈະມີໂອກາດສາຍຕາສັ້ນໄດ້ຫຼາຍກວ່າຄົນອື່ນເຖິງ 3 ເທົ່າ,ໂດຍອັດຕາຂອງຜູ້ທີ່ສາຍຕາສັ້ນທີ່ເພີ່ມຂຶ້ນສູງ ອາດຈະສົ່ງຜົນເຮັດໃຫ້ຈໍານວນຂອງຜູ້ອາຍຸສູງທີ່ມີອາການສາຍຕາຜິດປົກກະຕິເພີ່ມຂຶ້ນໄປນຳດ້ວຍ.
ຄໍາເຫັນ