 |
ທ່ານ ເຈີນ ຊຽງຫົງ ເລຂາໜ່ວຍພັກ ສູນເຕັກໂນໂລຢີອຸປະກອນຊ່ວຍເຫຼືອຟື້ນຟູ ແຂວງຢຸນນານ ໄດ້ມີຄໍາເຫັນວ່າ: ການເປີດໂຄງການປະສານໃຈຢູນນານ ຊ່ວຍເຫຼືອຜູ້ສູງອາຍຸ ແລະ ຄົນພິການດ້ວຍອຸປະກອນຊ່ວຍຟື້ນຟູລາວ ຢູ່ແຂວງຫຼວງພະບາງຄັ້ງນີ້ ປະກອບມີ: ລໍ້ເລື່ອນນັ່ງ, ແຂນ-ຂາທຽມ, ໄມ້ຄໍ້າເທົ້າ, ໄມ້ຄ້ອນເທົ້າ ແລະ ອຸປະກອນຊ່ວຍອື່ນໆ ໃຫ້ແກ່ຜູ້ຮັບຜິດຊອບການດູແລຜູ້ສູງອາຍຸ ແລະ ຄົນພິການ, ໂດຍມີເປົ້າໝາຍເພື່ອຍົກສູງຄຸນນະພາບຊີວິດ ແລະ ສົ່ງເສີມການມີສ່ວນຮ່ວມໃນສັງຄົມ.
 |
ຈາກນັ້ນ, ທ່ານ ວົງສະຫວັນ ເທບພະຈັນ ໄດ້ສະແດງຄວາມຂອບໃຈຢ່າງສູງ ຕໍ່ພັກ ແລະ ລັດຖະບານ ສປ ຈີນ ໃນການຊ່ວຍຍົກລະດັບ ວຽກງານສາທາລະນະສຸກຂອງແຂວງຫຼວງພະບາງ ຢ່າງມີປະສິດທິຜົນ, ທັງໄດ້ຕີລາຄາສູງ ຕໍ່ການຈັດພິທີເປີດໂຄງການ “ໃຈປະສານໃຈຢຸນນານ” ໃນຄັ້ງນີ້ ເປັນສັນຍາລັກ ແຫ່ງການເສີມສ້າງສາຍພົວພັນມິດຕະພາບ ຂອງປະຊາຊົນສອງປະເທດ. ການຊ່ວຍເຫຼືອຄັ້ງນີ້, ເປັນການປະກອບສ່ວນອັນສຳຄັນ ເຮັດໃຫ້ຜູ້ສູງອາຍຸ ແລະ ຄົນພິການ ໄດ້ຮັບການຊ່ວຍເຫຼືອ ແບ່ງເບົາສິ່ງແບກຫາບຈຳນວນໜຶ່ງ, ທັງເປັນກິດຈະກໍາທີ່ສະແດງໃຫ້ເຫັນເຖິງ ໝາກຜົນຂອງການປະຕິບັດຕາມທິດ 4 ດີ ແລະ ຄູ່ຮ່ວມສະຕາກຳລາວ-ຈີນ ທີ່ການນຳຂອງປະເທດ ໄດ້ຕົກລົງຮ່ວມກັນໃຫ້ປະກົດຜົນເປັນຈິງ.
 |
ໂຄງການນີ້, ໄດ້ຮັບການສະໜັບສະໜຸນຈາກ ສະມາຄົມມິດຕະພາບປະຊາຊົນ ແຂວງຢຸນນານ ກັບຕ່າງປະເທດ, ສູນເຕັກໂນໂລຢີອຸປະກອນຊ່ວຍເຫຼືອ ຟື້ນຟູແຂວງຢຸນນານ, ບໍລິສັດ ປັກກິ່ງ ຟູຢູທຽນຊຶ່ງ ຜະລິດເຄື່ອງມືການແພດ ຈໍາກັດ, ບໍລິສັດ ເທ້ຍນຈິນ ເທ້ສຕ໌ ອັນສະຕຣູເມນ ຈໍາກັດ, ບໍລິສັດ ຈັງຊາ ໂວຜິງ ອຸປະກອນການແພດ ຈໍາກັດ. ຕອນທ້າຍ ບັນດາຜູ້ເຂົ້າຮ່ວມ ໄດ້ເປີດໂຄງການຢ່າງເປັນທາງການ ແລະ ມອບອຸປະກອນ ໃຫ້ກັບຜູ້ອາຍຸສູງ ແລະ ຄົນພິການ ພ້ອມທັງຢ້ຽມຢາມ ການນຳໃຊ້ອຸປະກອນການແພດຂອງໂຮງໝໍ ຈີນ-ຫຼວງພະບາງ.
(ຂ່າວ-ພາບ: ທະນູສິນ ອິດທິພົນ)
ຄໍາເຫັນ