ສຳນັກຂ່າວ Yonhap ລາຍງານໂດຍອ້າງອີງຂໍ້ມູນຂອງຫ້ອງການສະຖິຕິຂອງສເກົາຫຼີວ່າ: "ຄູ່ແຕ່ງດອງໃໝ່" ຫຼືຕາມຄຳນິຍາມຂອງ ສ ເກົາຫຼີແມ່ນຄູ່ຮັກທີ່ແຕ່ງດອງກັນເປັນເວລາ 5 ປີຫຼືໜ້ອຍກວ່ານັ້ນຫຼຸດລົງຈາກ 1.03 ລ້ານຄູ່ໃນປີ 2022 ເຫຼືອພຽງ 974.000 ຄູ່ໃນປີ 2023 ແລະເກືອບເຄິ່ງໜຶ່ງໃນຈຳນວນນີ້ບໍ່ມີລູກ.
ນີ້ຖືວ່າແມ່ນຄັ້ງທຳອິດທີ່ຈຳນວນຄູ່ແຕ່ງດອງໃໝ່ຢູ່ສເກົາຫຼີຫຼຸດລົງຕ່ຳກວ່າ 1 ລ້ານຄູ່ ນັບຕັ້ງແຕ່ຫ້ອງການສະຖິຕິສເກົາຫຼີ ເລີ່ມບັນທຶກສະຖິຕິໃນປີ 2015, ໂດຍຈຳນວນທີ່ຫຼຸດລົງເລື້ອຍໆຕັ້ງແຕ່ 1,47 ລ້ານຄູ່ໃນປີ 2015 ມາເປັນ 1,32 ລ້ານຄູ່ໃນປີ 2018 ແລະ 1,18 ລ້ານຄູ່ໃນປີ 2020 ໝາຍຄວາມວ່າຈຳນວນທີ່ຫາຍໄປສະເລ່ຍ 50,000 ຫາ 80,000 ຄູ່ຕໍ່ປີ.ເຖິງແມ່ນວ່າພາບລວມຈະຫຼຸດລົງ ແຕ່ຈໍານວນຄູ່ຜົວເມຍໃນປີທໍາອິດຂອງການແຕ່ງດອງເພີ່ມຂຶ້ນ, ໂດຍໃນປີ 2023 ມີການແຕ່ງດອງໃໝ່ 191,175 ຄູ່ຊຶ່ງຫຼາຍກວ່າປີກ່ອນ 2,9%, ແນວໃດກໍຕາມ, ເຈົ້າໜ້າທີ່ຊີ້ໃຫ້ເຫັນວ່າ ການເພີ່ມຂຶ້ນແມ່ນເປັນຜົນມາຈາກການແຕ່ງດອງທີ່ຖືກເລື່ອນມາຈາກໄລຍະການລະບາດຂອງ ໂຄວິດ-19.
ຂໍ້ມູນຍັງຊີ້ໃຫ້ເຫັນວ່າ: ໃນຈຳນວນຄູ່ທີ່ແຕ່ງດອງກັນໃນປີ 2023 ມີເຖິງ 47.5% ທີ່ບໍ່ມີລູກ, ເພີ່ມຂຶ້ນຈາກປີກ່ອນໜ້ານັ້ນ 1.1%.
ທັງນີ້, ສ ເກົາຫຼີ ພວມປະເຊີນກັບບັນຫາອັດຕາການເກີດຕໍ່າ ແລະປະຊາກອນຜູ້ອາຍຸສູງ. ໂດຍຄົນໄວໜຸ່ມສາວຈໍານວນຫຼາຍມັກຈະເລື່ອນເວລາ ຫຼືຍອມແພ້ກັບການແຕ່ງດອງ ຫຼືການມີລູກ. ຍ້ອນການປ່ຽນແປງຂອງຄ່ານິຍົມທາງສັງຄົມ ແລະ ການດຳລົງຊີວິດ ລວມທັງບັນຫາຄ່າເຮືອນທີ່ສູງຂຶ້ນ, ຕະຫຼາດແຮງງານ ແລະ ເສດຖະກິດມີຄວາມຫຍຸ້ງຍາກຂຶ້ນ.
ໃນປີ 2023, ອັດຕາການຈະເລີນພັນຂອງ ສ ເກົາຫຼີຫຼື ໂຕເລກລະບຸວ່າແມ່ຍິງຄົນໜຶ່ງຈະມີລູກຈັກຄົນໃນຕະຫຼອດຊີວິດຫຼຸດລົງເຫຼືອພຽງແຕ່ 0.72 ຕໍ່າທີ່ສຸດນັບຕັ້ງແຕ່ປີ 1970 ແລະຕໍ່າກວ່າຄ່າເປົ້າ ໝາຍ ທີ່ 2.1 ຊຶ່ງຈະເຮັດໃຫ້ປະຊາກອນ ສ ເກົາຫຼີຄົງຢູ່ທີ່ 52 ລ້ານຄົນ.
ຄໍາເຫັນ