ທ່ານນາງ ແສງອາພອນ ແກ້ວບົວໂຮມ ຮອງເລຂາພັກເມືອງ ປະທານຄະນະກໍາມະການຈັດງານເທດສະ ການບຸນກອງເຂົ້າໃຫຍ່ປະຈໍາປີ 2024 ໄດ້ຖະແຫຼງຂ່າວຕໍ່ສື່ມວນຊົນແຂວງໄຊຍະບູລີໃນວັນທີ 18 ທັນວາຜ່ານມາ, ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ ) ແຂວງວ່າ: ການຈັດງານເທດສະ ການບຸນກອງເຂົ້າໃຫຍ່ປະຈໍາປີ 2024 ເມືອງພຽງຈະເລີ່ມແຕ່ວັນທີ 6 ມັງກອນ 2024 ມີກິດຈະກໍາປະເພນີເຕົ້າໂຮມເຂົ້າເປືອກ-ເຂົ້າສານຂອງປະຊາຊົນໃນທົ່ວເມືອງ, ຕອນຄໍ່າຂອງວັນທີ 7 ມັງກອນ 2024 ແມ່ນການແຂ່ງຂັນກອງ ຫາງ ແລະ ກອງງາມ, ໃນວັນທີ 8 ມັງກອນ 2024 ແມ່ນກິດຈະກໍາແຫ່ເຂົ້າເປືອກ-ເຂົ້າສານ, ຕົ້ນກາລະພຶກ, ຕອນຄໍ່າມີການປະກວດທິດາກອງເຂົ້າໃຫຍ່ປະຈໍາປີ 2024 ຊຶ່ງມີນາງສາວເຂົ້າປະກວດທັງໝົດ 19 ຄົນ, ໃນວັນທີ 9 ມັງກອນຈະມີພິທີເປີດງານເທດສະການຢ່າງເປັນທາງການ. ໃນພິທີດັ່ງກ່າວບັນດາທ່ານແຂກຈະໄດ້ຊົມກ້ອນແຫ່ມວນຊົນຈຳນວນ 20 ກ້ອນ, ມີຈຳນວນພົນປະມານ 3.500 ຄົນ, ກ້ອນສະແດງບັນດາເຜົ່າ 2 ກ້ອນຈຳນວນພົນ 250 ຄົນ, ຈາກນັ້ນມີກິດຈະກຳກອງເຂົ້າໃຫຍ່, ກິດຈະກໍາຟາດເຂົ້າພື້ນເມືອງ, ຄົກຕຳເຂົ້າພື້ນເມືອງ, ຊົມວິຖີການດຳລົງຊີວິດຂອງເຜົ່າຕອງເຫຼືອງ, ຊົມກິດຈະກໍາຕະຫຼາດນັດສິນຄ້າໂອດັອບ, ຕະຫຼາດນັດເຄື່ອງໃຊ້ສອຍ, ຊົມການປະກວດອາຫານພື້ນເມືອງ, ກິລາພື້ນເມືອງ ແລະ ກິລາມວນຊົນ, ໃນວັນທີ 10 ມັງກອນ ຈະມີພິທີສູ່ຂັວນເຂົ້າມີພະສົງ 19 ອົງ, ແຕ່ລະຄືນຈະມີກິດຈະກຳການສະແດງສິລະປະ-ວັນນະຄະດີທັງໝົດ 8 ຄະນະ ແລະ ຮັບຊົມນັກຮ້ອງສຽງດີ ທັງຄົບງັນມ່ວນຊື່ນຕາມປະເພນີ, ໃນຕອນເຊົ້າຂອງວັນທີ 12 ມັງກອນຈະມີພິທີໃສ່ບາດ ຖວາຍສັງຄະທານໃຫ້ແກ່ພະສົງສໍາມະເນນ. ສະນັ້ນ, ຂ້າພະເຈົ້າຕາງໜ້າອົງການປົກຄອງເມືອງພຽງ ກໍຄືຄະນະປະທານຈັດງານເທດສະການບຸນກອງເຂົ້າໃຫຍ່ເມືອງພຽງ ຂໍເຊີນຊວນບັນດາທ່ານ, ແຂກທີ່ມີກຽດທັງພາຍໃນ ແລະ ຕ່າງປະເທດ ທີ່ມີເງື່ອນໄຂສະດວກໃຫ້ເຂົ້າມາທ່ອງທ່ຽວເມືອງພຽງ ຊຶ່ງເປັນເມືອງອູ່ເຂົ້າອູ່ປາ ທົ່ງນາກວ້າງ ຮວງເຂົ້າໃຫຍ່ ປ່າໄມ້ດົກໜາ ໄມ້ແຕ້ຄ່າພັນປີ ວັດທະນະທຳຫຼາຍສີສັນ ປະຊາຊົນດຸໝັ່ນ ທ້າຍນີ້ຂໍອວຍພອນບັນດາທ່ານ ຈົ່ງມີສຸຂະພາບແຂງແຮງ ແລະ ເດີນທາງມາທ່ຽວເມືອງພຽງ ແຂວງໄຊຍະບູລີຂອງພວກເຮົາ. ຂ່າວ+ພາບ: ບຸນທີ
ຕັ້ງໜ້າສົ່ງເສີມພັດທະນາອຸດສາຫະກໍາການທ່ອງທ່ຽວຢູ່ ສປປ ລາວ ໃນຕໍ່ໜ້າ
ບົນພື້ນຖານຜົນສໍາເລັດຢ່າງໜ້າເພິ່ງພໍໃຈຂອງການພັດທະນາອຸດສາຫະກໍາການທ່ອງ
ທ່ຽວ ສົມທົບກັບທ່າແຮງຊັບພະຍາກອນທໍາມະຊາດທີ່ມີຄວາມອຸດົມສົມບູນ ແລະ ຄວາມຮັ່ງມີດ້ານວັດທະນະທໍາທີ່ຫຼາກຫຼາຍຂອງປະຊາຊົນບັນດາເຜົ່າຢູ່ປະເທດລາວເຮົາ. ພາຍໃຕ້ເງື່ອນໄຂ ແລະ ທ່າອ່ຽງຂອງການທ່ອງທ່ຽວໂລກ ແລະ ພາກພື້ນ ພວມມີການຂະຫຍາຍຕົວຢ່າງແຂງແຮງ, ອັນໄດ້ສ້າງກາລະໂອກາດໃຫ້ແກ່ການພັດທະນາການທ່ອງທ່ຽວຢູ່ປະເທດເຮົາໃນຕໍ່ໜ້າ.
ຄໍາເຫັນ