 |
ທ່ານ ນາງ ໃບຄໍາ ຂັດທິຍະ ກ່າວວ່າ: ໃນໄລຍະ 1 ປີຜ່ານມາ, ພາຍໃຕ້ການຊີ້ນໍາ-ນໍາພາຂອງສູນກາງພັກ, ລັດຖະບານ, ສະພາແຫ່ງຊາດ ເວົ້າລວມ, ເວົ້າສະເພາະ ແມ່ນຄະນະພັກ, ຄະນະນໍາກະຊວງສາທາລະນະສຸກ, ອົງການປົກຄອງທ້ອງຖິ່ນ ບວກກັບຄວາມຮັບຜິດຊອບຂອງຜູ້ບໍລິຫານ, ບຸກຄະລາກອນສາທາລະນະສຸກທັງສູນກາງ ແລະ ທ້ອງຖິ່ນ ດ້ວຍການປະກອບສ່ວນຢ່າງເປັນເຈົ້າການຂອງສັງຄົມ ທັງພາກລັດ ແລະ ພາກທຸລະກິດ ສົມທົບແໜ້ນກັບການສະໜັບສະໜູນຂອງບັນດາປະເທດເພື່ອນມິດ, ອົງການ ຈັດຕັ້ງສາກົນ, ຄູ່ຮ່ວມພັດທະນາ ຈຶ່ງເຮັດໃຫ້ການຈັດຕັ້ງປະຕິບັດແຜນພັດທະນາສາທາລະນະສຸກໄລຍະ 5 ປີຜ່ານມາ ຕົ້ນຕໍແມ່ນປີ 2025 ສາມາດດໍາເນີນດ້ວຍຜົນສໍາເລັດຕາມຄາດໝາຍທີ່ການົດໄວ້. ສຸມໃສ່ຈັດຕັ້ງປະຕິບັດ 7 ແຜນງານໃຫຍ່, ແຜນງານຍ່ອຍຕາມສາຍແຜນງານ ແລະ ໂຄງການຈຸດສຸມ, 11 ຕົວຊີ້ບອກຂອງຂະແໜງການ, ການບໍລິການປິ່ນປົວສຸຂະພາບມີການພັດທະນາ ແລະ ມີຄຸນນະພາບດີຂຶ້ນເທື່ອລະກ້າວ ສາມາດຄວບຄຸມການລະບາດຂອງພະຍາດຕາມລະດູການໄດ້ເປັນຢ່າງດີ, ການຄວບຄຸມອັດຕາການເສຍຊີວິດຂອງແມ່ ແລະ ເດັກ ສາມາດບັນລຸໄດ້ຕາມຄາດໝາຍທີ່ວາງໄວ້. ລວມທັງພື້ນຖານໂຄງລ່າງ, ຕາໜ່າງສາທາລະນະສຸກ ກໍໄດ້ຮັບການຍົກລະດັບ ແລະ ປັບປຸງໃຫ້ມີຄຸນນະພາບດີຂຶ້ນເທື່ອລະກ້າວ.
ກອງປະຊຸມຄັ້ງນີ້, ບັນດາຜູ້ເຂົ້າຮ່ວມໄດ້ຮັບຟັງສະຫຼຸບການຈັດຕັ້ງແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025) ແລະ ແຜນພັດທະນາສາທາລະນະສຸກ 5 ປີ ຄັ້ງທີ X (2026-2030), ສະ ຫຼຸບການຈັດຕັ້ງປະຕິບັດວຽກງານສາທາລະນະສຸກປີ 2025 ແລະ ແຜນພັດທະນາສາທາລະນະສຸກປະຈຳປີ 2026, ຊຶ່ງປັດໄຈສໍາຄັນແມ່ນຈະໄດ້ພ້ອມກັນເອກະພາບສູງຕໍ່ຂໍ້ຄົງຄ້າງ ແລະ ສິ່ງທ້າທາຍຂອງຂະແໜງ ການ ເພື່ອເປັນບ່ອນອີງໃຫ້ການກຳນົດທິດທາງແກ້ໄຂໃນຕໍ່ໜ້າ. ການຫັນເປັນເຈົ້າຕົນເອງເທື່ອລະກ້າວຂອງຂະແໜງສາທາລະນະສຸກ ຕາມທິດການສ້າງເສດຖະກິດເອກະລາດ ເປັນເຈົ້າຕົນເອງຂອງພັກ, ຜົນສໍາເລັດ ແລະ ສິ່ງທ້າທາຍໃນການບໍລິການປິ່ນປົວສຸຂະພາບຂອງພາກລັດ ແລະ ເອກະຊົນໃນຂອບເຂດທົ່ວປະເທດ, ປັບປຸງລະບົບການສ້າງ ແລະ ພັດທະນາບຸກຄະລາກອນເຂົ້າຕຳແໜ່ງງານຕ່າງໆ, ການປັບປຸງວຽກງານການຈັດຊື້, ຈັດຫາຢາ, ອຸປະກອນການແພດ, ການຈັດຕັ້ງປະຕິບັດການຫັນໂຮງໝໍກຸ້ມຕົນເອງ, ການຄຸ້ມຄອງສະຖານທີ່ປິ່ນປົວທີ່ທັນສະໄໝ (HIMS) ຊຶ່ງເຫັນວ່າບັນດາເນື້ອໃນຕ່າງໆ ທີ່ໄດ້ນໍາສະເໜີ ແລະ ປຶກສາຫາລືກັນໃນກອງປະຊຸມຄັ້ງນີ້, ລ້ວນແລ້ວແຕ່ມີຄວາມໝາຍສໍາຄັນຫຼາຍ, ເປັນເນື້ອໃນໃຈກາງຂອງການພັດທະນາ, ການຄຸ້ມຄອງ ແລະ ຊຸກຍູ້ການພັດທະນາວຽກງານຂອງຂະແໜງສາທາລະນະສຸກໃນປັດຈຸບັນ ແລະ ອະນາຄົດ.
 |
ເພື່ອຮັບປະກັນຄຸນນະພາບຂອງການປຶກສາຫາລື, ເພື່ອລະດົມແນວຄວາມຄິດຈາກບຸກຄະລາກອນທົ່ວຂະແໜງສາທາລະນະສຸກຢ່າງກວ້າງຂວາງ. ກອງປະຊຸມ, ໄດ້ມີການຈັດແບ່ງກຸ່ມເພື່ອຄົ້ນຄວ້າສົນທະນາຕາມຫົວຂໍ້ທີ່ໄດ້ກຳນົດໄວ້, ບັນດາຫົວຂໍ້ວິຊາການທີ່ສົນທະນາໃນກຸ່ມນັ້ນ ລ້ວນແຕ່ແມ່ນຈຸດສຸມທີ່ຂະແໜງສາທາລະນະສຸກຕ້ອງໄດ້ສ້າງການຫັນປ່ຽນຢ່າງແຂງແຮງ ເລິກເຊິ່ງ ຮອບດ້ານ ເພື່ອແກ້ໄຂບັນຫາທີ່ທ້າທາຍ ແລະ ພ້ອມກັນກ້າວຂຶ້ນໄປຕາມທິດກອງປະຊຸມໃຫຍ່ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X, ມະຕິກອງປະຊຸມໃຫຍ່ຜູ້ແທນອົງຄະນະພັກກະຊວງສາທາລະນະສຸກ ຄັ້ງທີ X ແລະ ແຜນພັດທະນາວຽກງານສາທາລະນະສຸກ 5 ປີ ຄັ້ງທີ X (2026-2030). ກອງປະຊຸມຄັ້ງນີ້, ຍັງຈະໄດ້ຮັບຟັງຄໍາເຫັນຊີ້ນໍາຂອງການນໍາຂັ້ນສູງເພື່ອເປັນທິດຊີ້ນໍາໃຫ້ການເຄື່ອນໄຫວວຽກງານສາທາລະນະສຸກໃນປີ 2026 ແລະ ຊຸມປີຕໍ່ໜ້າ.
ຂ່າວ-ພາບ: ວັນເພັງ
ຄໍາເຫັນ