ສະຫຼຸບວຽກງານສາທາລະນະສຸກຮອບດ້ານໄລຍະ 9 ເດືອນ ປີ 2023

ພະແນກສາທາລະນະສຸກ ແຂວງສາລະວັນ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານສາທາລະນະສຸກຮອບດ້ານ ໄລຍະ 9 ເດືອນ ປີ 2023 ທີ່ສະໂມສອນຂອງເມືອງເລົ່າງາມ ເມື່ອບໍ່ດົນມານີ້  ໂດຍການເປັນປະທານ ຂອງ ທ່ານ  ອາຄົມ ລໍ່າວິຈິດກໍາມະການພັກແຂວງຫົວໜ້າພະແນກສາທາລະນະສຸກແຂວງສາລະວັນ, ມີທ່ານຮອງເຈົ້າເມືອງ, ຜູ້ຊີ້ນໍາວຽກງານວັດທະນະທໍາ - ສັງຄົມ ແລະ ກໍາມະການພັກເມືອງ, ຫົວໜ້າ - ຮອງຫົວໜ້າຫ້ອງການສາທາລະນະສຸກ 8 ຕົວເມືອງຂອງແຂວງ ເຂົ້າຮ່ວມ.
    ທ່ານ ນາງ  ບຸນໂຮມ ໂງ່ນກະເສີມສຸກ ຮອງຫົວໜ້າພະແນກສາທາລະນສຸກແຂວງ ຜ່ານບົດສະຫຼຸບການຈັດຕັ້ງປະຕິບັດວຽກງານ ສາທາລະນະສຸກຮອບດ້ານ ໄລຍະ 9 ເດືອນຜ່ານມາ ແລະ ວາງແຜນຈຸດສຸມ 3 ເດືອນທ້າຍປີ 2023 ໃນນີ້ໄດ້ຕີລາຄາຄວາມຄືບໜ້າໃນການຈັດຕັ້ງປະຕິບັດ 11 ຕົວຊີ້ບອກ ຂອງກະຊວງສາທາລະນະສຸກ ຮັບຮອງໃນໄລຍະ 9 ເດືອນ ປີ 2023. ພະແນກສາທາລະນະສຸກແຂວງສາລະວັນ ສາມາດຈັດຕັ້ງປະຕິບັດ ການ
ເຄື່ອນໄຫວວຽກງານສາທາລະນະສຸກ ຮອບດ້ານໃນ 8 ຕົວເມືອງ ບັນລຸ 11 ຕົວຊີ້ບອກ ຄື ອັດຕາເດັກນ້ອຍລຸ່ມ 5 ປີ ນໍ້າໜັກຫຼຸດມາດຕະຖານ, ອັດຕາເດັກລຸ່ມ 5 ປີ ລວງສູງບໍ່ໄດ້ມາດຕະຖານ, ອັດຕາການຕາຍຂອງເດັກລຸ່ມ 1 ປີ, ອັດຕາການຕາຍຂອງເດັກລຸ່ມ 5 ປີ, ອັດຕາການຕາຍຂອງແມ່, ອັດຕາການເກີດລູກມີແພດຊ່ວຍເກີດ,  ອັດຕາການໃຫ້ວັກຊິນກັນພະຍາດ, ອັດຕາການຊົມໃຊ້ນໍ້າສະອາດ, ອັດຕາຊົມໃຊ້ວິດຖ່າຍ, ອັດຕາປົກຄຸມດ້ວຍປະກັນສຸຂະພາບ, ແລະ ອັດຕາການຮັບຮອງບ້ານສາທາລະນະສຸກແບບຢ່າງໃຫ້ມີຜົນສໍາເລັດ ແລະ ບັນລຸຄາດໝາຍທີ່ວາງໄວ້.  
 ຜົນສໍາເລັດອັນພົ້ນເດັ່ນໃນ 9 ເດືອນ ປີ 2023 ຂອງ 8 ແຜນງານ ໄດ້ສຸມໃສ່ການເຄື່ອນໄຫວ ແຜນງານອະນາໄມ ແລະ ສົ່ງເສີມສຸຂະພາບ. ໄດ້ຝຶກອົບຮົົມການຄຸ້ມຄອງບໍລິຫານວຽກງານໃຫ້ວັກຊິນກັນພະຍາດ ໃຫ້ວິຊາການຂັ້ນເມືອງ ແລະ ຫ້ອງການສາທາລະນະສຸກໃນ 8 ຕົວເມືອງທົ່ວແຂວງ, ແຜນງານກັນພະຍາດ ແລະ ຄວບຄຸມພະຍາດຕິດຕໍ່ໃຫ້ສູນບໍລິການຂັ້ນແຂວງ 4 ແຫ່ງໃນ 8 ຕົວເມືອງ, 73 ໂຮງໝໍນ້ອຍ, 591 ບ້ານເປົ້າໝາຍ, ການລະບາດຂອງພະຍາດໄຂ້ຍຸງລາຍໄລຍະ 9 ເດືອນ ປີ 2023 ທົ່ວແຂວງມີກໍລະນີໄຂ້ຍຸງລາຍສະສົມທັງໝົດ 735 ກໍລະນີ, ແຕ່ບໍ່ມີຜູ້ເສຍຊີວິດ. ແຜນງານປິ່ນປົວ ແລະ ຟື້ນຟູໜ້າທີ່ການໄດ້ຝຶກອົບຮົມປັບປຸງຄຸນນະພາບສະຖານທີ່ບໍລິການໂຮງໝໍເມືອງ 7 ແຫ່ງ. ໄດ້ປະກາດບ້ານຢຸດຕິການຖ່າຍຊະຊາຍໄດ້ 3 ເມືອງຄື: ເມືອງລະຄອນເພັງ, ເມືອງວາປີ ແລະ ເມືອງຄົງເຊໂດນ ຈໍານວນ 213 ບ້ານ ແລະ ຄາດໝາຍໃນທ້າຍປີ 2023 ໃຫ້ໄດ້ປະກາດ 3 ເມືອງຢຸດຕິການຖ່າຍຊະຊາຍຕື່ຶມອີກ ຈໍານວນ 204 ບ້ານຄື: ເມືອງເລົ່າງາມ 97 ບ້ານ, ເມືອງຕະໂອ້ຍ 56 ບ້ານ ແລະ ເມືອງສະໝ້ວຍ 51 ບ້ານ. ແຜນງານຄຸ້ມຄອງພັດທະນາພະນັກງານ ແລະ ຄົ້ນຄວ້າວິທະຍາສາດສາທາລະນະສຸກ, ແຜນງານການເງິນສາທາລະນະສຸກ, ແຜນງານແຜນການການຮ່ວມມື ແລະ ຂໍ້ມູນຂ່າວສານສາທາລະນະສຸກ ແລະ ແຜນງານບໍລິຫານຄຸ້ມຄອງ ແລະ ກວດກາ ໃນການສຶກສາອົບຮົມການເມືອງ - ແນວຄິດ ໃຫ້ພະນັກງານສະມາຊິກພັກ ໃຫ້ກໍາແໜ້ນເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ. ການສ້າງແຜນຍຸດທະສາດ ແຜນການ, ແຜນງານ ໃນການບໍລິຫານວຽກງານໃຫ້ມີປະສິດທິພາບ ໃນການປະບັດໜ້າທີ່ວິຊາສະເພາະ ມີຈັນຍາບັນ ຈັນຍາທໍາຕໍ່ອາຊີບ ໃນການບໍລິການສັງຄົມ ແລະ ປະຊາຊົນ ໃນລະບຽບການ 5 ດີ, 1 ພໍໃຈ ໃຫ້ດີຂຶ້ນເທື່ອລະກ້າວ.
(ຂ່າວ - ພາບ:ພອນໄຊ ແກ້ວມະນີ )