 |
ກອງປະຊຸມຄັ້ງນີ້, ຈັດຂຶ້ນເພື່ອເປີດກວ້າງໃນການລະດົມຄໍາຄິດຄໍາເຫັນຈາກທຸກພາກສ່ວນທີ່ກ່ຽວຂ້ອງເຂົ້າໃສ່ຮ່າງດໍາລັດວ່າດ້ວຍກອງທຶນການທ່ອງທ່ຽວ, ຮ່າງດໍາລັດດັ່ງກ່າວ ແມ່ນນິຕິກຳລຸ່ມກົດໝາຍທີ່ມີຄວາມໝາຍຄວາມສຳຄັນຕໍ່ການສ້າງແຫຼ່ງລາຍຮັບຈາກການທ່ອງທ່ຽວ ສ່ວນໜຶ່ງເຂົ້າງົບປະມານແຫ່ງຊາດ ກໍຄື ກອງທຶນການທ່ອງທ່ຽວ ປະກອບສ່ວນເຂົ້າໃນການພັດທະນາ, ການໂຄສະນາ ແລະ ຄຸ້ມຄອງການທ່ອງທ່ຽວຂອງສປປ ລາວໃຫ້ມີການຂະຫຍາຍຕົວຢ່າງມີຄຸນນະພາບ ແລະ ມີຄວາມຍືນຍົງ.
ກອງທຶນການທ່ອງທ່ຽວໄດ້ເລີ່ມມາແຕ່ປີ 1989 ຕາມມະຕິຕົກລົງຂອງສະພາລັດຖະມົນຕີ ສະບັບເລກທີ 91/ປສລ, ລົງວັນທີ 4 ຕຸລາ 1989, ຕໍ່ມາປີ 2013 ກອງທຶນດັ່ງກ່າວໄດ້ຖືກກໍານົດເຂົ້າໃນກົດໝາຍທ່ອງທ່ຽວ ສະບັບປັບປຸງ ເລກທີ 32/ສພຊ, ລົງວັນທີ 24 ກໍລະກົດ 2013, ປີ 2017 ລັດຖະບານໄດ້ອອກດໍາລັດວ່າດ້ວຍກອງທຶນການທ່ອງທ່ຽວ ສະບັບເລກທີ 119/ລບ, ລົງວັນທີ 10 ເມສາ 2017 ແລະ ກອງທຶນດັ່ງກ່າວ, ຍັງຖືກກໍານົດໄວ້ໃນມາດຕາ 74, 75 ແລະ 76 ຂອງກົດໝາຍທ່ອງທ່ຽວສະບັບປັບປຸງ ເລກທີ 63/ສພຊ, ລົງວັນທີ 1 ກໍລະກົດ 2024 ມາເຖິງປັດຈຸບັນ. ເພື່ອຜັນຂະຫຍາຍກົດໝາຍດັ່ງກ່າວ ແລະ ປ່ຽນແທນດໍາລັດນາຍົກລັດຖະ ມົນຕີ ວ່າດ້ວຍກອງທຶນການທ່ອງທ່ຽວ ສະບັບເລກທີ 119/ລບ, ລົງວັນທີ 10 ເມສາ 2017 ໃຫ້ສອດຄ່ອງກັບສະພາບການປ່ຽນແປງ ແລະ ການຂະຫຍາຍຕົວຂອງການທ່ອງທ່ຽວໃນໄລຍະໃໝ່. ລັດຖະບານຈຶ່ງໄດ້ຄົ້ນຄວ້າຮ່າງດໍາລັດວ່າດ້ວຍກອງທຶນການທ່ອງທ່ຽວສະບັບນີ້ຂຶ້ນມາ ເພື່ອປະກາດໃຊ້ໃນໄລຍະອັນໃກ້ນີ້ ຊຶ່ງຮ່າງດໍາລັດສະບັບນີ້ໄດ້ຜ່ານກອງປະຊຸມສະໄໝສາມັນຂອງລັດຖະບານ ປະຈໍາເດືອນສິງຫາ 2025 ສໍາເລັດແລ້ວ ແລະ ເພື່ອເຮັດໃຫ້ຮ່າງດໍາລັດມີເນື້ອໃນອັນຄົບຖ້ວນ ແລະ ຮັດກຸມຂຶ້ນກວ່າເກົ່າ, ຄະນະຮັບຜິດຊອບກະຊວງ ວທ, ສຳນັກ ງານນາຍົກລັດຖະມົນຕີ, ກະຊວງຍຸຕິທຳ, ກະຊວງການເງິນ ແລະ ທະນາຄານແຫ່ງ ສປປ ລາວ ຈຶ່ງໄດ້ຮ່ວມກັນຈັດກອງປະຊຸມຂຶ້ນໃນວັນທີ 31 ຕຸລາ ແລະ ວັນທີ 14 ພະຈິກ 2025 ເພື່ອນໍາເອົາເນື້ອໃນຈິດໃຈຂອງກອງປະ ຊຸມລັດຖະບານສະໄໝສາມັນ ປະຈໍາເດືອນສິງຫາ 2025 ມາຄົ້ນຄວ້າ ແລະ ປັບປຸງຮ່າງດໍາລັດດັ່ງກ່າວສໍາເລັດ, ເພື່ອເຮັດໃຫ້ຮ່າງດໍາລັດສະບັບນີ້ມີເນື້ອໃນຄົບຖ້ວນ ແລະ ຮັດກຸມຂຶ້ນກວ່າເກົ່າ ກ່ອນຈະນຳສະເໜີຂໍອະນຸມັດຈາກລັດຖະບານ ແລະ ປະກາດໃຊ້ຢ່າງເປັນທາງ, ຄະນະຮັບຜິດຊອບຈຶ່ງໄດ້ຈັດກອງປະຊຸມນີ້ຂຶ້ນອີກເທື່ອໜຶ່ງ ເພື່ອໃຫ້ທຸກພາກສ່ວນທີ່ກ່ຽວຂ້ອງ ມີສ່ວນຮ່ວມບົນພື້ນຖານຫຼັກການຂອງກົດໝາຍ, ລະບຽບການທີ່ກ່ຽວຂ້ອງ ແລະ ເນື້ອໃນຈິດໃຈຂອງກອງປະຊຸມລັດຖະບານ.
ຂ່າວ-ພາບ: ວຽງສະຫວັນ
ຄໍາເຫັນ