ສາທາ ນວ ຖອດຖອນບົດຮຽນວຽກງານກັນ ແລະ ຄວບຄຸມພະຍາດຕິດຕໍ່

ທ່ານນາງ ຄຳຫຼ້າ ເພົ້າດາວັນ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກ ນວ ໄດ້ລາຍງານຜົນການຈັດຕັ້ງປະຕິບັດວຽກງານກັນ ແລະ ຄວບຄຸມພະຍາດຕິດຕໍ່ໃນ ນວ ປີ 2025 ແລະ ທິດທາງປີ 2026 ວ່າ: ການຈັດຕັ້ງປະຕິບັດວຽກງານການເຝົ້າລະວັງພະຍາດຕິດຕໍ່ພາຍໃຕ້ລະບົບເຝົ້າລະວັງແຫ່ງຊາດ ຕາມຕົວຊີ້ວັດ (IBS) ແລະ ເຝົ້າລະວັງຕາມເຫດການ (EBS) ໄດ້ກຽມຄວາມພ້ອມ ໃນການລົງສອບສວນ ໂຕ້ຕອບຕໍ່ເຫດການລະບາດທີ່ອາດຈະເກີດຂຶ້ນ ສົ່ງເສີມການປ້ອງກັນພະຍາດຕິດຕໍ່ ແລະ ຄວບຄຸມການຕິດເຊື້ອໃໝ່ໂດຍສະເພາະພະຍາດໄຂ້ຍຸງລາຍ, ເຊື້ອ HIV, ພະຍາດວັນນະໂຣກ, ພະຍາດທີ່ສາມາດປ້ອງກັນໄດ້ດ້ວຍວັກຊິນ, ກຽມຄວາມພ້ອມໃນການກະກຽມປະກາດ ນວ ເປັນເຂດກໍາຈັດພະຍາດມາລາເຣຍໃນປີ 2026, ສ້າງຄວາມເຂັ້ມແຂງໃຫ້ທີມງານເຝົ້າລະວັງ ແລະ ໂຕ້ຕອບ, ຂະຫຍາຍລະບົບເຝົ້າລະວັງຫາໂຮງໝໍເອກະຊົນ, ຂະຫຍາຍຈຸດບໍລິການໃຫ້ຢາ ARV (POC), ປຸກລະດົມຂົນຂວາຍໃຫ້ຊຸມຊົນມີສ່ວນຮ່ວມໃນການສ້າງຂະບວນການທໍາລາຍແຫຼ່ງເພາະພັນໜອນນ້ຳຍຸງລາຍ ແລະ ປະຕິບັດ 5 ປ ຢ່າງເປັນປົກກະຕິທຸກໆອາທິດຢູ່ 9 ເມືອງ, ອໍານວຍຄວາມສະດວກ ແລະ ຕິດຕາມການປ່ອຍຍຸງໂວບັກເຄຍຢູ່ ນວ, ປຸກລະດົມແຕ່ລະພະແນກການ, ອົງການທຽບເທົ່າ, ຊ່ວຍໃນການໂຄສະນາສຸຂະສຶກສາ ໂດຍສະເພາະການປະຕິບັດ 5 ປ ຜ່ານສື່ຕ່າງໆ, ສ້າງຂະບວນການທໍາລາຍແຫຼ່ງເພາະພັນຍຸງທັງໝົດ 1,324 ເທື່ອບ້ານ, ມີຜູ້ເຂົ້າຮ່ວມທັງໝົດ 25,469 ເທື່ອຄົນ, ເຊື່ອມສານກັບວຽກງານໃຫ້ສຸຂະສຶກສາຂອງພະຍາດວັນນະໂຣກ, ເອດ ແລະ ພຕພ ໃນການໂຄສະນາວຽກງານປ້ອງກັນໄຂ້ຍຸງລາຍຢູ່ໂຮງຮຽນ, ອົງການປົກຄອງເມືອງ ເພື່ອໃຫ້ສັງຄົມຮັບຮູ້ ແລະ ເຂົ້າໃຈເຖິງຜົນຮ້າຍ, ວິທີປ້ອງກັນຕ່າງໆ. ພ້ອມນັ້ນ, ຍັງໄດ້ຍົກໃຫ້ເຫັນແຜນການໃນຕໍ່ໜ້າຕື່ມອີກ.

ຂ່າວ: ວຽງຈັນໃໝ່