ການພົວພັນພາຍໃນ ແລະ ຕ່າງປະເທດ. ຄະນະພັກສະຖາບັນຂົງຈືໄດ້ຖືເອົາວຽກງານແນວຄິດ-ການເມືອງເປັນປັດໃຈຫຼັກໃນການສ້າງຄວາມສາມັກຄີພາຍໃນພະນັກງານຄູ-ອາຈານລາວ-ຈີນ ເຮັດໃຫ້ພະນັກງານຄູ-ອາຈານມີຄວາມກະຕືລືລົ້ນຫ້າວຫັນປະຕິບັດວຽກງານ ແລະ ສາມາດສໍາເລັດໜ້າທີ່ວຽກງານທີ່ຕົນຮັບຜິດຊອບຕາມແຜນການທີ່ວາງໄວ້, ເຮັດໃຫ້ໜ່ວຍພັກຮາກຖານສະຖາບັນຖືກຮັບຮອງເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນຕິດຕໍ່ກັນ 4 ປີຊ້ອນ. ນອກຈາກນັ້ນ, ຄະນະພັກ, ສະມາຊິກພັກຖືເອົາຄວາມເປັນແບບຢ່າງ, ຫັນແນວຄິດການເມືອງເປັນທັນສະໄໝໃຫ້ສອດຄ່ອງກັບການສຶກສາອົບຮົມແນວຄິດນັກຮຽນ-ນັກສຶກສາຮຸ້ນໃໝ່ ໂດຍສະເພາະນັກສຶກສາຮຸ້ນ Gen Z ຊຶ່ງເປັນຮຸ້ນທີ່ຢູ່ຕິດພັນກັບເຕັກໂນໂລຊີສະໄໝໃໝ່ ແລະ ເປັນກຸ່ມຄົນທີ່ສະແຫວງຫາການປ່ຽນແປງໃໝ່ຕະຫຼອດເວລາ.
ທ່ານ ຄຳຮຸ່ງ ຈັນທະວົງ ກ່າວໃຫ້ຮູ້ອີກວ່າ: ຕະຫຼອດ 5 ປີທີ່ຜ່ານມາ, ສະຖາບັນຂົງຈືໄດ້ເປີດບໍາລຸງພາສາຈີນໃຫ້ແກ່ສັງຄົມໄດ້ເຖິງ 19,013 ຄົນ ຍິງ 9,919 ຄົນ, ຮັບນັກສຶກສາລະດັບປະລິນຍາຕີສາຂາຄູພາສາຈີນຈໍານວນ 336 ຄົນ ຍິງ 190 ຄົນ. ນອກຈາກນັ້ນຍັງໄດ້ສົ່ງຄູ-ອາຈານຈີນໄປສິດສອນຢູ່ຕາມອົງກອນ ແລະໂຮງຮຽນພາກລັດໂດຍສະເພາະໃນບັນດາກະຊວງທະບວງກົມ, ຫ້ອງຮຽນຂົງຈື 5 ແຫ່ງ ແລະ ຈຸດສອນພາສາຈີນ 2 ແຫ່ງ, ຊຶ່ງໄດ້ສອນໃຫ້ນັກຮຽນຂັ້ນສາມັນ ແລະ ນັກສຶກສາລະດັບປະລິນຍາໄດ້ເຖິງ 15,000 ກວ່າເທື່ອຄົນ, ຝຶກອົບຮົມໃຫ້ຄູລາວທີ່ສອນພາສາຈີນຢູ່ 8 ແຂວງພາກເໜືອຈໍານວນ 5 ຊຸດ ມີຈໍານວນ 125 ເທື່ອຄົນ. ຈັດຝຶກອົບຮົມພາສາຈີນສະເພາະດ້ານໃຫ້ແກ່ຄະນະນໍາຂັ້ນກໍາມະການສູນກາງພັກຈາກຄະນະຈັດຕັ້ງສູນກາງພັກເປັນເວລາ 3 ປີຕິດຕໍ່ກັນ, ສ້າງວິດີໂອສອນອອນລາຍໃນໄລຍະການແຜ່ລະບາດເຊື້ອພະຍາດໂຄວິດ-19 ໄດ້ເຖິງ 222 ບົດ ແລະ ມີຄົນເຂົ້າຊົມເຖິງ 25,000 ກວ່າເທື່ອຄັ້ງ. ໄດ້ຕາງໜ້າໃຫ້ແກ່ສປປ ລາວ ໄປແຂ່ງຂັນ“ເສັ້ນທາງສາຍໃໝ”ທີ່ຂອນແກ່ນປະເທດໄທ ໂດຍມີ 14 ມະຫາວິທະຍາໄລຂອງໄທເຂົ້າຮ່ວມຊຶ່ງສາມາດຍາດໄດ້ລາງວັນທີ 1 ແລະ ດີເດັ່ນປະເພດກຸ່ມ, ໄດ້ລາງວັນທີ 1 ໃນການແຂ່ງຂັນຂົວພາສາຈີນຈໍານວນ 4 ຄັ້ງ ຊຶ່ງໄດ້ຕາງໜ້າໃຫ້ສປປ ລາວໄປແຂ່ງຂັນທີ່ ສປ ຈີນ ໄດ້ຮັບລາງວັນສະຖາບັນຂົງຈືດີເດັ່ນ ແລະ ຈຸດສອບເສັງ HSK ດີເດັ່ນປະຈໍາປີ 2024 ຊຶ່ງມອບໂດຍກະຊວງສຶກສາທິການ ສປ ຈີນ; ເດືອນກໍລະກົດປີ 2021 ກະຊວງສຶກສາທິການ ແລະ ກິລາໄດ້ອະນຸມັດໃຫ້ສະຖາບັນເປີດຫຼັກສູດປະລິນຍາຕີສາຂາຄູພາສາຈີນຊຶ່ງເປັນສະຖາບັນແຫ່ງທໍາອິດຂອງໂລກໃນການເປີດຫຼັກສູດລະດັບປະລິນຍາຕີ ແລະ ກໍເປັນສະຖາບັນແຫ່ງທໍາອິດຂອງສປປ ລາວ ທີ່ເປີດຫຼັກສູດຄູພາສາຈີນ. ຍ້ອນການປະສານງານຢ່າງໃກ້ຊິດກັບຝ່າຍຈີນ, ໃນເດືອນເມສາປີ 2023 ໄດ້ເຊັນສັນຍາການຮ່ວມມືນໍາສູນຮ່ວມມືພາສາຈີນ-ພາສາຕ່າງປະເທດສປ ຈີນໃນການສ້າງຫຼັກສູດ 2+2 ຊຶ່ງສາມາດຍາດແຍ່ງທຶນການສຶກສາໃຫ້ແກ່ນັກສຶກສາສະຖາບັນປີທີ 1 ຈໍານວນ 60 ທຶນ ແລະນັບແຕ່ປີທີ 2 ເປັນຕົ້ນໄປໄດ້ເຖິງ 120 ທຶນຕໍ່ປີ. ນອກຈາກນັ້ນ, ສະຖາບັນຍັງໄດ້ປະສານງານນໍາສຶກສາແຂວງກວາງຊີ ສປ ຈີນສາມາດຍາດແຍ່ງທຶນຮຽນພາສາຈີນມາໃຫ້ມຊໄດ້ 60 ທຶນຕໍ່ປີເປັນເວລາ 5 ປີ. ສະຖາບັນຍັງໄດ້ຮັບໃຊ້ໂຄງການອັນສໍາຄັນຂອງສອງຊາດລາວ-ຈີນເຊັ່ນ: ການສ້າງບຸກຄະລາກອນ ແລະ ຝຶກອົບຮົມດ້ານພາສາຈີນສະເພາະດ້ານໃຫ້ແກ່ພະນັກງານທາງດ່ວນ ແລະ ທາງລົດໄຟລາວ-ຈີນເປັນຈໍານວນ 590 ກວ່າຄົນ, ຊຶ່ງສາມາດຮັບໃຊ້ທັນການໃນພິທີເປີດທາງລົດໄຟລາວ-ຈີນຢ່າງເປັນທາງການໃນວັນທີ 3 ທັນວາ 2021 ແລະ ທາງດ່ວນໃນວັນທີ 20 ທັນວາ 2020. ພ້ອມນັ້ນ,ສະຖາບັນໄດ້ຖືເອົາການສົ່ງເສີມແລກປ່ຽນວັດທະນະທໍາເປັນປາຍຫຼຽມ ໃນການຊຸກຍູ້ວຽກງານສົ່ງເສີມການຮຽນ-ການສອນ. ແຕ່ລະປີໄດ້ຈັດກິດຈະກໍາການຮຽນຮູ້ວັດທະນະທໍາລາວໃຫ້ຝ່າຍຈີນ, ການແຂ່ງຂັນຂົວພາສາຈີນ, ການແຂ່ງຂັນຮ້ອງເພງຈີນ ການແຂ່ງຂັນການສະເໜີແຫຼ່ງທ່ອງທ່ຽວຂອງສປປ ລາວ ແລະ ອື່ນໆ. ຊຶ່ງແຕ່ລະປີສະຖາບັນມີກິດຈະກໍາທັງສອງຝ່າຍລາວ-ຈີນສະເລ່ຍ 28 ກິດຈະກໍາ, ຕະຫຼອດ 5 ປີທີ່ຜ່ານມາ ພວກເຮົາສໍາເລັດກິດຈະກໍາໄດ້ເຖິງ 140 ກິດຈະກໍາຊຶ່ງມີຄົນເຂົ້າຮ່ວມທັງໝົດ 42,100 ເທື່ອຄົນ. ຄຽງຄູ່ກັນນັ້ນ, ສະຖາບັນຂົງຈືຍັງເປັນຂົວຕໍ່ພົວພັນປະສານງານລະຫວ່າງສອງຝ່າຍລາວ-ຈີນ, ເວົ້າສະເພາະລະຫວ່າງມຊ ແລະມະຫາວິທະຍາໄລຊົນເຜົ່າກວາງຊີ,ສຶກສາແຂວງກວາງຊີ ສປ ຈີນ ແລະ ພາກສ່ວນບໍລິສັດ,ລັດວິສາຫະກິດຈີນທີ່ສປປ ລາວ. ຕະຫຼອດ 5 ປີຜ່ານມາສະຖາບັນຂົງຈືສາມາດຍາດແຍ່ງການຊ່ວຍເຫຼືອຈາກມະຫາວິທະຍາໄລຊົນເຜົ່າກວາງຊີ, ທະນາຄານ ICBC, ທະນາຄານລາວ-ຈີນ, ສະພາການຄ້າກວາງຊີ, ບໍລິສັດທາງດ່ວນ ແລະ ທາງລົດໄຟລາວ-ຈີນໃຫ້ແກ່ມຊ ແລະ ສະຖາບັນໄດ້ເປັນຢ່າງດີ.
ຜົນງານທັງໝົດທີ່ກ່າວມານັ້ນຍ້ອນແນວທາງນະໂຍບາຍອັນຖືກຕ້ອງຂອງພັກ-ລັດ ບວກກັບການເອົາໃຈນໍາພາຊີ້ນໍາຂອງອົງຄະນະພັກ ມຊ ແລະຄວາມບຸກບືນຫ້າວຫັນຂອງຄະນະພັກ ແລະ ພະນັກງານຄູ-ອາຈານທົ່ວສະຖາບັນຂົງຈືຈຶ່ງສາມາດສ້າງຜົນງານ ເຮັດໃຫ້ສະຖາບັນນັບມື້ມີການພັດທະນາຫັນປ່ຽນໄປສູ່ທັນສະໃໝ ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ຄໍາເຫັນ