 |
ທ່ານ ນາງ ວັນເພັງ ພັນທະນາໄລ ກ່າວວ່າ: ຜ່ານມາ, ແຂວງວຽງຈັນໄດ້ກຳນົດຈຸດໃຫ້ການບໍລິການວຽກງານດັ່ງກ່າວທັງໝົດ 741 ຈຸດ, ມີຈຸດຄົງທີ່ 62 ຈຸດ, ຈຸດເຄື່ອນທີ່ໄປກັບ 659 ຈຸດ, ຈຸດເຄື່ອນທີ່ນອນແຮມຄືນ 20 ຈຸດ, ມີ 72 ທີມ ຊຶ່ງແພດໝໍທີ່ລົງໃຫ້ການບໍລິການຢູ່ຕາມບ້ານຕ່າງໆໃນທົ່ວແຂວງ ໂດຍມີພະນັກງານແພດໝໍທັງໝົດ 216 ຄົນ ໃນການລົງເຄື່ອນທີ່ຢູ່ຂັ້ນບ້ານ. ນອກນັ້ນ, ຍັງມີອາສາສະໝັກຂັ້ນບ້ານ 741 ຄົນ ເປັນຜູ້ຊ່ວຍທີມງານແພດໝໍ ໃນການຄົ້ນຫາກຸ່ມເດັກເປົ້າໝາຍ.
ສຳລັບການບໍລິການຢອດຢາວັກຊິນກັນພະຍາດໂປລີໂອ ແມ່ນກຳນົດຢູ່ໃນ 11 ເມືອງທົ່ວແຂວງ ໃນກຸ່ມເດັກເປົ້າໝາຍອາຍຸແຕ່ 0 ມື້ ຫາ 59 ເດືອນ ຊຶ່ງມີເປົ້າໝາຍທັງໝົດ 45,834 ຄົນ, ຜ່ານການປະຕິບັດຕົວຈິງ ຮອບທີ 1 ເລີ່ມແຕ່ວັນທີ 2 ມີນາ 2026 ປະຕິບັດໄດ້ 46,126 ຄົນ ເທົ່າກັບ 101% ແລະ ຮອບທີ 2 ເລີ່ມແຕ່ວັນທີ 27 ເມສາ ຫາ 10 ພຶດສະພາ 2026 ປະຕິບັດໄດ້ 47,158 ຄົນ ເທົ່າກັບ 103% ແລະ ການບໍລິການສັກວັກຊິນກັນພະ ຍາດໝາກແດງໃຫຍ່-ໝາກແດງນ້ອຍຢູ່ໃນ 3 ເມືອງຄື: ເມືອງໂພນໂຮງ, ກາສີ ແລະ ເມືອງວຽງຄຳ ໃຫ້ກຸ່ມເປົ້າໝາຍເດັກອາຍຸ 9-59 ເດືອນ ຊຶ່ງມີເປົ້າໝາຍທັງໝົດ 10,463 ຄົນ ສາມາດປະຕິບັດໄດ້ 10,384 ຄົນ ເທົ່າກັບ 99%. ຜົນສຳເລັດດັ່ງກ່າວ, ຍ້ອນການນໍາທຸກຂັ້ນເອົາໃຈໃສ່ນໍາພາ-ຊີ້ນຳ ແລະ ເຫັນໄດ້ຄວາມສຳຄັນຂອງວຽກງານຂະບວນການໃຫ້ວັກຊິນກັນພະຍາດດັ່ງກ່າວ. ທຸກຂະແໜງການອ້ອມຂ້າງແຂວງ, ເມືອງ, ຂັ້ນບ້ານ ໄດ້ມີສ່ວມຮ່ວມເປັນເຈົ້າການໃນການປຸກລະດົມ ໃຫ້ຄວາມຮູ້ຕໍ່ຊຸມຊົນຂອງຕົນເອງຢ່າງເປັນຂະບວນ; ບັນດາເມືອງ ແມ່ນມີຄວາມກຽມພ້ອມທາງດ້ານບຸກຄະລາກອນ, ອຸປະກອນຮັບໃຊ້ຕ່າງໆ ແລະ ມີຂໍ້ມູນບັນຊີລາຍຊື່ກຸ່ມເປົ້າໝາຍຢູ່ໃນແຕ່ລະບ້ານຢ່າງລະ ອຽດ; ທີມງານແພດໝໍທຸກຂັ້ນ ໄດ້ເອົາໃຈໃສ່ໃນການລົງເຄື່ອນໄຫວ ໃຫ້ການບໍລິການຢ່າງທົ່ວເຖິງ; ອໍານາດການປົກ ຄອງທ້ອງຖິ່ນໃຫ້ການຮ່ວມມືເປັນຢ່າງດີ ໂດຍສະເພາະອາສາສະໝັກຂັ້ນບ້ານໄດ້ປະກອບສ່ວນ ໃນການນໍາພາທີມງານແພດໝໍລົງຄົ້ນຫາກຸ່ມເດັກເປົ້າໝາຍທີ່ພາດໂອກາດ ຢູ່ໃນແຕ່ລະຫຼັງຄາເຮືອນຂອງແຕ່ລະບ້ານ.
 |
ສຳລັບແຜນການໃນຕໍ່ໜ້າ ຈະໄດ້ປະສານສົມທົບກັບອົງການຈັດຕັ້ງມະຫາຊົນຕ່າງໆ ເປັນຕົ້ນ ສະຫະພັນແມ່ຍິງ, ແນວລາວສ້າງຊາດ, ໂຄສະນາອົບຮົມແຂວງ, ເມືອງ ແລະ ອຳນາດການປົກຄອງທ້ອງຖິ່ນຂັ້ນບ້ານ ເພື່ອຂໍການຮ່ວມມື ໃນການສະໜັບສະໜູນທາງດ້ານຂໍ້ມູນຂ່າວສານ, ຄວາມຮູ້ກ່ຽວກັບວຽກງານການໃຫ້ວັກຊິນກັນພະຍາດຮອບປົກກະຕິ. ສືບຕໍ່ໃຫ້ການບໍລິການສັກຢາກັນພະຍາດຮອບປົກກະຕິ ຊຶ່ງສາມາດປ້ອງກັນໄດ້ 10 ພະຍາດ. ໃຫ້ການບໍລິການສັກຢາກັນພະຍາດຢູ່ໃນຈຸດຄົງທີ່ຂອງໂຮງໝໍແຂວງ, ໂຮງໝໍເມືອງ, ສຸກສາລາທຸກໆແຫ່ງອາທິດລະ 1 ຄັ້ງ. ໃຫ້ການບໍລິການສັກຢາກັນພະຍາດຮອບປົກກະຕິ ໃນແຕ່ລະເມືອງທຸກໆເດືອນໃນແຕ່ລະບ້ານ ເລີ່ມແຕ່ວັນທີ 3-15 ຂອງແຕ່ລະເດືອນ.
ທ່ານ ນາງ ວັນເພັງ ພັນທະນາໄລ ໃຫ້ຮູ້ອີກວ່າ: ນອກຈາກການສັກຢາ ແລະ ຢອດຢາວັກຊິນແລ້ວ ພະແນກສາທາລະນະສຸກແຂວງ ໄດ້ມີການປະສານສົມທົບກັບບັນດາພາກສ່ວນທີ່ກ່ຽວຂ້ອງ ໃນການກະກຽມຄວາມພ້ອມປ້ອງກັນ ເພື່ອບໍ່ໃຫ້ເກີດພະຍາດລະບາດຢູ່ໃນໄລຍະລະດູຝົນ ໂດຍສະເພາະແມ່ນພະຍາດໄຂ້ຍຸງລາຍ ຊຶ່ງໃນປັດຈຸບັນແມ່ນໄດ້ຈັດທີມງານລົງໂຄສະນາສຸຂະສຶກສາໃຫ້ປະຊາຊົນ ເອົາໃຈໃສ່ໃນການປ້ອງກັນ ແລະ ທຳລາຍແຫຼ່ງເພາະພັນຍຸງລາຍ ເພື່ອບໍ່ໃຫ້ເກີດພະຍາດລະບາດດັ່ງກ່າວ. ຂ່າວ: ແຂວງວຽງຈັນ
ຄໍາເຫັນ