ສາທາລະນະສຸກ ແຂວງຄໍາມ່ວນ ວາງມາດຕະການເຂັ້ມງວດ ເຝົ້າລະວັງ ແລະ ຮັບມືພະຍາດລະບາດໃນລະດູຝົນ

 ປັດຈຸບັນ ໄດ້ມີການນໍາໃຊ້ເຕັກໂນໂລຊີດິຈິຕອນ ເປັນຕົ້ນແມ່ນລະບົບ DHIS2 ແລະ EWARS ເຂົ້າໃນການຕິດຕາມຈໍານວນຄົນເຈັບແບບທັນເຫດການ (Real-time) ຫາກພົບສະພາບຜິດປົກກະຕິ ຕ້ອງລາຍງານດ່ວນພາຍໃນ 24 ຊົ່ວໂມງ ຜ່ານກຸ່ມ WhatsApp ຈາກຂັ້ນສຸກສາລາ ຫາ ເມືອງ, ແຂວງ ແລະ ກະຊວງຕາມລໍາດັບ ຊຶ່ງການຕິດຕາມໄຂ້ເລືອດອອກ ໄດ້ນໍາໃຊ້ກະດານຂ່າວ (Dashboard) ຕິດຕາມປະຈໍາວັນ ຫາກພົບຜູ້ປ່ວຍບໍ່ມີອາການເຕືອນ 5 ກໍລະນີ/ບ້ານ ຫຼື ມີອາການຮ້າຍແຮງພຽງ 1 ກໍລະນີ/ບ້ານ, ທີມຕອບໂຕ້ໄວ (RRT) ຈະລົງພື້ນທີ່ເພື່ອຕອບໂຕ້ທັນທີ. ດ້ານການກໍານົດ “ພື້ນທີ່ສ່ຽງສູງ” ແມ່ນອີງໃສ່ສະຖິຕິການລະບາດໃນປີຜ່ານມາ ແລະ ອັດຕາຄວາມໜາແໜ້ນຂອງໜອນນໍ້າຍຸງລາຍ ໂດຍສະເພາະເຂດເທດສະບານທີ່ມີປະຊາກອນແອອັດ. ສ່ວນປັດໄຈສ່ຽງຕໍ່ການເກີດພະຍາດຖອກທ້ອງ ເກີດຈາກການຂາດສຸຂະນາໄມ, ການຖ່າຍຊະຊາຍ, ແຫຼ່ງນໍ້າບໍ່ສະອາດ ແລະ ພຶດຕິກໍາການກິນຂອງດິບ ແລະ ປັດໄຈການເກີດໄຂ້ຍຸງລາຍ ເກີດຈາກການມີນໍ້າຂັງ ແລະ ຂາດການຮ່ວມມືໃນການປະຕິບັດຫຼັກການ “5 ປໍ” (ປິດ, ປ່ຽນ, ປ່ອຍ, ປັບປຸງ, ປະຕິບັດ) ເພື່ອທໍາລາຍແຫຼ່ງເພາະພັນຍຸງລາຍ. ສໍາລັບມາດຕະການສະກັດກັ້ນ ແລະ ການຈັດຕັ້ງຕຽງຄົນປ່ວຍ ຫາກເກີດການລະບາດ, ພະແນກສາທາລະນະສຸກຈະນໍາໃຊ້ມາດຕະການຕາມກົດໝາຍ ໂດຍແບ່ງຄວາມຮຸນແຮງເປັນ 3 ລະດັບ (ກ, ຂ, ຄ) ຕາມກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ມາດຕະການຫຼັກປະກອບມີ: ການກັກບໍລິເວນ, ການຂ້າເຊື້ອ, ການປິ່ນປົວ, ການໃຫ້ວັກຊິນ, ການກໍາຈັດພາຫະນະນໍາເຊື້ອ ແລະ ການໃຫ້ສຸຂະສຶກສາ. ແຜນຮັບມືກໍລະນີຜູ້ປ່ວຍໄຂ້ຍຸງລາຍລົ້ນໂຮງໝໍ: ກໍລະນີເລີ່ມຕົ້ນ (ບໍ່ມີສັນຍານເຕືອນ) ໃຫ້ປິ່ນປົວ ແລະ ຕິດຕາມອາການຢູ່ເຮືອນ ໂດຍມີສາຍດ່ວນໃຫ້ຄໍາປຶກສາ, ກໍລະນີຮ້າຍແຮງ (ມີສັນຍານເຕືອນ): ຮັບນອນໂຮງໝໍ ໂດຍຈະກະຈາຍຄົນເຈັບໄປຕາມໂຮງໝໍເມືອງ, ໂຮງໝໍທະຫານ ແລະ ເອກະຊົນ ແລະ ກໍລະນີສຸກເສີນ ຈະເປີດຫ້ອງປະຊຸມ EOC ເພື່ອບັນຊາການ, ລະດົມແພດໝໍຈາກເຂດທີ່ບໍ່ມີການລະບາດ ແລະ ອາດນໍາໃຊ້ຫ້ອງປະຊຸມໃຫຍ່ ຫຼື ຕຽງສະໜາມເພື່ອຮອງຮັບຄົນເຈັບ. ຂໍ້ຈໍາກັດ ແລະ ສິ່ງທ້າທາຍໃນການປະຕິບັດງານຕົວຈິງ ຍັງມີອຸປະສັກບາງດ້ານ ເປັນຕົ້ນແມ່ນ ການລາຍງານຂໍ້ມູນຊັກຊ້າໃນເຂດຫ່າງໄກສອກຫຼີກທີ່ບໍ່ມີສັນຍານອິນເຕີເນັດ, ເສັ້ນທາງຄົມມະນາຄົມໃນເຂດຫ່າງໄກມີຄວາມຫຍຸ້ງຍາກ ເຮັດໃຫ້ມີຄວາມຊັກຊ້າໃນການນໍາສົ່ງຄົນປ່ວຍເຂົ້າມາປິ່ນປົວ, ຄວາມຮູ້ຂອງແພດສຸກສາລາບາງແຫ່ງຍັງຈໍາກັດ ແລະ ອື່ນໆ.

ຍຸດທະສາດການປັບປຸງໃນອະນາຄົດ ເພື່ອຮັບມືກັບການລະບາດທີ່ມີທ່າອ່ຽງຮຸນແຮງຂຶ້ນ ພະແນກສາທາລະນະສຸກ ແຂວງຄໍາມ່ວນ ເນັ້ນໜັກການຫັນປ່ຽນຍຸດທະສາດ ໂດຍເນັ້ນໃສ່ວຽກງານປ້ອງກັນ, ສ້າງຄວາມເຂັ້ມແຂງໃນການສັກວັກຊິນ ແລະ ເພີ່ມການມີສ່ວນຮ່ວມຂອງຊຸມຊົນ, ເລັ່ງວຽກງານສຸຂະສຶກສາ ຜ່ານສື່ສັງຄົມອອນລາຍ ແລະ ທີມເຄື່ອນທີ່, ປະສານງານກັບຂະແໜງສຶກສາທິການ ເພື່ອປູກຝັງຫຼັກການ "3 ສະອາດ" ໃຫ້ຮຸ່ນຄົນໃໝ່, ຈັດຫານໍ້າດື່ມ-ນໍ້າໃຊ້ທີ່ປອດໄພ ໃຫ້ແກ່ຊຸມຊົນທີ່ມີຄວາມສ່ຽງ, ຂະຫຍາຍການໂຄສະນາ ໃຫ້ກວມເອົາທັງພະຍາດຕາມລະດູການ ແລະ ພະຍາດບໍ່ຕິດຕໍ່ (NCDs) ເຊັ່ນ: ເບົາຫວານ, ໄຂມັນ, ແລະ ຄວາມດັນເລືອດສູງ ທີ່ມີທ່າອ່ຽງເພີ່ມຂຶ້ນໃນປັດຈຸບັນ. ຕາມສະຖິຕິການຕິດເຊື້ອພະຍາດໄຂ້ຍຸງລາຍ ມາຮອດວັນທີ 16 ພຶດສະພາໃນທົ່ວແຂວງຄໍາມ່ວນ ມີຜູ້ຕິດເຊື້ອ ລວມມີ 79 ກໍລະນີ. ໃນນີ້ເມືອງທີ່ມີຜູ້ຕິດເຊື້ອຫຼາຍແມ່ນ ເມືອງທ່າແຂກ, ຫີນບູນ, ໜອງບົກ ແລະ ເຊບັ້ງໄຟ. ຂ່າວ: ກອງຄໍາ