ສອງໂຮງໝໍແລກປ່ຽນທາງດ້ານວິຊາການກ່ຽວກັບພະຍາດເລືອດຈາງ

ໂຮງໝໍມິດຕະພາບ  ສປປ ລາວ ຮ່ວມກັບ ໂຮງໝໍເລກໜຶ່ງ ມະຫາວິທະຍາໄລແພດສາດກວາງຊີ ປະເທດຈີນ ໄດ້ຈັດກອງປະຊຸມແລກປ່ຽນທາງດ້ານວິຊາການກ່ຽວກັບພະຍາດເລືອດຈາງ Thalassemia ຂຶ້ນ ໃນວັນທີ  16 ຕຸລາ ນີ້ ທີ່ໂຮງໝໍມິດຕະພາບ ໂດຍການເປັນປະທານຮ່ວມຂອງ ທ່ານ  ເກດມະນີ ເພັດສິລິແສງ ຮອງຜູ້ອຳນວຍການໂຮງໝໍມິດຕະພາບ, ທ່ານ ເຊີນຈຸ້ນສຽງ CHEN JUN QIANG ຜູ້ອຳນວຍການໂຮງໝໍເລກໜຶ່ງມະຫາວິທະຍາໄລແພດສາດກວາງຊີ ປະເທດຈີນ, ມີບັນດາຄະນະອຳນວຍການ ແລະ ພະນັກງານແພດໝໍຈາກທັງສອງຝ່າຍເຂົ້າຮ່ວມ. 
ຈຸດປະສົງໃນການຈັດກອງປະຊຸມຄັ້ງນີ້: ແມ່ນເພື່ອປຶກສາຫາລືໃນການຕໍ່ສັນຍາການຮ່ວມທາງດ້ານວິຊາການ ແລະ ການຄົ້ນຄວ້າຮ່ວມກັນໃນໄວໆນີ້, ເພື່ອເປັນການຮັດແໜ້ນສາຍພົວພັນທັງສອງປະເທດໃນການຮ່ວມມືຊຶ່ງກັນ ແລະ ກັນ.
ທ່ານ  ເກດມະນີ ເພັດສິລິແສງ ໄດ້ເວົ້າວ່າ: ສປປ ລາວ - ສປ ຈິນ ໄດ້ມີສາຍພົວພັນອັນດີງາມມາແຕ່ດົນນານແລ້ວ ໂດຍສະເພາະແມ່ນນະໂຍບາຍໜຶ່ງແລວໜຶ່ງເສັ້ນທາງ ໃນນັ້ນຂະແໜງສາທາຂອງພວກເຮົາກໍ່ໄດ້ຮັບການຊ່ວຍເຫຼືອຈາກໂຮງໝໍເລກໜຶ່ງມະຫາວິທະຍາໄລແພດສາດກວາງຊີ ປະເທດຈີນ ຊຶ່ງໄດ້ເຊັນສັນຍາຮ່ວມມື່ກັນໃນປີ 2019 ແລະ ໃນກອງປະຊຸມແລກປ່ຽນທາງດ້ານວິຊາການກ່ຽວກັບພະຍາດເລືອດຈາງ Thalassemia ແມ່ນເພື່ອປຶກສາຫາລືໃນການຕໍ່ສັນຍາການຮ່ວມມືທາງດ້ານວິຊາການ ເປົ້າໝາຍແມ່ນມີ 3 ຢ່າງຄື: ການສ້າງບຸກຄະລາກອນການແພດໃຫ້ມີການພັດທະນາຢ່າງຕໍ່ເນື່ອງ, ພະຍາດເລືອດປາງກິດເລືອດ ຫຼື ເລືອດຈາງ ແລະ ພະຍາດມະເຮັງ. ການຊ່ວຍເຫຼືອຄັ້ງນີ້ແມ່ນຈະເປັນປະໂຫຍດສູງສຸດໃຫ້ແກ່ບຸກຄະລາກອນການແພດ, ທັງປະຊາຊົນທີ່ໄດ້ຮັບການເບິ່ງແຍງດູແລສຸຂະພາບໃຫ້ແຂງແຮງດີຂຶ້ນ.
ຂ່າວ-ພາບ: ບຸນຕອມ.