ທ່ານ ວິລະເດດ ປຣະພາສິຣິ ຜູ້ອໍານວຍການໂຮງໝໍແຂວງຊຽງຂວາງ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 6 ພະຈິກ ຜ່ານມາ ທີ່ໂຮງໝໍແຂວງຊຽງຂວາງ ກ່ຽວກັບການຈັດຕັ້ງປະຕິບັດວຽກງານສຸຂະພາບຈະເລີນພັນ, ຝາກທ້ອງ, ວາງແຜນຄອບຄົວ ແລະ ການໃຫ້ຄຳປຶກສາສຸຂະພາບຈະເລີນພັນ ວ່າ: ໂຮງໝໍແຂວງຊຽງຂວາງ ມີສະຖານທີ່ຢູ່ 2 ຈຸດໃຫຍ່ຄື: ໂຮງໝໍເກົ່າ ໃຫ້ບໍລິການຄົນເຈັບນອນປິ່ນປົວພະຍາດຊຶມເຊື້ອ, ສຸຂະພາບຕາ ແລະ ໂຮງໝໍໃໝ່ ໃຫ້ບໍລິການທັງເຂດນອກ-ຄົນເຈັບນອນໂຮງໝໍ ປັດຈຸບັນກະຊວງສາທາລະນະສຸກອະນຸມັດຕຽງນອນຄົນເຈັບ 100 ຕຽງ (ໃນຕົວຈິງ 200 ຕຽງ) ມີ 19 ໜ່ວຍງານ 1 ຕຶກພິເສດ ແລະ 1 ສູນຫົວໃຈ-ເສັ້ນເລືອດ ຊຶ່ງມີ 5 ພາລະບົດບາດຂອງໂຮງໝໍແຂວງຄື: 1.ບໍລິຫານຄຸ້ມຄອງ-ບໍລິການປິ່ນປົວ-ຟື້ນຟູໜ້າທີ່ການໃຫ້ຄົນເຈັບ, 2.ສຸຂະສຶກສາເພື່ອປ້ອງກັນ ແລະ ສົ່ງເສີມສຸຂະພາບ,3.ອົບຮົມ ແລະ ຊ່ວຍໃນການສ້າງພະນັກງານສາທາລະນະສຸກແຕ່ລະຂັ້ນ, 4. ຄົ້ນຄວ້າວິທະຍາສາດສາທາລະນະນະສຸກ ແລະ 5. ຕິດຕາມຊຸກຍູ້ຊ່ວຍໂຮງໝໍຊຸມຊົນ ແລະ ໂຮງໝໍນ້ອຍ, ມີພະນັກງານລັດຖະກອນທັງໝົດ 233 ຄົນ ຍິງ 174 ຄົນ; ມີພະນັກງານອາສາສະໝັກ 29 ຄົນ ຍິງ 20 ຄົນ; ພະນັກງານຕາມສັນຍາ (ວຽກງານອະນາໄມ) 13 ຄົນ ຍິງ 12 ຄົນ.
ໃນໄລຍະຜ່ານມາໂຮງໝໍແຂວງໄດ້ບໍລິການທັງຄົນເຈັບເຂດນອກ ແລະ ນອນປິ່ນປົວ, ໂຮງໝໍຖືເອົາຄົນເຈັບເປັນໃຈກາງ ໃນການກວດຄັດກອງ, ການປ້ອງກັນ-ສົ່ງເສີມໃຫ້ສຸຂະສຶກສາ, ໃຫ້ຄຳປຶກສາ ແລະ ປິ່ນປົວ ບັນຫາສຸຂະພາບຈະເລີນພັນ. ໃນນີ້ ໄດ້ເນັ້ນ ການວາງແຜນຄອບຄົວ, ພະຍາດລະບົບສືບພັນ ວຽກງານແມ່ ແລະ ເດັກ, ພະຍາດຕິດຕໍ່ໃນລະບົບສືບພັນ, ພະຍາດເອດ, ການທຳແທ້ງ ແລະ ພາວະແຊກຊ້ອນ ການກວດຄັດກອງພະຍາດມະເຮັງປາກມົດລູກ ແລະ ມະເຮັງເຕົ້ານົມ, ການມີລູກຍາກ, ການມີເພດສຳພັນໃນໄວໜຸ່ມ ແລະ ອື່ນໆ.
ທ່ານໄດ້ໃຫ້ຮູ້ຕື່ມວ່າ: ໄລຍະຜ່ານມາໂຮງໝໍແມ່ນໄດ້ຮັບການຊ່ວຍເຫຼືອຈາກຫຼາຍພາກສ່ວນ ໃນນັ້ນ ດ້ານອຸປະກອນ: ໄດ້ທຶນຈາກໂກຟີ, ອະນາໄມໂລກ, ໄຈກາ, ອຸຍນີເຊັບ ແລະ ອົງການຈັດຕັ້ງສາກົນອື່ນໆ ຊຶ່ງປະກອບມີ ເຄື່ອງຕິດຕາມຄົນເຈັບ, ເຄື່ອງເອໂກ, ຊຸດຊ່ວຍເກີດ, ຢາບໍາລຸງເລືອດ, ຢາຄຸມ ແລະ ຖົງຢາງອະນາໄມ; ພ້ອມນີ້ກໍມີ ທຶນອົບຮົມເຊັ່ນ: ການວາງແຜນຄອບຄົວ, ການຄັດກອງພະຍາດມະເຮັງປາກມົດລູກ ແລະ ມະເຮັງເຕົ້ານົມ, ການປ້ອງກັນພະຍາດຕິດຕໍ່ໃນລະບົບສືບພັນ ພະຍາດເອດ. ເພື່ອໃຫ້ການບໍລິການວຽກງານດີຂຶ້ນກວ່າເກົ່າ ທາງໂຮງໝໍ ໄດ້ເຮັດໂຄສະນາສຸຂະສຶກສາໃນຫຼາກຫຼາຍຮູບແບບ ແລະ ປະສານງານກັບທຸກສ່ວນທີ່ກ່ຽວຂ້ອງ ເນັ້ນການອົບຮົມຍົກລະດັບທາງດ້ານທິດສະດີ ແລະ ປະຕິບັດຕົວຈິງ ຢ່າງຕໍ່ເນື່ອງ, ຈັດຫາອຸປະກອນພື້ນຖານ ແລະ ທັນສະໄໝ ໃຫ້ພຽງພໍກັບຄວາມຕ້ອງການໃນແຕ່ລະໄລຍະ. ຄະນະການນຳຕະຫຼອດພະນັກງານທຸກຄົນໄດ້ສຸມໃສ່ການຈັດຕັ້ງປະຕິບັດນະໂຍບາຍ 5 ດີ 1 ພໍໃຈໃຫ້ນັບມື້ມີຄຸນນະພາບ ໂດຍເນັ້ນການຕິດຕາມຊຸກຍູ້ ແລະ ປະເມີນເປັນປະຈຳ ຕໍ່ເນື່ອງ.
ໃນໂອກາດດັ່ງກ່າວ ທ່ານຜູ້ອໍານວຍການໂຮງໝໍແຂວງຊຽງຂວາງ ຍັງໄດ້ຮຽກຮ້ອງເຖິງປະຊາຊົນ ທີ່ມາໃຊ້ບໍລິການກວດສຸຂະພາບ ແລະ ວຽກງານສຸຂະພາບຈະເລີນພັນ ວ່າ: ເພື່ອປ້ອງກັນບັນຫາທີ່ຈະເກີດຂຶ້ນກ່ຽວກັບສຸຂະພາບຈະເລີນພັນ ຈຶ່ງຂໍຄວາມຮ່ວມມືນໍາທຸກທ່ານ ຕ້ອງໄດ້ເອົາໃສ່ຕິດຕາມກວດສຸຂະພາບຂອງຕົນເອງ, ຄອບຄົວ ແລະ ຍາດພີ່ນ້ອງເປັນຕົ້ນ: ການກວດສຸຂະພາບປະຈໍາປີຢ່າງໜ້ອຍທຸກ 6 ເດືອນ ຫຼື 1 ປີ ເພື່ອປ້ອງກັນພະຍາດ ແລະ ປິ່ນປົວແກ້ໄຂໃຫ້ທັນເວລາ.ໃນການລົງຕິດຕາມເກັບກໍາຂໍ້ມູນຂອງສື່ມວນຊົນໃນຄັ້ງນີ້ ຊຶ່ງນໍາພາໂດຍສູນສະຖິຕິ ແລະ ຂ່າວສານສາທາລະນະສຸກ, ກະຊວງສາທາລະນະສຸກ ໂດຍໄດ້ຮັບການສະໜັບສະໜູນຈາກອົງການສະຫະປະຊາຊາດກອງທຶນສໍາລັບປະຊາກອນ(UNFPA).
ຂ່າວ-ພາບ: ຍຸພິນທອງ
ໂຄງການສົ່ງເສີມສຸຂະພາບຈະເລີນພັນ ແມ່ເດັກເກີດໃໝ່ເດັກນ້ອຍ ແລະ ໄວໜຸ່ມ
ໃນວັນທີ 5 ສິງຫາ 2026 ນີ້ ໂຄງການສົ່ງເສີມສຸຂະພາບຈະເລີນພັນ ແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ໄດ້ລົງເຄື່ອນໃຫວຕິດຕາມຊກຍູ້ ແລະຢ້ຽມຢາມການຈັດຕັ້ງປະຕິບັດ ກິດຈະກຳ 6 ເດືອນຕົ້ນປີ ຢູ່ຂັ້ນບ້ານ ທີ່ບ້ານລະກາຍ ເມືອງກະລຶມ ແຂວງເຊກອງ ໂດຍການນໍາພາ ຂອງທ່ານ ຄຳສິງ ໂລຍວິໄລສັກ ຮອງປະທານຄະນະກຳມະການປົກຄອງເມືອງກະລຶມ, ມີທ່ານ ສົງ ຈັນທະວົງສາ ຜູ້ບໍລິຫານໂຄງການຂັ້ນແຂວງ ພ້ອມດ້ວຍຂະແໜງການກ່ຽວຂ້ອງ ຈາກກະຊວງສາທາລະນະສຸກ, ກະຊວງການຕ່າງປະເທດ, ອົງການແຄຣ, ຜູ້ປະສານງານໂຄງການ ເຂົ້າຮ່ວມ.
ຄໍາເຫັນ