 |
ຄະນະນັກກິລາຕຳຫຼວດລາວ ທີ່ເຂົ້າຮ່ວມແຂ່ງຂັນປະກອບມີຄູຝຶກ 1 ທ່ານຄື: ສະຫາຍ ຮທ ເພັດສະໝອນ ສີສົມຫວັງ ແລະ ນັກກິລາ 4 ທ່ານ ຄື: ສະຫາຍ ພັອ ອານຸສິນ ສັກປະເສີດ, ສະຫາຍ ພັອ ວັນປະ ດິດ ຈັນທະວົງ, ສະຫາຍ ພັທ ສິນໄຊ ພິລາສຸກ ແລະ ສະຫາຍ ພັຕ ໄຊຫຼ້າ ສຸວົງ ຊຶ່ງໄດ້ຮັບການຕ້ອນຮັບຢ່າງອົບອຸ່ນຈາກສະຫາຍ ພັອ ຄອນສີ ເນົາວະລາດ ຫົວໜ້າອົງການຜູ້ຕາງໜ້າກະຊວງປ້ອງກັນຄວາມສະ ຫງົບລາວ ປະຈຳ ສສ ຫວຽດນາມ.
 |
ພິທີເປີດການແຂ່ງຂັນໄດ້ຈັດຂຶ້ນຢ່າງສົມກຽດ ໂດຍການເປັນປະທານຂອງ ສະຫາຍ ພົທ ເລ ວັນຕວຼຽນ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ. ການແຂ່ງຂັນໃນຄັ້ງນີ້, ຈັດຂຶ້ນເພື່ອສົ່ງເສີມການແລກປ່ຽນ, ຮັດແໜ້ນການຮ່ວມມື ແລະ ເສີມຂະຫຍາຍສາຍພົວ ພັນລະຫວ່າງອົງການບັງຄັບໃຊ້ກົດໝາຍ. ໂດຍໄດ້ຮັບຄວາມສົນໃຈຢ່າງກວ້າງຂວາງ ມີຄະນະນັກກິລາຕຳຫຼວດເຂົ້າຮ່ວມທັງໝົດ 14 ປະເທດ ແລະ ເຂດແຄວ້ນ ປະກອບມີ: ປະເທດສະມາຊິກອາຊຽນຄື: ມາເລເຊຍ, ໄທ, ລາວ, ກຳປູເຈຍ, ຫວຽດນາມ, ສິງກະໂປ, ບຣູໄນ, ອິນໂດເນເຊຍ, ຟີລິບປິນ ແລະ ກຸ່ມປະ ເທດຮ່ວມງານສາກົນ ຄື: ອົສຕຣາລີ, ຈີນ (ໄທເປ), ນໍເວ, ຮົງກາລີ ພ້ອມດ້ວຍສາທາລະນະລັດເຊັກ.
ສຳລັບຜົນການແຂ່ງຂັນປະເພດທີມຕະຫຼອດໄລຍະ 2 ຮອບ, ນັກກິລາຕຳຫຼວດ ສປປ ລາວ ສາມາດຄວ້າອັນດັບທີ 3 ມາຄອງໄດ້ຢ່າງສົມກຽດດ້ວຍຄະແນນ (Stableford) ລວມ 223 ຄະແນນ.
 |
ຂະນະດຽວກັນ, ປະເພດບຸກຄົນ ສະຫາຍ ພັທ ສິນໄຊ ພິລາສຸກ ສາມາດສ້າງຜົນງານໄດ້ຢ່າງດີເລີດ ໂດຍການຄວ້າຕຳແໜ່ງແຊັມມາຄອງດ້ວຍຄະແນນ 70 (Strokes Play). ຜົນສຳເລັດໃນຄັ້ງນີ້, ບໍ່ພຽງແຕ່ເປັນການສ້າງຊື່ສຽງທາງດ້ານກິລາໃຫ້ກຳລັງປ້ອງກັນຄວາມສະຫງົບຂອງລາວໃນເວທີສາກົນເທົ່ານັ້ນ, ແຕ່ຍັງເປັນການປະກອບສ່ວນອັນສຳຄັນເຂົ້າໃນການສ້າງເຄືອຂ່າຍ, ຄວາມໄວ້ເນື້ອເຊື່ອໃຈ ແລະ ຄວາມສາມັກຄີອັນແໜ້ນແຟ້ນກັບເຈົ້າໜ້າທີ່ຕຳຫຼວດໃນພາກພື້ນອາຊຽນ ແລະ ສາກົນ ເພື່ອເປັນຮາກຖານໃຫ້ການປະສານງານຕ້ານອາຊະຍາກຳຂ້າມຊາດຢ່າງມີປະສິດທິຜົນໃນອະນາຄົດ.
ຂ່າວ-ພາບ: ພັອ ວັນປະດິດ ຈັນທະວົງ
ຄໍາເຫັນ