ຖວທແຂວງຫຼວງພະບາງແລະເມືອງຈອມເພັດຫາລືເພື່ອຮອງຮັບເປັນເມືອງທ່ອງທ່ຽວສະອາດອາຊຽນ

ເມື່ອບໍ່ດົນມານີ້ຢູ່ເມືອງຈອມເພັດ ແຂວງຫຼວງພະບາງ ໄດ້ຈັດກອງປະຊຸມການປຶກສາຫາລື ແລະກະກຽມປະກາດຮັບຮອງເອົາເມືອງຈອມເພັດ ເປັນເມືອງທ່ອງທ່ຽວ ສະອາດອາຊຽນ ໂດຍມີ ທ່ານ ນາງ ສຸດາພອນ ຄົມທະວົງ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະທ່ອງທ່ຽວ ຖວທ ແຂວງ, ທ່ານ ສາຍສະໝອນ ສາລິວົງ ເຈົ້າເມືອງຈອມເພັດ, ມີວິຊາການຂະແໜງການທ່ອງທ່ຽວແຂວງ, ມີພະນັກງານ ຖວທ ເມືອງ ແລະບັນດາຫ້ອງການທີ່ກ່ຽວຂ້ອງ ພ້ອມດ້ວຍນາຍບ້ານ 7 ບ້ານ ເຂົ້າຮ່ວມ.
  ທ່ານ ນາງ ສຸດາພອນ ຄົມທະວົງ ໄດ້ມີຄໍາເຫັນຕໍ່ກອງປະຊຸມຄັ້ງນີ້ວ່າ: ການຈັດຕັ້ງປະຕິບັດ ມາດຕະຖານເມືອງທ່ອງທ່ຽວສະອາດ ອາຊຽນ ໃນໄລຍະຜ່ານມາແຂວງຫຼວງພະບາງ ສາມາດຍາດໄດ້ລາງວັນມາດຕະຖານການທ່ອງທ່ຽວ ທັງໝົດ 36 ລາງວັນ, ໃນນີ້, ສຳລັບມາດຕະຖານເມືອງທ່ອງທ່ຽວສະອາດ ອາຊຽນ ນະຄອນ-ຫຼວງພະບາງ ສາມາດຍາດໄດ້ 2 ຄັ້ງ (2018-2020, 2021-2023)  ແລະສຳລັບເມືອງຈອມເພັດ: ໄດ້ມີການຈັດກອງປະຊຸມເຜີຍແຜ່, ທົດລອງປະເມີນ ແລະ ກຳນົດໜ້າວຽກປັບປຸງເມືອງຈອມເພັດໃຫ້ໄດ້ມາດຕະຖານເມືອງທ່ອງທ່ຽວສະອາດອາຊຽນ ແລະຜ່ານປະເມີນມາດຕະຖານ 7 ຕົວຊີ້ວັດຫຼັກ ຄື: ການຄຸ້ມຄອງສິ່ງແວດລ້ອມ, ຄວາມສະອາດ, ການຈັດການສິ່ງເສດເຫຼືອ, ການປູກຈິດສໍານຶກຮັກສາສິ່ງແວດລ້ອມ ແລະຄວາມສະອາດ, ພື້ນທີ່ສີຂຽວ, ຄວາມປອດໄພດ້ານສຸຂະພາບ ຄວາມປອດໄພ ແລະຄວາມສະຫງົບໃນຕົວເມືອງ, ໂຄງລ່າງພື້ນຖານ ແລະສິ່ງອໍານວຍຄວາມສະດວກການທ່ອງທ່ຽວ ຕາມມາດຖານ 100% ເຫັນວ່າສາມາດບັນລຸໄດ້ 73,14%ຊຶ່ງໄດ້ກວມເອົາ 7 ບ້ານເທດສະບານເມືອງຈອມເພັດ ເຊັ່ນ: ບ້ານຊຽງແມນ, ນາທ່າ, ບ້ານຈ່ານເໜືອ, ບ້ານຈ່ານໃຕ້, ບ້ານໂພລາດ, ບ້ານບວມເລົາ ແລະບ້ານປາກຫຼືງ ຕາມເສັ້ນທາງ 4B ແຕ່ບ້ານທ່າເຮືອ ໄປຮອດແຫຼ່ງທ່ອງທ່ຽວຕາດຮ້ອຍ ແຕ່ເມື່ອທຽບໃສ່ບັນດາມາດຖານເງື່ອນໄຂ ຂອງເມືອງທ່ອງທ່ຽວສະອາດອາຊຽນແລ້ວເຫັນວ່າຍັງມີບັນຫາທີ່ອົງການປົກເມືອງ ແລະບ້ານທີ່ຕ້ອງໄດ້ສືບຕໍ່ປັບໃຫ້ໄດ້ຕາມມາດຕະຖານ ເປັນຕົ້ນແມ່ນແກ້ໄຂການຂົນສົ່ງທີ່ເປັນມິດກັບສິ່ງແວດລ້ອມ ແລະຄຸນນະພາບຂອງນໍ້າ, ການຄຸ້ມຄອງຫ້ອງນໍ້າສາທາລະນະ, ການຄຸ້ມຄອງຕະຫຼາດຊຸມຊົນ ເນື່ອງຈາກວ່າຍັງມີຂີ້ເຫຍື້ອຊະຊາຍ, ການອະນາໄມ ຢູ່ຕາມສະຖານທີ່ສາທາລະນະ ແລະ ການເກັບມ້ຽນສິ່ງເສດເຫຼືອຍັງບໍ່ເປັນລະບົບ. ມີການປ່ອຍນໍ້າເປື້ອນຈາກຜູ້ປະກອບການ ແລະ ຄົວເຮືອນລົງສູ່ແມ່ນໍ້າຂອງໂດຍກົງ. ການປູກຈິດສຳນຶກການປົກປັກຮັກສາສິ່ງແວດລ້ອມ ແລະ ຄວາມສະອາດໃຫ້ແກ່ສັງຄົມ ແລະ ນັກຮຽນ ຍັງບໍ່ກວ້າງຂວາງ ແລະ ເປັນປົກະຕິ. ຍັງບໍ່ທັນມີສວນສາທາລະນະ ຫຼື ພື້ນທີ່ສາທາລະນະ ສຳລັບນັກທ່ອງທ່ຽວ ແລະປະຊາຊົນທ້ອງຖິ່ນ ເພື່ອພັກຜ່ອນຢ່ອນໃຈ ຫຼື ຈັດກິດຈະກຳຕ່າງໆ;  ຄວາມປອດໄພທາງດ້ານສຸຂະພາບ ແລະ ຄວາມສະຫງົບ: ການກວດກາຄຸນນະພາບ ແລະ ຄວາມສະອາດຂອງຮ້ານອາຫານ ແລະ ຮ້ານຂາຍເຄື່ອງດື່ມຕ່າງໆ. ໂຄງລ່າງພື້ນຖານ ແລະ ສິ່ງອຳນວຍຄວາມສະດວກດ້ານການທ່ອງທ່ຽວ: ອ່າງບຳບັດນໍ້າເປື້ອນຍັງບໍ່ທັນມີ.
    ໂອກາດດັ່ງກ່າວ ທ່ານ ນາງ ສຸດາພອນ ຄົມທະວົງ ຍັງໄດ້ຮຽກຮ້ອງ ແລະເນັ້ນໃຫ້ທຸກພາກສ່ວນ ແລະບັນດາບ້ານທີ່ນອນຢູ່ໃນເປົ້າໝາຍ ຈົ່ງເອົາໃຈໃສ່ການປັບປຸງແກ້ໄຂບັນຫາຕ່າງໆ ທີ່ຍັງຄ້າງຄາໃຫ້ບັນລຸຕາມບັນດາມາດຕະຖານ ເງື່ອນໄຂເມືອງທ່ອງທ່ຽວສະອາດອາຊຽນ, ເນັ້ນໃຫ້ບັນດາຄອບຄົວເປັນເຈົ້າການຮັກສາຄວາມສະອາດ ແລະຄຸ້ມຄອງສັດລ້ຽງ ເປັນຕົ້ນແມ່ນງົວ, ຄວາຍ ແລະແບ້ ບໍ່ໃຫ້ປ່ອຍຊະຊາຍຕາມເສັ້ນທາງຫຼວງ ມັນສ້າງຄວາມບໍ່ສະອາດ ແລະຄວາມບໍ່ປອດໄພນັກທ່ອງທ່ຽວ ຊຶ່ງພິທີການປະກາດຮັບຮອງ ແລະມອບລາງວັນ ໃຫ້ເມືອງຈອມເພັດເປັນເມືອງທ່ອງທ່ຽວສະອາດອາຊຽນ ຈະໄດ້ຈັດຂຶ້ນໃນເດືອນມັງກອນ 2024 ຈະມາເຖິງນີ້.
ຂ່າວ-ພາບ: ເພັດສາຄອນ ສິມມະວົງ