ຂ່າວຕ່າງປະເທດລາຍງານ ໃນວັນທີ 28 ມັງກອນ ຜ່ານມາ, ອົງການສະຫະປະຊາຊາດ (UN) ຢືນຢັນວ່າໄດ້ຮັບແຈ້ງການຈາກ ສະຫະລັດ ອາເມຣິກາຢ່າງເປັນທາງການກ່ຽວກັບການຖອນຕົວອອກຈາກສັນຍາປາຣີກ່ຽວກັບການປ່ຽນແປງຂອງດິນຟ້າອາກາດ.
ທ່ານ ສະເຕຟານ ດູຈາຣຣິກ ໂຄສົກຂອງເລຂາທິການໃຫຍ່ອົງການສະຫະປະຊາຊາດ ຖະແຫຼງວ່າ:ສະຫະລັດ ອາເມຣິກາ ໄດ້ແຈ້ງໃຫ້ທ່ານເລຂາທິການໃຫຍ່ສະຫະປະຊາຊາດຊາບໃນວັນທີ 27 ມັງກອນ ຜ່ານມາກ່ຽວກັບການຖອນຕົວອອກຈາກສັນຍາປາຣີທີ່ໄດ້ລົງນາມໃນວັນທີ 12 ທັນວາ 2015, ໂດຍການຖອນຕົວອອກຈະມີຜົນສັກສິດໃນວັນທີ 27 ມັງກອນ 2026 ຕາມມາດຕາ 28 ວັກ 2 ຂອງຂໍ້ຕົກລົງດັ່ງກ່າວ.
ທ່ານ ດູຈາຣຣິກ ຢ້ຳຄືນເຖິງຄຳໝັ້ນສັນຍາຂອງສະຫະປະຊາຊາດຕໍ່ຂໍ້ຕົກລົງປາຣີ ແລະສະໜັບສະໜູນທຸກຄວາມພະຍາຍາມໃນການຈຳກັດອຸນຫະພູມໂລກໃຫ້ສູງຂຶ້ນບໍ່ເກີນ 1.5 ອົງສາ.
ກ່ອນໜ້ານີ້, ທ່ານ ໂດນັລ ທຣໍາ ປະທານາທິບໍດີ ສະຫະລັດ ອາເມຣິກາໄດ້ລົງນາມໃນຄໍາສັ່ງບໍລິຫານຖອນ ສະຫະລັດ ອາເມຣິກາ ອອກຈາກຂໍ້ຕົກລົງປາຣີ ເປັນຄັ້ງທີສອງ ນັບຕັ້ງແຕ່ມື້ທຳອິດທີ່ເຂົ້າສູ່ທຳນຽບຂາວ.
ລັດຖະບານສະໄໝທຳອິດຂອງທ່ານ ທຣໍາ ໄດ້ນໍາພາສະຫະລັດ ອາເມຣິກາ ຖອນຕົວອອກຈາກສັນຍາປາຣີຢ່າງເປັນທາງການໃນເດືອນພະຈິກປີ 2020 ຊຶ່ງສົ່ງຜົນກະທົບຕໍ່ຄວາມພະຍາຍາມຮັບມືກັບວິກິດການດ້ານສະພາບອາກາດຂອງສາກົນຢ່າງໃຫຍ່ຫຼວງ, ຕໍ່ມາ ທ່ານ ໂຈ ໄບເດນ ຊຶ່ງໄດ້ເຂົ້າຮັບຕໍາແໜ່ງຕໍ່ຈາກທ່ານ ທຣໍາ ໃນເດືອນມັງກອນ 2021, ໄດ້ລົງນາມໃນຄໍາສັ່ງບໍລິຫານ ໃຫ້ ສະຫະລັດ ອາເມຣິກາ ເຂົ້າຮ່ວມຂໍ້ຕົກລົງຄືນໃໝ່.
ຄໍາເຫັນ