ວສສ ມອບ-ຮັບໝວກ, ແສງທຽນ ແລະເສື້ອ ໃຫ້ແກ່ນັກສຶກສາປີ 2

ເມື່ອບໍ່ດົນມານີ້, ວິທະຍາໄລວິທະຍາສຸຂະພາບສະຫວັນນະເຂດ (ວສສ) ໄດ້ຈັດພິທີມອບ-ຮັບໝວກ, ແສງທຽນ ແລະ ເສື້ອໃຫ້ແກ່ນັກສຶກສາປີ 2 ກ່ອນລົງຝຶກປະຕິບັດຢູ່ໂຮງໝໍແຂວງສະຫວັນນະເຂດ. ເປັນປະທານໂດຍ ທ່ານ ສຸຄັນທອນ ສິງພວງເພັດ ຜູ້ອໍານວຍການ ວສສ, ມີຮອງຜູ້ອໍານວຍການໂຮງໝໍແຂວງສະຫວັນນະເຂດ, ພະນັກງານຄູ-ອາຈານ, ນັກສຶກສາປີ 2 ແລະ ປີ 3 ພ້ອມດ້ວຍແຂກທີ່ຖືກເຊີນເຂົ້າຮ່ວມ.
    ໃນໂອກາດນີ້, ຕາງໜ້າວິທະຍາໄລວິທະຍາສາດສຸຂະພາບສະຫວັນນະເຂດ ກໍໄດ້ຂຶ້ນກ່າວຈຸດປະສົງໃຫ້ຮູ້ວ່າ: ເພື່ອປະຕິບັດຕາມຍຸດທະສາດການພັດທະນາບຸກຄະລາກອນສາທາລະນະສຸກ ທີ່ກະຊວງສາທາລະນະສຸກວາງອອກ, ເພື່ອສ້າງຈິດສໍານຶກຂອງນັກສຶກສາໃຫ້ຮູ້ເຖິງຄວາມຮັບຜິດຊອບໃນໜ້າທີ່ ແລະ ມີຄວາມຮັກແພງສາມັກຄີຊ່ວຍເຫຼືອຊຶ່ງກັນ ແລະກັນ ທັງເປັນການເສີມສ້າງພັດທະນາວິຊາຊີບ ກໍຄືພັດທະນາຕົນເອງໃຫ້ກາຍເປັນພະນັກງານສາທາລະນະສຸກທີ່ດີ ເປັນທີ່ຮັກແພງ, ເຊື່ອໝັ້ນ ແລະ ໄວ້ວາງໃຈຂອງສັງຄົມ ກໍຄືປະເທດຊາດໃນອະນາຄົດ. ສະນັ້ນ, ນັກສຶກສາ ທີ່ໄດ້ຜ່ານການຄົ້ນຄວ້າຮໍ່າຮຽນຕາມຫຼັກສູດແຕ່ລະໝວດວີຊາພື້ນຖານ ກໍຈະໄດ້ນໍາໃຊ້ຄວາມຮູ້ທີ່ມີ ລົງຝຶກພາກສະໜາມຕົວຈິງຢູ່ໂຮງໝໍແຂວງ ຊຶ່ງຈະເຮັດໃຫ້ເກີດທັກສະສະເພາະຕາມຫຼັກສູດກໍານົດ. ດັ່ງນັ້ນ, ຕາມທໍານຽມປະຕິບັດທຸກໆປີຜ່ານມາ, ກ່ອນຈະນໍາເອົານັກສຶກສາລົງຝຶກຄັ້ງທໍາອິດຂອງຫຼັກສູດ ແມ່ນຕ້ອງໄດ້ເຂົ້າວາງກະຕ່າດອກໄມ້ ແລະ ດອກໄມ້ ເພື່ອຂໍພອນ ແລະ ປະຕິຍານຕົນ ຢູ່ຕໍ່ໜ້າອະນຸສາວະລີ ປະທານ ໄກສອນ ພົມວິຫານ ວິລະບູລຸດແຫ່ງຊາດລາວ ແລະ ມອບໝວກ, ແສງທຽນ ແລະ ເສື້ອ ໃຫ້ແກ່ນັກສຶກສາກ່ອນ.
    ຈາກນັ້ນ, ທ່ານ  ສຸຄັນທອນ ສິງພວງເພັດ ກໍໄດ້ໃຫ້ກຽດມອບໝວກ, ແສງທຽນ ແລະເສື້ອ ໃຫ້ແກ່ນັກສຶກສາພະຍາບານສາຍກົງ ຊັ້ນສູງ ປີທີ 2 ຮຸ່ນທີ XIII, ຜະດຸງຄັນ ຊັ້ນສູງປີທີ 2 ຮຸ່ນທີ VIII ແລະ ນັກສຶກສາການແພດ ຊັ້ນສູງປີທີ 2 ຮຸ່ນທີ VII ລວມທັງໝົດ 134 ຄົນຍິງ 112 ຄົນ. ພ້ອມນີ້, ທ່ານຜູ້ອຳນວຍກາຍ ວສສ ກໍໄດ້ໃຫ້ຄໍາໂອວາດ ໂດຍເນັ້ນໜັກໃຫ້ນັກສຶກສາທຸກຄົນຕັ້ງໃຈປະຕິບັດໜ້າທີ່ຂອງຕົນທີ່ໄດ້ຮັບມອບໝາຍໃຫ້ສຸດຄວາມສາມາດ, ຫ້າວຫັນຕື່ນໂຕໃນການຮຽນຮູ້ທັກສະໃໝ່ຈາກພະຍາບານແພດໝໍທີ່ໃຫ້ຄໍາແນະນໍາ, ສິ່ງສໍາຄັນຕ້ອງມີຄວາມສາມັກຄີປອງດອງກັນພາຍໃນກຸ່ມນັກສຶກສາ ກໍຄືເພື່ອນຮ່ວມງານ ທັງນີ້ເພື່ອເຮັດໃຫ້ບັນຍາກາດມີຄວາມຜ່ອນຄາຍ, ບໍ່ຕຶງຄຽດ ແລ້ວຈະເຮັດໃຫ້ການຝຶກປະຕິບັດຜ່ານໄປໄດ້ດ້ວຍດີ.
ຂ່າວ-ພາບ: ສະຫວັນນະເຂດ