 |
ການພົບປະຄັ້ງນີ້, ທ່ານ ດວງຕາ ໄຊວຸດ ໄດ້ລາຍງານວ່າ: ແຂວງໄຊຍະບູລີ ເປັນແຂວງທີ່ຕັ້ງຢູ່ທິດຕາເວັນຕົກສ່ຽງເໜືອຂອງ ສປປ ລາວ, ພື້ນທີ່ທັງໝົດແມ່ນຕັ້ງຢູ່ ຝັ່ງຂວາຂອງແມ່ນໍ້າຂອງ, ມີເນື້ອທີ່ທັງໝົດ 16,389 ກິໂລຕາແມັດ ເຂດພູດອຍກວມເອົາ 80% ມີຊາຍແດນ ທິດຕາເວັນຕົກ ແລະ ທິດໃຕ້ ຕິດກັບ 6 ຈັງຫວັດຂອງຣາຊະອານາຈັກໄທ, ມີຄວາມຍາວເຖິງ 647 ກວ່າກິໂລແມັດ, ທິດເໜືອ ແລະ ທິດຕາເວັນອອກ ຕິດກັບ 4 ແຂວງຂອງ ສປປ ລາວ ປະກອບມີ 11 ເມືອງ, 45 ຕາແສງ, 430 ບ້ານ, ມີພົນລະເມືອງທັງໝົດ 4 ແສນກວ່າຄົນ, ປະກອບມີ 8 ເຜົ່າ ແລະ ມີດ່ານຮ່ວມກັບຣາຊະອານຈັກໄທ 13 ແຫ່ງ. ໃນນັ້ນ, ດ່ານສາກົນ 4 ແຫ່ງ, ດ່ານປະເພນີ 9 ແຫ່ງ, ມີແຫຼ່ງທ່ອງທ່ຽວທັງໝົດ 149 ແຫ່ງ, ໃນນັ້ນແຫຼ່ງທ່ອງທ່ຽວ ທຳມະຊາດ 107 ແຫ່ງ, ປະຫວັດສາດ 11 ແຫ່ງ ແລະ ແຫຼ່ງທ່ອງທ່ຽວທາງວັດທະນະທໍາ 31 ແຫ່ງ, ແຫຼ່ງທ່ອງທ່ຽວທີ່ໄດ້ພັດທະນາແລ້ວ 69 ແຫ່ງ.
ການພັດທະນາເສດຖະກິດຂອງແຂວງ ແມ່ນອີງໃສ່ 3 ທ່າແຮງ ທີ່ເປັນເສົາຄໍ້າຄື: ຖືເອົາການຜະລິດກະສິກຳຕິດພັນກັບການປຸງແຕ່ງ ເພື່ອສົ່ງອອກເປັນທ່າແຮງ, ເອົາການຜະລິດອຸດສາຫະກຳພະລັງໄຟຟ້າເປັນພື້ນຖານ, ການບໍລິການທາງຜ່ານຕິດພັນກັບການຄ້າຊາຍແດນ ເປັນຕ່ອງໂສ້ ເປັນຈຸດເຊື່ອມຕໍ່ກັບບັນດາແຂວງ ແລະ ປະເທດໃກ້ຄຽງ, ຮັບປະກັນໃຫ້ເສດຖະກິດຂອງແຂວງເຕີບໂຕສະເລ່ຍ 4,5% ຕໍ່ປີ, ລວມຍອດຜະລິດຕະພັນພາຍໃນບັນລຸໄດ້ 24,108 ຕື້ກີບ, ສະເລ່ຍໃສ່ຫົວຄົນໄດ້ 2,567 ໂດລາຕໍ່ຄົນຕໍ່ປີ; ສິນຄ້າທີ່ເປັນປາຍແຫຼມຂອງແຂວງ ຍັງແມ່ນການປູກຝັງ-ລ້ຽງສັດ, ທົ່ວແຂວງມີໂຮງງານແປ້ງມັນຕົ້ນ 3 ແຫ່ງ, ໂຮງງານຢາງພາລາ 2 ແຫ່ງ, ໂຮງງານລ້າງຄັດເກດໝາກຖົ່ວເຫຼືອງ 4 ແຫ່ງ.
ສຳລັບການປູກເຂົ້າໃນເນື້ອທີ່ 49,600 ກວ່າເຮັກຕາ, ຜົນຜະລິດໄດ້ທັງໝົດ 194,000 ກວ່າໂຕນ, ການປູກພືດເປັນສິນຄ້າເນື້ອທີ່ 124,000 ກວ່າເຮັກຕາ ຜົນຜະລິດທັງໝົດ 1,682,000 ກວ່າໂຕນປະກອບມີ ມັນຕົ້ນ, ສາລີແຂງ, ໝາກເດືອຍ, ພືດຕະກຸນຖົ່ວ, ໝາກໂມ, ສິ່ງທີ່ເປັນປັດໃຈໃໝ່ ແມ່ນການປູກຢາງພາລາໃນເນື້ອທີ່ 20,000 ກວ່າເຮັກຕາ, ປູກກາເຟ ໃນເນື້ອທີ່ 500 ກວ່າເຮັກຕາ ແລະ ອື່ນໆ.
ຂ່າວ+ພາບ: ຄໍາໝັ້ນ
ຄໍາເຫັນ