ເຊກອງ ຈັດງານວັນສາກົນດູແລສຸຂະພາບເວລາຮອບເດືອນ

ທ່ານ ສຸລິວັນ ເພັງໄຊ ໄດ້ກ່າວວ່າ: ໃນທົ່ວໂລກແມ່ຍິງ ແລະ ເດັກຍິງ ໂດຍສະເພາະໃນເຂດຊາຮາຣາຂອງທະວີບອາຟຣິກກາ ປະເຊີນກັບບັນຫາສຸຂະພາບທີ່ເກີດຈາກການຕິດເຊື້ອ HIV ແລະ ບັນຫາ ທີ່ບໍ່ສາມາດເຂົ້າເຖິງ ຫຼື ບໍ່ມີຜ້າອະນາໄມໃຊ້ ເຮັດໃຫ້ຍິງໜຸ່ມຫຼາຍຄົນຕ້ອງຂາດໂຮງຮຽນ ແລະ ທັງເປັນສາຍເຫດເຮັດໃຫ້ອັດຕາການປະລະການຮຽນເພີ່ມຂຶ້ນ. ສິ່ງນີ້ ເປັນສາເຫດທີ່ນຳໄປສູ່ການມີເພດສຳພັນທີ່ໄວຂຶ້ນໃນກຸ່ມໄວໜຸ່ມ ຫຼື ກຸ່ມຄົນຕ່າງໄວ ເຮັດໃຫ້ເຂົາເຈົ້າ ບໍ່ສາມາດປົກປ້ອງຕົນເອງໃນການທີ່ຈະມີເພດສຳພັນທີ່ປອດໄພ ແລະ ສຸດທ້າຍ ກໍນຳໄປສູ່ການເພີ່ມຂຶ້ນຂອງກໍລະນີຕິດເຊື້ອ HIV. ດັ່ງນັ້ນອົງການ AHF ສົ່ງເສີມການຈັດວັນສາກົນດູແລສຸຂະພາບເວລາມີຮອບເດືອນໃນທົ່ວໂລກ ໄດ້ຖືເປັນຍຸດທະສາດໜຶ່ງທີ່ສຳຄັນໃນການໂຄສະນາການປ້ອງກັນແລະການດູແລສຸຂະພາບ, ສົ່ງເສີມການເຂົ້າເຖິງ ແລະ ນຳໃຊ້ຜະລິດຕະພັນດ້ານສຸຂະອະນາໄມ ເພື່ອຮັບປະກັນໃຫ້ແມ່ຍິງ ແລະ ເດັກຍິງທີ່ມີຮອບເດືອນ ສາມາດເຂົ້າເຖິງຜ້າອະນາໄມ, ຮັບຮູ້ເຖິງຜົນຮ້າຍຂອງການຕິດເຊື້ອ HIV, ຮູ້ວິທີການນຳໃຊ້ຖົງຢາງອະນາໄມ ແລະ ການບໍລິການຂັ້ນພື້ນຖານທີ່ຈຳເປັນຕ່າງໆ.

ທ່ານ ສຸລິວັນ ເພັງໄຊ ໃຫ້ຮູ້ຕື່ມວ່າ: ປັດຈຸບັນຫຼາຍໆອົງການສາກົນ ໄດ້ໃຫ້ຄວາມສຳຄັນໃນການສົ່ງເສີມວັນສາກົນດູແລສຸຂະພາບເວລາມີຮອບເດືອນ ເຊັ່ນ: ບາງໂຄງການດ້ານສາທາລະນະສຸກຂອງທະນາຄານໂລກ, ອົງການສະຫະປະຊາຊາດ ລວມທັງອົງການ AHF; ໃນ ສປປ ລາວ ກໍເຫັນວ່າ: ແມ່ຍິງ ແລະ ເດັກຍິງຈຳນວນຫຼາຍ ຍັງມີຄວາມລຳບາກກັບການຈັດການຕົນເອງເວລາທີ່ມີຮອບເດືອນ ເນື່ອງຈາກວ່າ ສະຖານທີ່ ແລະ ສິ່ງອຳນວຍຄວາມສະດວກດ້ານສຸຂະອະນາໄມໃນສະຖານທີ່ສາທາລະນະ ຫຼື ໂຮງຮຽນ ໂດຍສະເພາະແມ່ນຫ້ອງນໍ້າ ທີ່ບໍ່ໄດ້ມາດຕະຖານ ແລະ ບໍ່ຮັບປະກັນຄວາມສະອາດປອດໄພດີເທົ່າທີ່ຄວນ.

ໃນງານຄັ້ງນີ້, ຍັງໄດ້ຈັດກິດຈະກຳຫຼາຍຢ່າງ ໂດຍສະເພາະ ວິທີການນຳໃຊ້ຖົງຢາງອະນາໄມທີ່ຖືກຕ້ອງ, ການບໍລິຈາກເລືອດ ແລະ ກິດຈະກຳຖາມ-ຕອບ ຄວາມຮູ້ຮອບຕົວ ເພື່ອຮັບລາງວັນ.

(ຂ່າວ: ອັດສະວິນ)