 |
ທ່ານ ນາງ ລໍາພັນ ໄຊຄໍາມີ ຫົວໜ້ພະແນກສາທາລະນະສຸກແຂວງ ໄດ້ລາຍງານກ່ຽວກັບການກະກຽມຄວາມພ້ອມ ຊຶ່ງໄດ້ສໍາເລັດການວາງແຜນໃນການຈັດຂະບວນການ ວສຊ ເປັນຕົ້ນ ແຜນງານ, ແຜນຄົນ ແລະ ແຜນງົບປະມານ, ສໍາເລັດກອງປະຊຸມຊີ້ແຈງ ວສຊ ໃຫ້ຂະແໜງການຂັ້ນແຂວງ ແລະ 4 ຕົວເມືອງ, ເກັບກໍາຂໍ້ມູນເປົ້າໝາຍຢອດ ໃຫ້ວັກຊີນກັນພະຍາດໂປລີໂອ ໃນເດັກອາຍຸແຕ່ 0-59 ເດືອນ ຫຼື ລຸ່ມ 5 ປີ ທີ່ເຂົ້າຮງຮຽນ ແລະ ບໍ່ໄດ້ເຂົ້າໂຮງຮຽນ ໃນທຸກບ້ານທົ່ວແຂວງເຊກອງ ມີຈໍານວນ 17,356 ຄົນ. ໃນນັ້ນ, ເມືອງລະມາມ ມີ 4,869 ຄົນ, ເມືອງກະລຶມ 2,979 ຄົນ, ເມືອງດາກຈຶງ 3,833 ຄົນ, ເມືອງທ່າແຕງ 5,684 ຄົນ, ຊຶ່ງຈະໄດ້ຈັດຕັ້ງປະຕິບັດ 2 ຮອບ ຄື: ຮອບທີ1 ເລີ່ມແຕ່ວັນທີ 2-11 ມີນາ, ຮອບ2 ເລີ່ມແຕ່ວັນທີ 23 ມີນາ ຫາ ວັນທີ 2 ເມວາ 2026, ທັງນີ້ ເພື່ອຮັບປະກັນໃຫ້ເດັກອາຍຸ 0-59 ເດືອນ ທັງຢູ່ໃນ ແລະ ນອກໂຮງຮຽນ ໂດຍເນັ້ນໃສ່ການເຂົ້າເຖິງທຸກໆບ້ານ, ທຸກເຂດ ທົ່ວແຂວງ ໃຫ້ໄດ້ຮັບວັກຊີນກັນພະຍາດໂປລີໂປ ໃຫ້ໄດ້ 95% ຂຶ້ນໄປ.
ທ່ານ ນາງ ສີສະຫງ່າ ແກ້ວດວງດີ ໄດ້ກ່າວວ່າ: ການຈັດຂະບວນການ ວສຊ ໃຫ້ວັກຊີນກັນພະຍາດ ໂປລີໂອໃນຄັ້ງນີ້, ກໍເພື່ອໃຫ້ທຸກຄົນໄດ້ຮັບຮູ້ກ່ຽວກັບພະຍາດດັ່ງກ່າວ ຊຶ່ງເປັນພະຍາດທີ່ຮ້າຍແຮງທີ່ສາມາດສົ່ງຜົນກະທົບຕໍ່ສຸຂະພາບ ແລະ ອານາຄົດຂອງເດັກນ້ອຍ; ຊຶ່ງພະຍາດເປ້ຍຫຼ່ອຍ ຫຼື ໂປລີໂອ ແມ່ນພະຍາດທີ່ຮ້າຍແຮງ ເກີດຈາກເຊື້ອຈຸລະໂລກເຮັດໃຫ້ ເປັນອຳມະພາດ ຫຼື ເສຍຊີວິດໄດ້ ເນື່ອງຈາກລະບົບກ້າມຊີ້ນ, ຫາຍໃຈອອ່ນແຮງ, ເປັນພະຍາດທີ່ຕິດແປດງ່າຍທີ່ສຸດ, ຊຶ່ງປັດຈຸບັນບໍ່ມີການປິ່ນປົວສະເພາະສໍາລັບພະຍາດໂປລີໂອ, ມີພຽງແຕ່ການປິ່ນປົວຕາມອາການ ເທົ່ານັ້ນ; ໂດຍການປ້ອງກັນທີ່ດີທີ່ສຸດ ແມ່ນການຢອດຢາ ແລະ ໃຫ້ວັກຊີນກັນພະຍາດເທົ່ານັ້ນຈິ່ງຈະມີຄວາມປອດໄພຈາກພະຍາດດັ່ງກ່າວ.
 |
ທ່ານຍັງໄດ້ຮຽກຮ້ອງໃຫ້ບັນພະແນກການ, ຂະແໜງການຂັ້ນແຂວງ, ຂັ້ນເມືອງ ແລະ ຂັ້ນບ້ານ ຕ້ອງເອົາໃຈໃສ່ໃນການໂຄສະນາປະຊາສຳພັນໃຫ້ແກ່ພໍ່ແມ່ປະຊາຊົນບັນດາເຜົ່າໃນທົ່ວສັງຄົມເວົ້າລວມ, ເວົ້າສະເພາະຕໍ່ພໍ່ແມ່ປະຊາຊົນຊາວແຂວງເຊກອງ ໃຫ້ຮັບຮູ້ເຂົ້າໃຈຕໍ່ຜົນຮ້າຍ, ໄພອັນຕະລາຍຂອງພະຍາດດັ່ງກ່າວທີ່ຈະເກີດຂຶ້ນກັບລູກຂອງຕົນ. ດັ່ງນັ້ນ, ຈຶ່ງເຊີນຊວນ ພໍ່ແມ່ຜູ້ປົກຄອງ ຕ້ອງພາລູກ, ຫຼານຂອງຕົນໄປຮັບວັກຊີນຕາມຈຸດບໍລິການຕ່າງໆໃຫ້ຄົບຕາມກຳນົດ ເພື່ອສ້າງພູມຄຸ້ມກັນ ແລະ ປ້ອງກັນເດັກນ້ອຍຈາກຄວາມພິການ ແລະ ການເສຍຊີວິດ. ຈາກນັ້ນ, ຄະນະປະທານ ຮ່ວມກັບພະນັກງານແພດໝໍ ກໍໄດ້ເຄື່ອນໄຫວຢອດວັກຊີນໃຫ້ຫຼານນ້ອຍນັກຮຽນ ຕື່ມອີກ.
(ຂ່າວ:ພຸດທະສອນ)
ຄໍາເຫັນ