 |
ທ່ານ ເນັ້ງຢ່າງ ໃຈຫວັງໝັ້ນ ໄດ້ມີຄໍາເຫັນ ແລະ ກ່າວເປີດກອງປະຊຸມ ຊຶ່ງທ່ານໄດ້ຍົກໃຫ້ເຫັນເຖິິງວຽກງານໃຫ້ວັກຊິນກັນພະຍາດຢູ່ແຂວງໄຊສົມບູນ ໃນໄລຍະຜ່ານມາເຖິງວ່າຈະປະຕິບັດໄດ້ດີແລ້ວກໍຕາມ ແຕ່ຍັງບໍ່ທັນໄດ້ບັນລຸຕາມຈຸດປະສົງລະດັບຄາດໝາຍທີ່ວາງໄວ້ ຈຶ່ງພາໃຫ້ໃນຊຸມປີຜ່ານມາເກີດມີການລະບາດຂອງພະຍາດໝາກແດງ ຢູ່ແຂວງໄຊສົມບູນ ແລະ ຂໍ້ມູນຫຼ້າສຸດນີ້ ກໍຍັງສືບຕໍ່ມີການລະບາດຂອງພະຍາດໝາກແດງຢູ່ແຂວງທີ່ມີສາຍແດນຕິດກັບໄຊສົມບູນ ມີໂອກາດກັບຄືນມາລະບາດຢູ່ແຂວງພວກເຮົາ. ໃນນັ້ນ, ພະຍາດລ່ອຍແຫຼວກະທັນຫັນ (ໂປລີໂອ) ເມື່ອເປັນແລ້ວ ໂອກາດຈະດີເປັນປົກກະຕິຄືຄົນທົ່ວໄປ ມີໜ້ອຍທີ່ສຸດ ຫຼື ອາດຈະບໍ່ມີເລີຍ, ເປັນແລ້ວກໍນອນຕິດຕຽງໄປຕະຫຼອດຊີວີດ ບໍ່ສາມາດຊ່ວຍເຫຼືອຕົນເອງໄດ້, ຊຶ່ງພະຍາດດັ່ງກ່າວ ກໍເຄີຍລະບາດຢູ່ແຂວງໄຊສົມບູນຂອງພວກເຮົາ ໃນປີ 2015 ມາແລ້ວ, ໃນໄລຍະນັ້ນ ພວກເຮົາກໍໄດ້ເຄື່ອນໄຫວ 10 ຮອບຈຶ່ງສາມາດສະກັດກັ້ນໄດ້. ມາຮອດປີ 2024 ທີ່ຜ່ານມາ ກໍມີການພົບເຊື້ອດັ່ງກ່າວຢູ່ແຂວງສະຫວັນນະເຂດ ຈໍານວນ 3 ກໍລະນີ. ດັ່ງນັ້ນ, ລັດຖະບານລາວກໍ່ຄືກະຊວງສາທາລະນະສຸກຈຶ່ງມີແຈ້ງການເພື່ອສະກັດກັ້ນ ແລະ ໂຕ້ຕອບພະຍາດດັ່ງກ່າວ, ບໍ່ມີຫົນທາງໃດທີ່ສະກັດກັ້ນ ໄດ້ດີໄປກວ່າວິທີໃຫ້ວັກຊີນກັນພະຍາດ ໂດຍທໍາອິດນີ້ ຈະໃຫ້ເຄື່ອນໄຫວຢອດຢາ ໂປລີໂອ ຈໍານວນ 2 ຮອບ ຄື: ເດືອນ 2 ແລະ ເດືອນ 3 ປີ 2026 ນີ້, ຖ້າຫາກ 2 ຮອບນີ້ ປະເມີນຕົວຈິງແລ້ວ ສາມາດສະກັດກັ້ນພະຍາດດັ່ງກ່າວໄດ້ ກໍຈະໝົດໄປ, ແຕ່ຖ້າປະເມີນແລ້ວ ບໍ່ສາມາດສະກັດກັ້ນໄດ້ ກໍຈະໄດ້ສືບຕໍ່ເຄື່ອນໄຫວ ຢອດຢາ-ສັກຢາ ຈົນກວ່າ ສາມາດສະກັດກັ້ນໄດ້.
 |
ກ່ອນທີ່ຈະປະເມີນຜ່ານນັ້ນ ເດັກນ້ອຍລຸ່ມ 5 ປີ ຢູ່ແຂວງໄຊສົມບູນ ຕ້ອງໄດ້ຮັບວັກຊີນ ໂປລີໂອ ຫຼາຍກວ່າ 95%. ພ້ອມນັ້ນ ປະທານກອງປະຊຸມຈຶ່ງຮຽກຮ້ອງມາຍັງບັນດາທ່ານ ທີ່ເຂົ້າມາຮ່ວມກອງປະຊຸມໃນຄັ້ງນີ້ ຈົ່ງສຸມສະຕິປັນຍາຂອງຕົນ ໃນການປະກອບຄໍາຄິດເຫັນ ເພື່ອຊອກໃຫ້ເຫັນ ຈຸດອ່ອນ ແລະ ບັນຫາທີ່ຍັງຄົງຄ້າງ ຈະໄດ້ພ້ອມກັນແກ້ໄຂບັນຫາດັ່ງກ່າວ ໃຫ້ບັນລຸຕາມຄາດໝາຍທີ່ວາງໄວ້ ພ້ອມທັງສືບຕໍ່ເຄື່ອນໄຫວຢອດຢາ-ສັກຢາກັນພະຍາດໃນຮອບນີ້ ໃຫ້ແຂວງໄຊສົມບູນຂອງພວກເຮົາສາມາດຈັດຕັ້ງປະຕິບັດໄດ້ສໍາເລັດຕາມຄາດໝາຍ. ຈາກນັ້ນ, ຄະນະກໍາມະທິການເພື່ອແມ່ ແລະ ເດັກ ຂັ້ນແຂວງ ໄດ້ຜັດປ່ຽນກັນຂຶ້ນບັນຍາຍຊີ້ແຈງຂະບວນການໃຫ້ວັກຊີນ ເປັນຕົ້ນ ການຄຸ້ມຄອງວັກຊີນ, ລະບົບເຢັນ ແລະ ພາລະທິການ, ເຫດການປະຕິບັດພາຍຫຼັງໃຫ້ວັກຊີນ, ການເກັບກໍາ ແລະ ການລາຍງານຂໍ້ມູນ-ການຕິດຕາມ ແລະ ຊຸກຍູ້ໃນເວລາໃຫ້ວັກຊີນ, ເປົ້າໝາຍເດັກລຸ່ມ 5 ປີ ສໍາລັບວັກຊີນ OPV 2026, ຟອມຕິດຕາມຊຸກຍູ້ ວັກຊີນ OPV 2026, ຟອມລາຍງານການສັງລວມ, ແບບຟອມຕິດຕາມວ່ອງໄວ RCM, ວັກຊີນ OPV 2026, ໃບຂິດນັບ ວັກຊີນ OPV, ການລະບາດພະຍາດໂປລິໂອ ແລະ ຄວາມສໍາຄັນຂອງການເຮັດ ວັກຊີນທົ່ວປະເທດ ແລະ ການຈັດຕັງປະຕິບັດວຽກງານການວັກຊີນໃນແຂວງໄຊສົມບູນ. ພ້ອມດ້ວຍກັນນີ້ ບັນດາຜູ້ເຂົ້າຮ່ວມກໍໄດ້ຜັດປ່ຽນກັນຂຶ້ນປະກອບຄໍາຄິດເຫັນຢ່າງກົງໄປກົງມາ ແລະ ພາວະວິໄສ ທັງນີ້ກໍເພື່ອຈະໄດ້ພ້ອມກັນແກ້ໄຂບັນຫາບັນຫາພະຍາດເປັຍລ່ອຍ ໂປລີໂອ ຢູ່ແຂວງໄຊສົມ ໃຫ້ນັບມື້ນັບລຸດລົງເທື່ອລະກ້າວ ພ້ອມທັງສືບຕໍ່ເຄື່ອນໄຫວໃນການຢອດຢາ-ສັກຢາກັນພະຍາດ ດັ່ງກ່າວຢູ່ພາຍໃນແຂວງ ໃຫ້ສາມາດຈັດຕັ້ງປະຕິບັດສໍາເລັດ 100% ແລະ ມີປະສິດທິພາບດີຂຶ້ນກວ່າເກົ່າ.
(ພາບ-ຂ່າວ: ຈີເຍ່ຍເກັ້ງມົວ ຊົວໂກ້)
ຄໍາເຫັນ