ຂ່າວຕ່າງປະເທດລາຍງານ ໃນວັນທີ 8 ມັງກອນ ຜ່ານມາວ່າ: ທຳນຽບຂາວ ຂອງສະຫະລັດ ອາເມຣິກາ ໄດ້ປະກາດໃນວັນທີ 7 ມັງກອນ ຜ່ານມາວ່າ, ທ່ານ ໂດໂນ ທຣໍາ ປະທານາທິບໍດີ ສະຫະລັດ ອາເມຣິກາ ໄດ້ລົງນາມໃນຄຳສັ່ງບໍລິຫານທີ່ຖອນສະຫະລັດ ອາເມຣິກາ ອອກຈາກການເປັນສະມາຊິກຂອງອົງການຈັດຕັ້ງສາກົນ ຈຳນວນ 66 ແຫ່ງ ໃນນີ້ລວມມີອົງການຈັດຕັ້ງທີ່ຂຶ້ນກັບສະຫະປະຊາຊາດ 31 ແຫ່ງ ແລະ ອົງການຈັດຕັ້ງທີ່ບໍ່ຂຶ້ນກັບສະຫະປະຊາຊາດ 35 ແຫ່ງ.
ຂ່າວສານຊີອາໄອລາຍງານ ຫວ່າງມໍ່ໆມານີ້ວ່າ: ກະຊວງປ້ອງກັນຄວາມປະຫງົບຈີນໄດ້ຖະແຫຼງໃຫ້ຮູ້ວ່າ, ປີ 2025 ອົງການປ້ອງກັນຄວາມສະຫງົບທົ່ວປະເທດຈີນໄດ້ປາບປາມອາຊະຍາກຳຫຼອກລວງທາງໂທລະຄົມ ແລະ ອອນລາຍຕາມກົດໝາຍຢ່າງເຂັ້ມງວດ, ເຮັດໃຫ້ການເກີດອາຊະຍາກຳດັ່ງກ່າວຫຼຸດລົງ ໂດຍສາມາດມ້າງຄະດີທີ່ກ່ຽວຂ້ອງໄດ້ທັງໝົດ 258.000 ຄະດີ, ຮ່ວມກັບພາກສ່ວນທີ່ກ່ຽວຂ້ອງຕັດສາຍຫຼອກລວງ 3 ຕື້ 600 ລ້ານເທື່ອ, ຂໍ້ຄວາມສັ້ນ 3 ຕື້ 300 ລ້ານຂໍ້ຄວາມ, ຊ່ວຍຢຸດການໂອນເງິນທີ່ກ່ຽວຂ້ອງກັບການຫຼອກລວງໄດ້ 21 ລ້ານ 7 ແສນ 7 ພັນຢວນ. ພາກສ່ວນປ້ອງກັນຄວາມສະຫງົບແຫ່ງຕ່າງໆຂອງຈີນໄດ້ສຶກສາອົບຮົມ ແລະ ຕັກເຕືອນຕໍ່ໜ້າລວມທັງໝົດ 6 ລ້ານ 7 ແສນ 4 ໝື່ນ 7 ພັນເທື່ອຄົນ.
ວິທະຍຸກະຈາຍສຽງຫວຽດນາມ ລາຍງານວ່າ: ໃນວັນທີ 8 ມັງກອນ ຜ່ານມາ, ກອງປະຊຸມສະຫຼຸບວຽກງານປີ 2025, ຜັນຂະຫຍາຍໜ້າທີ່ປີ 2026 ຂອງລັດຖະບານ ແລະ ອຳນາດການປົກຄອງທ້ອງຖິ່ນ ໄດ້ຈັດຂຶ້ນແບບທາງໄກ, ເຊື່ອມຕໍ່ຈາກສູນກາງໄປເຖິງ 34 ແຂວງ, ນະຄອນຂຶ້ນກັບສູນກາງ. ເຂົ້າຮ່ວມກອງປະຊຸມມີທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ; ທ່ານ ເລືອງເກື່ອງ ປະທານປະເທດ; ທ່ານ ຟ້າມມິງຈິງ ນາຍົກລັດຖະມົນຕີ, ທ່ານ ເຈິ່ນແທັງເໝີ້ນ ປະທານສະພາແຫ່ງຊາດ; ທ່ານ ເຈິ່ນເກິມຕູ ຜູ້ປະຈຳການຄະນະເລຂາທິການສູນກາງພັກ ພ້ອມດ້ວຍການນຳບັນດາກະຊວງ, ຂະແໜງການ ແລະ ທ້ອງຖິ່ນ.
ຂ່າວຕ່າງປະເທດລາຍງານ ໃນວັນທີ 7 ມັງກອນ ຜ່ານມາວ່າ: ບໍລິສັດ Siemens ແລະ Nvidia ໄດ້ປະກາດການຮ່ວມມືດ້ານປັນຍາປະດິດ (AI) ເພື່ອພັດທະນາວິທີແກ້ໄຂ AI ສຳລັບການນຳໃຊ້ໃນຂະແໜງອຸດສາຫະກຳ. ໂດຍມີເປົ້າໝາຍຍົກລະດັບຂະບວນການຕັ້ງແຕ່ການອອກແບບ ແລະ ການຜະລິດ ຈົນເຖິງລະບົບຕ່ອງໂສ້ການສະໜອງໂດຍຜ່ານການພັດທະນາລະບົບປະຕິບັດການອຸດສາຫະກຳທີ່ຂັບເຄື່ອນດ້ວຍ AI.
