ຂ່າວສານຊີອາໄອລາຍງານໃນວັນທີ 6 ມັງກອນ ຜ່ານມາວ່າ: ປີ 2025, ສະພາການພັດທະນາແຫ່ງຊາດກຳປູເຈຍໄດ້ອະນຸມັດໂຄງການລົງທຶນ 630 ໂຄງການ, ມີມູນຄ່າການລົງທຶນເຖິງ 10 ຕື້ໂດລາ. ໃນນັ້ນ, ຈີນສືບຕໍ່ຄອງຖານະປະເທດທີ່ລົງທຶນຫຼາຍທີ່ສຸດຢູ່ກຳປູເຈຍ.
ວິທະຍຸກະຈາຍສຽງຫວຽດນາມ ລາຍງານໃນວັນທີ 6 ມັງກອນ ຜ່ານມາວ່າ: ໃນກອງປະຊຸມຂ່າວທີ່ປະກາດໂຕເລກສະຖິຕິເສດຖະກິດ - ສັງຄົມ ໄຕມາດ IV ປີ 2025 ທີ່ຈັດຂຶ້ນຫວ່າງມໍ່ໆມານີ້ ທີ່ນະຄອນຫຼວງຮ່າໂນ້ຍ, ກົມສະຖິຕິ ກະຊວງການເງິນໃຫ້ຮູ້ວ່າ: ເງິນລົງທຶນຕ່າງປະເທດທັງໝົດ (FDI) ທີ່ຈົດທະບຽນລົງທຶນຢູ່ ຫວຽດນາມ ໃນປີ 2025 ບັນລຸໄດ້ 38.4 ຕື້ກວ່າໂດລາ, ເພີ່ມຂຶ້ນ 0.5% ເມື່ອທຽບໃສ່ປີກ່ອນ.
ຂ່າວຕ່າງປະເທດລາຍງານວ່າ: ໃນວັນທີ 4 ມັງກອນຜ່ານມາ, ຖ້ຽວບິນທັງໝົດ ທັງຂາເຂົ້າ ແລະ ຂາອອກ ໃນເກຣັກ ໄດ້ໂຈະຊົ່ວຄາວ ຫຼັງຈາກລະບົບການສື່ສານຂັດຂ້ອງທົ່ວປະເທດ, ສົ່ງຜົນກະທົບຕໍ່ການດຳເນີນງານຂອງສູນຄວບຄຸມການຈາລະຈາທາງອາກາດ.
ຂ່າວຕ່າງປະເທດລາຍງານ ໃນວັນທີ 5 ມັງກອນ ຜ່ານມາວ່າ: ຕະຫຼາດປາ Toyosu ໃນນະຄອນຫຼວງໂຕກຽວ ປະເທດຍີ່ປຸ່ນ ໄດ້ຈັດປະມູນປາທູນາຄັ້ງທຳອິດຂອງປີ 2026, ໂດຍມີປາທູນາຄີບສີຟ້າໂຕໜຶ່ງລາຄາສູງເຖິງ 510.3 ລ້ານເຢນ ຊຶ່ງຖືເປັນໂຕເລກທີ່ສູງທີ່ສຸດແບບບໍ່ເຄີຍມີມາກ່ອນ.
